No Ũtavanyʼe Masaa ma Mawĩoo?
1. Kwosana na mũsomi ũmwe, mũtũmwa Vaulo atavanasya nyũmba na nyũmba ĩndĩĩ?
1 Kwosana na ĩvuku Daily Life in Bible Times, Vaulo atavanasya nyũmba na nyũmba “kuma saa 10 sya mawĩoo nginya ũtukũ mũno.” Tũyĩsĩ kana ũũ nĩwʼo waĩ mũvango wa Vaulo wa kũtavanyʼa, ĩndĩ nĩtwĩsĩ kana nĩweeyumĩtye ‘kwĩka maũndũ onthe kwondũ wa ũla ũvoo mũseo.’ (1 Ako. 9:19-23) Nĩ kana eke ũu, Vaulo nĩwavangaa maũndũ make nesa nĩ kana atavanyʼe nyũmba na nyũmba ĩla andũ aingĩ maĩ matonya kũkwatĩkana.
2. Nĩkĩ masaa ma mawĩoo nĩ ĩvinda ĩseo ya kũtavanyʼa?
2 Kũndũ kwingĩ atavanyʼa matavanasya nyũmba na nyũmba masaa ma kwakya mĩthenyanĩ ya kyumwa. Ĩndĩ, asu nomo masaa ala maseo vyũ kĩsionĩ kyenyu? Vainia ũmwe easya ũũ ĩũlũ wa kĩsio kyake: “Ve vinya kwĩthĩa andũ mũsyĩ masaa ma mũthenya. Ĩndĩ andũ aingĩ methĩawa mũsyĩ masaa ma mawĩoo.” Kũtavanyʼa masaa ma mawĩoo no kũtume tũkwata mwanya mũseo vyũ, mũno mũno, wa kũtavya aũme ũla ũvoo mũseo. Mavinda maingĩ ene nyũmba methĩawa mathyũmũĩte na matonya kũea ngewa masaa ma mawĩoo. Ethĩwa nĩ ũndũ ũtonya kũtethya kĩsionĩ kyenyu, atumĩa ma kĩkundi maĩle kũvanga ũmbano wa kũtavanyʼa masaa ma mawĩoo.
3. Tũtonya kwonananyʼa ũĩ ata ĩla tũũtavanyʼa masaa ma mawĩoo?
3 Tũmĩa Ũĩ: Ĩla ũũtavanyʼa masaa ma mawĩoo, ũĩ nĩ wa vata. Kwa ngelekanyʼo, wavika kwa mũndũ masaa mataĩle, ta ĩla ũnĩũya lĩu wa wĩoo, nĩ ũseo kũmũkũlya ũsyoke masaa angĩ. Ethĩwa kwĩ kĩvindu, ũngama vandũ mwene nyũmba ũtonya kũkwona, na kwa mĩtũkĩ ũiweta nue ũũ na ũielesya kĩeleelo kya kũmũthokea. Ĩngĩ, nĩ ũndũ wa ũĩ kũtavanyʼa mwĩ elĩ kana mwĩ kĩkundi na mũyĩsĩla nzĩanĩ syĩ kyeni na syĩ na andũ aingĩ. Mũikathi nyũmba sya andũ mwĩ aselee mũno nĩ kana mũikamakũngũũse ala mekwĩyũmbanĩsya kũkoma. (2 Ako. 6:3) Ethĩwa ũtũi mũna ti mũseo kwatuka, tavanyʼai ũtũi ũsu kũtanamba kũtuka mũno.—Nth. 22:3.
4. Nĩ moathimo maũ maumanaa na kũtavanyʼa masaa ma mawĩoo?
4 Moathimo: Ũtavanyʼa ũtũtanĩthasya mũno ĩla tweethĩa andũ tũtonya kũneena namo. Na o ũndũ tweethĩwa tũtonya kũneena na andũ aingĩ, nowʼo tũkethĩwa na myanya mingĩ ya kũtetheesya angĩ “matangĩĩwe, na moke mamanye ũla wʼo.” (1 Tim. 2:3, 4) No ũvange maũndũ maku nĩ kana wĩthĩwe ũtonya kũtavanyʼa masaa ma mawĩoo?