Ĩsandũkũ Ya Ĩkũlyo

◼ Ĩla mũtavanyʼa mũndũ mũka ũkwĩmanyĩĩsya Mbivilia mũomonĩ e na mũmanyĩwʼa wake, na e vamwe na mũtavanyʼa mũndũũme, nĩwaĩle kwĩvwʼĩka mũtwe?

Ĩla mũtavanyʼa mũndũ mũka ũkwĩmanyĩsya Mbivilia na mũmanyĩwʼa wake, na aithokya mũtavanyʼa mũndũũme, aĩlĩte kwĩvwʼĩka mũtwe. (1 Ako. 11:3-10) Ĩkaseti ya Mũsyaĩĩsya ya 15/07/2002 (Kĩswaili), ĩthangũ ya 27 yĩeleetye ta ũũ: “Kĩlungu kĩĩ kya kũmanyĩsya kĩthĩawa kĩ kĩvange, na ũla ũkũmanyĩsya nĩwe wĩthĩawa atongoesye. Na nũndũ wa ũu, kĩlungu kĩĩ kya kũmanyĩsya nĩ ũndũ ũmwe na ũmbano wa kĩkundi. Kwoou, ethĩwa mũndũ mũka mũvatise akeemanyĩsya Mbivilia na mũmanyĩwʼa wake athoketye mũndũũme mũvatise, aĩlĩte kwĩvwʼĩka mũtwe.” Vaĩle kwĩthĩwa vailyĩ oou o na ethĩwa memanyĩĩsya nyũmba, mũomonĩ, kana vandũ vangĩ.

Kĩvathũkanyʼo na ũu, ethĩwa mwĩĩtu-a-asa eneenea mũomonĩ na mũndũ matanamba kwambĩĩa kwĩmanyĩsya Mbivilia, na e vamwe na mũtavanyʼa mũndũũme, ndaĩlĩte kwĩvwʼĩka mũtwe. No ta ũu o na ethĩwa emwonyʼa mũndũ ũsu ũndũ twĩĩmanyĩasya Mbivilia na andũ, kana eneenea ũvoo mũna nthĩnĩ wa yĩmwe ya mavuku ala tũtũmĩaa kũmanyĩsya namo. Nũndũ kwĩmanyĩsya Mbivilia na mũndũ mũomonĩ kwambĩĩaa ĩtina wa kũmũsyokea kwa ĩvinda, atavanyʼa maĩlĩte kũtũmĩa ũĩ mamanye nĩ ĩndĩĩ mũtavanyʼa mũndũ mũka waĩle kwambĩĩa kwĩvwʼĩka mũtwe.