Ilungu Iatĩanĩe sya Kũtũtetheesya Ũtavanyʼanĩ
1. Tũtonya kwĩmanyĩsya maũndũ maũ elĩ kumana na ilungu “Mazungumzo Pamoja na Jirani”?
1 Mavinda kwa mavinda, ĩkaseti ya Mũsyaĩĩsya ya andũ onthe nĩyĩthĩawa na ilungu “Mazungumzo Pamoja na Jirani.” Ilungu ii syĩthĩawa na maũndũ elĩ ma vata tũtonya kwĩmanyĩsya. Nitũtetheeasya kwona ũndũ tũtonya kũneena na andũ kwa nzĩa ya kwendeesya, na ĩngĩ nitũtetheeasya kwona ũndũ tũtonya kũsũanĩa namo maũndũ mana. (1 Vet. 3:15) Tũtonya kũtũmĩa ata ilungu ii?
2. Tũtonya kũtũmĩa ilungu ii ũtavanyʼanĩ ata?
2 Tũmĩa Ilungu Isu Nthĩnĩ wa Ũtavanyʼa: Ethĩwa nĩvatonyeka ũmbanyʼa makaseti amwe ala me na ilungu ii. Ĩla mwene nyũmba, mũndũ ũkwendeewʼa, kana mũmanyĩwʼa wa Mbivilia wakũlya ĩkũlyo, kana aumĩlya ũndũ mũna ũeleetwʼe nthĩnĩ wa ilungu ii, mũnenge ĩkaseti yĩla yĩ na kĩlungu kĩeleetye ũndũ ũsu, na ũimũkũlya ethĩwa nũkwenda mũkĩneenee. Ethĩwa ndwĩ na ĩkaseti yĩla yĩ na kĩlungu kĩu, nũtonya kumya nthĩnĩ wa Kĩsese kitũ kya jw.org.
3. Tũtonya kũtũmĩa ilungu ii ata ĩla tũũneena na mwene nyũmba?
3 Ũtonya kũtũmĩa ilungu ii ata ĩla ũkũneena na mũndũ? Amwe nĩmathokasya mwene nyũmba asome na wasya ndeto sya mwene nyũmba, namo maisoma sya mũtavanyʼa. Nzĩa ĩno nĩyaĩle nũndũ nĩtumaa mwene nyũmba emanyĩsya maũndũ kuma Mbivilianĩ ate kwĩyĩelesya we mwene.—Kũt. 32:2.
4. Tũtonya kũtũmĩa ata maũndũ ala me ilungunĩ ii kwĩmanyĩsya?
4 Ĩmanyĩsye na Ũimanyĩsya Angĩ: Ĩla ũũsoma ilungu ii nthĩnĩ wa ĩkaseti, kwasisya ũndũ maandĩko na ngelekanyʼo itũmĩĩtwe, na ũndũ mũtavanyʼa ũkũelesya maũndũ kwa nzĩa nzeo. Kwasũanĩa nzĩa ya kũneena ya andũ asu. Na ĩndĩ ũitata kwĩka oou ĩla ũũtavanyʼa. (Nth. 1:5; 9:9) Mwĩĩtu-a-asa ũmwe aisye, “Kũsoma ilungu ii no ta kũmanyĩwʼa nĩ vainia ‘mũseo vyũ,’ ũla wĩthĩawa esĩ ũndũ ũtonya kũsũngĩa kĩla ĩvinda!”
5. Tũtonya kũtetheesya amanyĩwʼa maitũ ma Mbivilia ata nĩ kana meyũmbanĩsye ũtavanyʼa?
5 Ĩngĩ, nũtonya kũtũmĩa ilungu ii kũtetheesya mũmanyĩwʼa waku wa Mbivilia kwĩyũmbanĩsya ũtavanyʼa. Soma ilungu ii wĩ na mũmanyĩwʼa waku wa Mbivilia. Mũmanyĩwʼa nĩ ethĩwe mũtavanyʼa naku ũyĩthĩwa mwene nyũmba. Kwĩka ũu nĩkũtonya kũtetheesya amanyĩwʼa ma Mbivilia makeyĩelesya nesa ĩla meũtavanyʼa. (Ako. 4:6) Kwa wʼo, ilungu ii nĩ nzĩa ya Yeova ya kũtũtetheesya nĩ kana ‘twĩanĩsye’ ũthũkũmi witũ.—2 Tim. 4:5.