Ĩsandũkũ ya Ĩkũlyo

◼ Nĩ Ĩndĩĩ Waĩle Kũeka Kwĩmanyĩsya Mbivilia na Mũndũ?

Ethĩwa mũmanyĩwʼa wa Mbivilia ndekwĩka maendeeo ma kĩ-veva, no ũeke kwĩmanyĩsya nake, ĩndĩ ũyĩka ũu kwa ũĩ. (Mt. 10:11) No wĩkũlye makũlyo ta aa: Nũmwĩthĩaa ĩla mwavanga mwĩmanyĩsye Mbivilia? Nĩwĩthĩaa eyũmbanĩsye ĩsomo yĩla mũũsoma? Aaũka maũmbanonĩ maitũ? Nũtavasya andũ angĩ maũndũ ala wĩmanyĩasya? Nĩwĩkĩte moalyũku kwosana na maũndũ ala wĩmanyĩĩtye? Ĩndĩ nũseo ũkasũanĩa ũtonyi wake na myaka yake, na ũimanya kana andũ onthe mayĩkaa maendeeo ũndũ ũmwe. O na ethĩwa nũkũeka kwĩmanyĩsya na mũndũ, mũtie esĩ kana akesa kwenda kwambĩĩa kwĩmanyĩsya ĩngĩ, no mwĩmanyĩsye.—1 Tim. 2:4.