Ũndũ Tũtonya Kũseũvĩĩsya Ũtavanyʼa Witũ​—Kwĩka Mũvango wa Kĩla Mwĩneenea Wasyoka

NĨKĨ NĨ ŨNDŨ WA VATA:

Twĩenda kũngʼithasya mbeũ sya ũwʼo ila twavanda. (1Ako 3:6) Ĩla twatavya mũndũ na endeewʼa, nũseo tũkamũkũlya ĩkũlyo yĩla tũkaneenea twamũsyokea. Kwĩka ũu nĩkũtumaa mũndũ ũsu ethĩwa na wendi wa kũmanya ũsũngĩo wa ĩkũlyo yĩu, na wĩthĩaa nĩ laisi kwitũ kwĩyũmbanyʼa kũmũsyokea. Ĩla twasyoka, no tũtavye mwene nyũmba kana twooka kũmũsũngĩa ĩkũlyo yĩla tũnamũkũlilye.

ŨNDŨ TŨTONYA KWĨKA:

• Ĩla ũkwĩyũmbanĩsya ũtavanyʼa wa nyũmba na nyũmba, ĩthĩwa wĩ na ĩkũlyo yĩla ũkatiaa wakũlya mwene nyũmba na ũimwĩa ũkamũsũngĩa wasyoka. Ĩkũlyo yĩu no yĩthĩwe yĩsũngĩĩtwe nthĩnĩ wa ĩvuku yĩla ũũnengane. Kana ethĩwa ti ũu, no yĩthĩwe yĩsũngĩĩtwe ĩvukunĩ yĩmwe tũtũmĩaa kũmanyĩsya andũ Mbivilia yĩla ũvangĩte kũka kũmwonyʼa wamũsyokea.

• Ũiminĩĩa kũneena na mũndũ wendeewʼa, mũelesye kana no wende kũneena nake ĩngĩ na ĩndĩ ũimũkũlya ĩkũlyo yĩla wĩũka kũmũsũngĩa wasyoka. Ethĩwa nĩvatonyeka, mũkũlye vala wĩkalaa kana ũndũ mũtonya kwonana ĩngĩ.

• Ĩla wamũtavya kana nũũmũsyokea na mweetĩkĩlana saa, ndũkalee kwĩanĩsya mũvango ũsu.—Mt 5:37.