Ũtonya Kwĩmanyĩsya Kyaũ Kuma kwa Aklĩsto Ala Mamũthũkũmĩte Yeova Myaka Mingĩ?

Ikundinĩ sitũ nĩtwĩthĩawa na ana-a-asa na eĩtu-a-asa mamũthũkũmĩte Yeova myaka mingĩ. No twĩmanyĩsye maũndũ mana twoona ũndũ mamwĩkwatĩtye Yeova. No tũmakũlye ĩũlũ wa maũndũ ala monete mayĩkĩka ũseũvyonĩ wa Yeova, na ũndũ Yeova ũmatetheesye makomĩĩsya mathĩna ala makomanaa namo. O na no tũthokye ũmwe woo yĩla twĩ na Ũthaithi wa Mũsyĩ na tũimũkũlya atũelesye maũndũ ala wonete ũseũvyonĩ wa Yeova.

Ethĩwa wĩthĩĩtwe ũimũthũkũma Yeova kwa myaka mingĩ, ĩthĩwa wĩyũmbanĩtye kũelesya Aklĩsto ala angĩ maũndũ maseo ala wonete. Yakovo na Yosevu nĩmaeleasya andũ ma mũsyĩ woo maũndũ ala Yeova wamekĩte. (Mwa 48:21, 22; 50:24, 25) Ĩtina Yeova nĩwawetie kana nĩwendaa ene mũsyĩ mamanyĩsye syana ĩũlũ wa maũndũ ma ũsengyʼa ala weekĩte. (Kũt 4:9, 10; Sav 78:4-7) Ũmũnthĩ, asyai na angĩ kĩkundinĩ no maelesye Aklĩsto ala me na myaka mĩnini maũndũ ma ũsengyʼa ala Yeova wĩanĩĩtye kwĩsĩla ũseũvyo wake.

ĨLOELEI VITIO YĨ NA KYONGO, KWĨTHĨWA NA NGWATANĨO YĨLA WĨA WITŨ ŨKŨNĨTWE MALUVUKU, NA ĨNDĨ MŨISŨNGĨA MAKŨLYO AA MAATĨĨE:

• Ovisi wa ũvonge wa Austria watetheeisye ata ana-a-asa kuma nthĩ imwe ila wĩa witũ wakũnĩtwe maluvuku?

• Ana-a-asa ma nthĩ isu meekie ata nĩ kana mũĩkĩĩo woo ũendeee kwĩthĩwa wĩ mũlũmu?

• Nĩkĩ atavanyʼa aingĩ ma Romania matiie ũseũvyo wa Yeova, na meekie ata nĩ kana masyoke?

• Maũndũ asu malũlũmĩĩlya ata mũĩkĩĩo waku?