Mũtwaano Nĩ Ngwatanĩo Yaĩle Kwĩkala Tene na Tene

Mĩtwaano ya Kĩklĩsto ĩla myaĩlu nĩmũnengae Yeova ndaĩa na nĩyĩeteae mũũme na mũka ũtanu. (Mko 10:9) Nĩ kana Aklĩsto methĩwe na mĩtwaano yĩ na ũtanu, no nginya malũmanyʼe vyũ na myolooto ya Mbivilia yĩla meũnyuva ũla meũtwaana nake.

Ambĩĩa kwĩvaanyʼa ‘wavĩtũka myaka ya ũika.’ Na kĩtumi nũndũ ĩvindanĩ yĩu wĩthĩaa ti laisi kũkengeka nũndũ wa kwĩthĩwa na wendi mwingĩ wa kũmanyana kĩ-mwĩĩ. (1Ko 7:36) Tũmĩa nesa myaka ĩla ũtatwaanĩte kana ũte mũtwae kũlũlũmĩĩlya ngwatanĩo yaku na Ngai, na kwĩthĩwa na nguma sya Kĩklĩsto. Na weeka ũu, ũkeethĩwa ũtonya kwĩthĩwa na mũtwaano mũseo.

Ũtanamba kũtwʼa ũla ũũtwaana nake, tũmĩa ĩvinda yingĩ ũndũ vatonyeka nĩ kana ũmanye “mũndũ wa nthĩnĩ ũla ũtonekaa.” (1Vt 3:4) Ethĩwa ve mathĩna maito maumĩla, maneeneei wĩ na ũla mũvangĩte kũtwaana nake. Kĩvathũkanyʼo na ngwatanĩo ila ingĩ, kĩla kyaĩle kwĩthĩwa kĩ kya vata mũno mũtwaanonĩ nĩ ũndũ mũndũ ũla ũngĩ ũkũtetheka, ĩndĩ ti ũndũ we ũũtetheka. (Avi 2:3, 4) Watũmĩa myolooto ya Mbivilia ũtanamba kũlika mũtwaanonĩ, wĩĩthĩwa weekĩa mũsingi mũseo kwondũ wa mũtwaano wĩ na ũtanu.

ĨLOELEI VITIO YĨ NA KYONGO, KWĨYŨMBANĨSYA MŨTWAANO—KĨLUNGU KYA 3: ‘ĨKA MASAVU,’ NA ĨNDĨ MŨISŨNGĨA MAKŨLYO AA MAATĨĨE:

• Ndũũ ya mwĩĩtu-a-asa ũsu twoona e na Shane yaendeeie ata?

• Mwĩĩtu-a-asa ũsu amanyie maũndũ meva o ũndũ ndũũ yoo yaendeeie?

• Asyai make mamũtetheeisye ata, na nĩ ũtwi wĩva wa ũĩ weekie?