Eteela Mũthya wa Nthĩ Ĩno Nthũku wĩ na Mũĩkĩĩo Mũlũmu

O mĩtũkĩ, wũmĩĩsyo wa Yeova ĩũlũ wa nthĩ ĩno nthũku nũũvika mũthya. Ndĩni syonthe sya ũvũngũ ikaanangwa, mbaĩ ikethĩwa syĩ ngwatanĩo ikavithũkĩa andũ ma Ngai, na Yeova akaananga ala athũku kaũnĩ wa Alimaketoni. Aklĩsto meteele na mea mũno kwona maũndũ asu ma vata na ma kũsengyʼa.

Kũneena ũwʼo, tũyĩsĩ maũndũ onthe ala makethĩwa ĩvindanĩ ya ũla thĩna mũnene. Kwa ngelekanyʼo, tũyĩsĩ vyũ thĩna ũsu ũkambĩĩa ĩndĩĩ. Tũyĩsĩ nĩ maũndũ meva makatuma atongoi ma siasa ma nthĩ ĩno mavithũkĩa ndĩni. Tũyĩsĩ mbaĩ ikavithũkĩa andũ ma Ngai kwa ĩvinda yĩasavĩte ata, o na tũyĩsĩ nĩ maũndũ meva ikeka. O na tũyĩsĩ Yeova akatũmĩa nzĩa syĩva kwananga ala athũku kaũnĩ wa Alimaketoni.

Ĩndĩ, Maandĩko nĩmatũnengete ũvoo wʼonthe ũla tũkwenda nĩ kana tweteele ĩvinda yĩla yũkĩte twĩ na mũĩkĩĩo mũlũmu na ũkũmbaũ. Kwa ngelekanyʼo, nĩtwĩsĩ kana tũtwĩe mũthyanĩ wa “mĩthenyanĩ ya mũminũkĩlyo.” (2Ti 3:1) Nĩtwĩsĩ kana mĩthenya ya kũvithũkĩwa kwa ndĩni ‘ĩkakuvĩvwʼa’ nĩ kana ndĩni ya wʼo ndĩkanangwe. (Mt 24:22) Nĩtwĩsĩ kana Yeova akatangĩĩa andũ make. (2Vt 2:9) Na nĩtwĩsĩ kana Ũla Yeova ũnyuvĩte eananga ala athũku na aitangĩĩa ĩla ĩkomano ĩnene ĩvindanĩ ya Alimaketoni, nĩ mũlũngalu na e vinya mwingĩ.—Ũvu 19:11, 15, 16.

Vate nzika maũndũ ala mokĩte makatuma andũ “mavalũka nũndũ wa wia.” Ĩndĩ o na ũu wĩ o vo, kũsoma na kũvindĩĩsya ũndũ Yeova watangĩĩie andũ make ĩvinda ĩvĩtu na maũndũ ala ũtũtavĩtye ĩũlũ wa ĩvinda yũkĩte, no kũtume ‘tũũngama na tũyũkĩlya mĩtwe yitũ,’ twĩ na mũĩkĩĩo vyũ kana ũtangĩĩo witũ wĩ vakuvĩ.—Luk 21:26, 28.