Mavuku Ala Monanĩtwʼe Nthĩnĩ wa Kavuku ka Ũmbano wa Mwĩkalĩle wa Aklĩsto
MATUKŨ 5-11, MWEI WA 5
MAŨNDŨ MA VATA KUMA NDETONĨ YA NGAI NTHIMO 12
Kũthũkũma na Kĩthito Nĩkũetae Moathimo
Ũthwii wa Kĩ-veva
Nyie Nĩ Mũlũmu Mũno Wĩana Ata?
● Ĩthĩwa na woni waĩlĩte ĩũlũ wa thĩna ũla wĩ nawʼo. Ĩmanyĩsye kũvathũkanyʼa mathĩna manene na ala manini. Mbivilia yaĩtye: “Ũthatu wa ndia nũmanyĩkaa ũtheinĩ; ĩndĩ mũndũ wĩ kĩlĩko nũvithaa nthoni.” (Nthimo 12:16) Ti mathĩna onthe maĩlĩte kũtuma ũthĩnĩka mũno.
“Twĩ sukulu, syana syathĩnĩkaa nũndũ wa tũmaũndũ tũnini ta ũndũ mũnene wĩkĩkĩte. Na ĩndĩ yĩla anyanya masyo maikwata mbau isesenĩ sya kũea ngewa, ũu watumaa iendeea kũthĩnĩka ĩ ya mũno, na ũu ũituma itethĩwa na woni ũla waĩlĩte ĩũlũ wa mathĩna.”—Joanne.
MATUKŨ 12-18, MWEI WA 5
MAŨNDŨ MA VATA KUMA NDETONĨ YA NGAI NTHIMO 13
Ndũkakengwe Nĩ “Taa wa Ũla Mũthũku”
it-2 196 ¶2-3
Taa
Nzĩa Ingĩ Taa Ũtũmĩĩtwe kwa Nzĩa ya Ngelekanyʼo. Kĩla mũndũ wĩkwatasya kĩmũmulĩkĩle nzĩanĩ yake kĩelekanĩtwʼe na taa. Ĩandĩko ya Nthimo yĩineenea ũndũ ũsu nĩyonanĩtye kĩvathũkanyʼo kĩla kĩ vo katĩ wa mũndũ mũlũngalu na mũndũ mũthũku. Yaĩtye: “Kyeni kya ũla mũlũngalu nĩkĩtanaa; ĩndĩ taa wa ũla mũthũku ũkavowʼa.” (Nth 13:9) Kyeni kya ũla mũlũngalu nĩkĩendeeaa kũkena mũnango, ĩndĩ kĩvathũkanyʼo na ũu, kyeni kya ũla mũthũku nĩkyonekaa ta kĩendeee kũkena na ta ũendeee nesa, ĩndĩ mũthya Ngai akaĩkĩĩthya kana taa wake nĩwavowʼa. Ũndũ ta ũsu ũkakwata ũla ũumaa ĩthe na inyia.—Nth 20:20.
O na ĩngĩ, ‘kũvowʼa kwa taa’ wa mũndũ ũsu kwonanasya kana nde na wĩkwatyo wa ĩvinda yũkĩte. Nthimo ĩngĩ yaĩtye: “Nũndũ kũikethĩwa ĩtuvi ya mũndũ mũthũku; taa wa ũla mũthũku ũkavowʼa.”—Nth 24:20.
w12 7/15 12 ¶3
Mũthũkũme Ngai wa Ũthasyo
3 Ethĩwa Satani nĩwakengie andũ elĩ mate na naĩ, o vamwe na syũmbe mbingĩ sya veva maleane na ũsumbĩ mũnene wa Ngai, o naitũ no atũkenge. Nzĩa o ĩsu watũmĩie noyo ũtũmĩaa ũmũnthĩ. Atataa kũtũkenga kwa kũtuma tũsũanĩa kana myolooto ya Ngai nĩ mũio mũito, na nĩtumĩte tũtethĩwa na ũtanu. (1 Yoa. 5:3) Ethĩwa ala tũũtindanyʼa namo matindĩaa kũsũanĩa kwa nzĩa ĩsu, nĩ laisi o naitũ tũkesa kwĩthĩa twambĩĩie kũsũanĩa o tamo. Mwĩĩtu-a-asa wĩ na myaka 24, ũla weelikilye mwĩkalĩlenĩ mũthũku wa ũlaalai aĩtye atĩĩ: “Kĩtindo kĩthũku nĩkyatumie nĩlika mwĩkalĩlenĩ mũthũku, na mũno mũno nũndũ nakĩaa kwĩthĩwa na woni wĩ kĩvathũkanyʼo na wa andũ ala twĩ ma ĩika.” Nĩvatonyeka o naku ũkethĩwa wakwatiwe nĩ ũndũ ta ũsu.
w04 7/15 31 ¶6
“Kĩla Mũndũ wĩ Kĩlĩko Nũtethasya Wĩa na Ũmanyi”
Mũndũ mũĩ na mũlũngalu ũla ũtethasya wĩa na ũmanyi akaathimwa. Solomoni atũĩkĩĩthĩtye ũũ: “Ũla mũlũngalu nũĩsaa akavũnʼya thayũ wake; ĩndĩ ĩvu ya ũla mũthũku yĩkeewʼa nzaa.” (Nthimo 13:25) Yeova nĩwĩthĩawa esĩ kĩla kĩseo kwitũ maũndũnĩ onthe makonetye thayũ witũ. Maũndũ asu nĩ ta, ngwatanĩo yitũ na andũ ala angĩ, ũtavanyʼa witũ, maũndũ makonetye mĩsyĩ yitũ, kana o na yĩla twakanwʼa. Na yĩla twaatĩĩa ũtao ũla wĩ Ndetonĩ yake, twĩkalaa twĩ atanu vyũ thayũnĩ.
Ũthwii wa Kĩ-veva
it-2 276 ¶2
Wendo
Wendo no wonanwʼe kwa nzĩa ĩtaĩle. Nũndũ wa itumi isu, nĩ ũndũ wĩ ũtheinĩ kana nĩ kenda mũndũ ethĩwe na wendo wa wʼo no nginya etĩkĩle kũtongoewʼa nĩ veva wa Ngai na ũmanyi ũla wumaa Ndetonĩ yake. Kwa ngelekanyʼo, mũsyai nũtonya kwĩthĩwa endete kana kake. Ĩndĩ no akananyʼe nũndũ nũkendete, na kwoou aitwʼa kũkanenga kyonthe kĩla kamwĩtya ateũkavata kĩndũ. No aemwe nĩ kũtũmĩa ũkũmũ wake ta mũsyai yĩla ũkũnengane ũkanyʼo na mavinda angĩ yĩla ũkũtũmĩa ndata. (Nth 22:15) Kwa wʼo, mũsyai ta ũsu no twasye eonanyʼa wendo kwa nzĩa ĩtaĩle nũndũ esũanĩa akanyʼa mwana wake nũkwĩkĩĩthya mũsyĩ wake nthoni, ĩndĩ kwĩka ũu kwonanasya kana esũanĩa o ĩũlũ wake mwene. Mbivilia yaĩtye kana mũndũ ta ũsu ndonanasya wendo, ĩndĩ onanasya kĩmena nũndũ ndaatĩĩaa nzĩa ĩla ĩtonya kwovosya thayũ wa mwana wake.—Nth 13:24; 23:13, 14.
MATUKŨ 19-25, MWEI WA 5
MAŨNDŨ MA VATA KUMA NDETONĨ YA NGAI NTHIMO 14
Sũanĩa Nesa Kĩla Waĩle Kwĩka Yĩla Mũisyo Waumĩla
Ũthwii wa Kĩ-veva
w04 11/15 27 ¶3-5
“Ĩeema ya Ũla Mũlũngalu Yĩkaathimĩka”
Solomoni nĩwasyokie aweta nthimo ya kwendeesya ĩla ĩtonya kwĩthĩwa yoonanasya ũseo na ũthũku wa kũtethya wĩa mũna. Aisye: “Vala vate ngʼombe, vandũ va kũĩthĩwʼa nĩ vathei; ĩndĩ wingĩvo mwingĩ nĩ kwondũ wa vinya wa ngʼombe.”—Nthimo 14:4.
Ĩvuku yĩmwe yĩyĩelesya ũndũ nthimo ĩsu yonanasya yaisye atĩĩ: “Kyũũ kĩthei kyonanasya kana vai indo sya kũĩthĩsya vo, na kwoou wĩthĩaa mũndũ nde na vata wa kũthesya kana kũsũvĩa indo, na etũmĩa ngalama nini. Ĩndĩ kĩlungu kya kelĩ kya mũsoa ũsu wa 4 kyonanĩtye kana, ũseo ũsu wʼonthe no mana nũndũ ũte na indo nĩ ũndũ wĩ ũtheinĩ kana ũkaketha lĩu mũnini.” Kwoou no nginya mũĩmi anyuve kwa ũĩ.
Mwolooto ũũ wa Nthimo no ũtũtetheesye yĩla tũũsũanĩa ĩũlũ wa kũvĩndũa wĩa ũla tũthũkũmaa, yĩla tũũsũanĩa ĩũlũ wa nyũmba ĩla tũkwaka, ngalĩ ĩla tũkũũa, nyamũ ĩla tũkũĩthya mũsyĩ, na syĩndũ ingĩ ta isu. Mũndũ mũĩ akasũanĩaa ũndũ ũkũtetheka na wasyo ũla ũkũkwata, na aivindĩĩsya ethĩwa kĩthito kĩla ũkwĩkĩa kwa wʼo kĩ na mosyao kana nĩ kya mana.
MATUKŨ 26, MWEI WA 5–ĨTUKŨ 1, MWEI WA 6
MAŨNDŨ MA VATA KUMA NDETONĨ YA NGAI NTHIMO 15
Tetheesya Ala Angĩ Methĩwe me Atanu
w10 11/15 31 ¶16
Tũkaendaa Wĩanĩunĩ Witũ!
16 Yovu aĩ mũlau. (Yovu 31:31, 32) O na kau nĩtũtonya kwĩthĩwa tũte athwii, no ‘tũendeee kũthokasya aeni na ũlau.’ (Alo. 12:13) No twonyʼe ala angĩ ũlau na kĩla kĩnini twĩ nakyo, tũlilikene kana nĩ “kavaa kũya nyũnyi, vala ve wendo, kwĩ ngʼombe ĩĩthawʼa kĩtũũnĩ vamwe na kĩmena.” (Nth. 15:17) No tũtanĩe na tũitetheka mũno kĩ-veva yĩla twaĩsanĩa na mũndũ ũendaa wĩanĩunĩ taitũ, o na ethĩwa no kĩndũ kĩnini, twĩ vandũ vauĩtye.
MATUKŨ 2-8, MWEI WA 6
MAŨNDŨ MA VATA KUMA NDETONĨ YA NGAI NTHIMO 16
Makũlyo Atatũ Matonya Kũtũtetheesya Twĩke Motwi Maseo
Ũthwii wa Kĩ-veva
it-1 629
Ũkanyʼo
Mosyao ma Kwĩthukĩĩsya Ũkanyʼo Kana Kũũvũthĩĩsya. Andũ ala athũku, atumanu, kana me mwĩkalĩle mũthũku nĩmonanasya ũndũ mamenete ũkanyʼo wa Yeova kwa kũleana nawʼo vyũ. (Sav 50:16, 17; Nth 1:7) Mosyao mathũku ala maumanaa na ũtumanu ũsu matumaa mũndũ akwata ũkanyʼo, na mavinda maingĩ akwataa ũkanyʼo mũvyũ mũno. Nĩkyo kĩtumi ĩvuku ya Nthimo yaĩtye: “Kwonwʼa mavĩtyo kwa ndia nĩ ũtumanu wasyo.” (Nth 16:22) No meyĩetee ũkya, nthoni, mowau, na o na kĩkwʼũ. Ngewa ya Aisilaeli nĩyĩeleetye nesa ũndũ mũndũ ũtonya kũkwata wasyo wĩana. Mayaaĩthukĩĩsya o na vanini ũkanyʼo ũla manengawe nĩ athani. Nĩmaleile kwĩthukĩĩsya ũkanyʼo wa Yeova, na kwoou alea kũmasũvĩa na kũmaathima. Ĩtina, nĩmakwatie ũkanyʼo mũvyũ ũla watangaasĩtwe tene, nawʼo waĩ kũsindwa nĩ Mbaviloni na kũtavwa.—Yel 2:30; 5:3; 7:28; 17:23; 32:33; Osea 7:12-16; 10:10; Nzev 3:2.
MATUKŨ 9-15, MWEI WA 6
MAŨNDŨ MA VATA KUMA NDETONĨ YA NGAI NTHIMO 17
Ũtonya Ata Kwĩthĩwa na Mũuo Mũtwaanonĩ Waku?
g 9/14 11 ¶2
Ũndũ Ũtonya Kũeka Kwoveea Ũthatu Ngoonĩ
Ĩyĩosye nesa. Mbivilia yaĩtye kana andũ amwe methĩawa me ‘athatuʼ na me ‘athilĩku.’ (Nthimo 29:22) We ũu nĩwʼo ũilye? Ĩkũlye-ĩ: ‘Nyie nĩnoveeaa ũthatu ngoonĩ? Nyie nĩnĩthataa mĩtũkĩ? Nĩnũkĩlasya ĩteta nũndũ wa tũmaũndũ tũte vala tũĩ?’ Mbivilia yaĩtye kana “ũla ũtindaa aineena ũndũ, ataanasya anyanya anene.” (Nthimo 17:9; Mũtavanʼya 7:9) Ũndũ ta ũsu no wĩkĩke mũtwaanonĩ. Kwoou ethĩwa wĩ na mũtuo wa kwoveea ũthatu ngoonĩ, ĩkũlye-ĩ, ‘No nũmĩĩsye mũnango ũla nĩtwaanĩte nake?’—Mwolooto wĩ Mbivilianĩ: 1 Vetelo 4:8.
w08 5/1 10 ¶6–11 ¶1
Ũndũ Mũtonya Kũmina Mathĩna
1. Vangai ĩvinda ya kũneenea thĩna ũla wĩ vo. Mbivilia yaĩtye atĩĩ: “Kwondũ wa kĩla kĩndũ ve ĩvinda, . . . ĩvinda ya kũvindya, na ĩvinda ya kũneena.” (Mũtavanʼya 3:1, 7) O tondũ twonie mwambĩĩonĩ, mathĩna amwe nĩmatonya kũtuma tũthata mũno. Yĩla ũu weekĩka, ĩmanyĩsye kwĩsiĩĩa kwa “kũvindya” o vanini ũtanathata mũno. No ũsũvĩe ngwatanĩo yenyu ndĩkanangĩke kwa kũatĩĩa ũtao ũũ wĩ Mbivilianĩ: “Kwambĩĩsya ĩteta nĩ ta walĩku silanganĩ, kwoou eka ĩteta kaũ ũtanethĩwa.”—Nthimo 17:14, New Century Version.
Ĩndĩ, ve o “ĩvinda ya kũneena.” O ta ĩia, yĩla mathĩna malekeleelwʼa mekaa kwongeleka. Kwoou ndũkavũthĩĩsye thĩna ũyĩkwatya kana nũũthela. Ethĩwa nĩwavanga kwamba kũeka kũneenea ũndũ, onyʼa ũla ũtwaanĩte nake ndaĩa kwa kũnyuva ĩvinda yĩngĩ ĩseo na yĩte vaasa mũtonya kũneenea ũndũ ũsu. Kwĩka ũu no kũmũtetheesye inywʼonthe mũatĩĩe mwolooto ũũ wĩ Mbivilianĩ: “Mũikaeke syũa yĩthũe o mũthatĩte.” (Aeveso 4:26) Vate nzika, no nginya wĩanĩsye kĩla wathana.
Ũthwii wa Kĩ-veva
it-1 790 ¶2
Itho
Metho maitũ no monanyʼe nesa ũndũ tũkwĩwʼa. No monanyʼe twĩ na tei kana tũi nawʼo (Kũt 19:13); no ‘mavenyʼe’ kana ‘makalalya’ kwonanyʼa twĩ na kĩvũthya kana ũseleke. (Sav 35:19; Nth 6:13; 16:30) Ũla ũtendaa kũsisya kana ũtendete kwĩka ũndũ kwondũ wa mũndũ ũngĩ, no ewe nũlalĩtye kana akavitha metho make. (Mt 13:15; Nth 28:27) Metho ma ndia meĩtwe kana “me itulunĩ sya nthĩ,” mayanganga kũũ na kũũ mateũsisya vandũ vamwe, na kwoou mosũanĩo ma mũndũ ta ũsu mangangaa kũũ na kũũ vandũ va kũlũma ũndũnĩ ũla wa vata. (Nth 17:24) O na mũndũ amanyĩkaa e na thĩna wa mwĩĩ kana nde nawʼo, na kana nĩ mũtanu kana ti mũtanu kwa kũmũsisya metho make. (1Sa 14:27-29; Kũt 34:7; Yovu 17:7; Sav 6:7; 88:9) Mũsumbĩ Yeosavati amwĩie Yeova: “Metho maitũ me vala ũĩ.”—2Mav 20:12.
MATUKŨ 16-22, MWEI WA 6
MAŨNDŨ MA VATA KUMA NDETONĨ YA NGAI NTHIMO 18
Thangaasya Ala Maendeee Kũmĩanĩsya na Mathĩna ma Mwĩĩ
mrt kĩlungu kya 19, ĩsandũkũ
Ũndũ Ũtonya Kũthĩnĩkĩa Mathĩna ma Mwĩĩ Maũkwata Ũtataĩĩe
Ĩthĩwa wĩ mwĩthukĩĩsya mũseo. Ũndũ ũmwe tũtonya kwĩka tũkatetheesya mũnyanya witũ nĩ kwa kũmwĩthukĩĩsya yĩla ũkwenda kũneena naitũ. Ndũkewʼe ta ũkũũlasimĩthya ũsũngĩe kĩla kĩndũ ũkũweta. Mavinda maingĩ kwĩthukĩĩsya nĩkũtoetye. Tata ũmũelewe na ndũkamũsilĩle. Ndũkatwʼe nĩwĩsĩ ũndũ mũnyanyau ũkwĩwʼa, na mũno mũno ethĩwa ũwau ũla wĩ nawʼo ndũtonya kwoneka.—Nthimo 11:2.
Weta maũndũ maseo. No ũeme kũmanya kĩla ũtonya kũweta, ĩndĩ kũneena o ndeto nini ĩũlũ wa ũndũ ũsu ũkwatĩte mũnyanyau no kũmũkiakisye mũno kwĩ kũvindya kana kũema kũneena kĩndũ. Ethĩwa vai ndeto ũtonya kũmũtavya, no ũtũmĩe ndeto syĩ laisi na sya kũkiita ngoo ta, “Mwa ndyĩsĩ ũndũ ndonya kwasya, ĩndĩ nĩenda ũmanye kana nĩngũũthĩnĩkĩa.” Ndũkatũmĩe ndeto ta, “Maũndũ no mathũkĩĩe” kana “Mwa kavaa ũu ũte na . . . ”
No wonanyʼe kana nũũthĩnĩkĩa mũnyanyau kwa kwĩka ũkunĩkĩli ĩũlũ wa ũwau ũla wĩ nawʼo. Nũtonya kũtana nũndũ wa kwona kĩthito kĩla wĩkĩĩte ũmanye kĩla kĩũmũthĩnyʼa, na akendeeawʼa mũno nĩ ndeto syaku. (Nthimo 18:13) Ĩndĩ o na ũu wĩ o vo, ĩthĩwa wĩ metho ndũkanengane ũtao ũtaĩlĩte.
Tetheesya vala ũtonya. Vandũ va kũsũanĩa nĩwĩsĩ ũndũ ũtonya kwĩka nĩ kana ũtetheesye, kũlya kĩla waĩle kwĩka. Ĩndĩ, lilikana kana mũnyanyau no aeme kũweta kana nũkwenda kũtetheewʼa, nũndũ ndekwenda kũũtwʼĩkĩa mũio. Veethĩwa vailyĩ ũu, tata kũmũwetea ũndũ ũtonya kwĩka ũmũtetheesye ta kũthi kũmũthooea syĩndũ, kwĩka ũtheu, kana o maũndũ angĩ ta asu.—Akalatia 6:2.
Ndũkakwʼe ngoo. Mũnyanyau aendeee kũmĩanĩsya na ũwau wake, mavinda angĩ no aleane na mĩvango ĩla mwĩĩvangĩte kana akewʼa atekwenda kũneena naku. Vekala ũu, ĩthĩwa na wũmĩĩsyo na ũimũelewa. Endeea kũmũtetheesya vala ũkwenda ũtethyo.—Nthimo 18:24.
Ũthwii wa Kĩ-veva
it-2 271-272
Kũlimana, Kana Kũkũna Kula
Kũlimana kana kũkũna kula nĩ ũndũ weekawa ĩvindanĩ ya tene kũmina thĩna waumĩla. Nĩ kana andũ makũne kula, matũmĩaa syĩndũ ta, tũvila, kana tũvwalũ tũnini tũla tweekĩawa vandũ ngũanĩ kana mbakũlinĩ, na ĩndĩ tũithingithangwʼa. Ũla kavila kake kana kavwalũ kake kavalũka, nĩwe wanyuvawa. O ta wĩvĩto, kũkũna kula kwaĩ ũndũ ũmwe na kũvoya. Ala makũnaa kula meekwatasya kana Yeova nũkũlikĩlĩĩla na aimatetheesya. Ndeto kũlimana (Kĩevelania, goh·ralʹ) kana kũkũna kula nĩtũmĩawa kwa nzĩa ya ngelekanyʼo kwonanyʼa “kĩanda” kana “ũtiĩwa.”—Yos 15:1; Sav 16:5; 125:3; Isa 57:6; Yel 13:25.
Nĩkĩ makũnaa kula? Ĩandĩko ya Nthimo 16:33 yaĩtye atĩĩ: “Mũlimano nĩwĩkĩtwe ngũanĩ; ĩndĩ ũndũ ũkethĩwa no kwondũ wa Yeova.” Ĩvindanĩ ya Isilaeli, andũ makũnaa kula nĩ kana mamine ngananĩo. Nĩkyo kĩtumi Mbivilia yaĩtye: “Kũlimana nĩkũtumaa ngananĩo ithela, na kũtaanʼya ala me na ũtonyi.” (Nth 18:18) Kũlimana kana kũkũna kula kũyatũmĩawa maũndũnĩ ma mathaũ kana kalata. O na kũyeethĩawa na ala masindwa kana ala masinda. O na ĩngĩ, ũndũ ũsu ndweekawa nĩ kana ũthusye ĩkalũ kana athembi, na ndweekawa nĩ kana andũ amwe matetheke. Kĩvathũkanyʼo na ũu, asikalĩ ma Lomi maĩ na kĩeleelo kĩthũku yĩla makũnie kula ĩũlũ wa ngũa sya Yesũ, o tondũ kwathanĩtwe nthĩnĩ wa Savuli 22:18.—Mt 27:35.
w10 6/15 20-21 ¶4-6
Ndeto Nzeo Nitumaa Andũ Mekalanyʼa Nesa
4 Twĩthĩwe twĩneena na ana-a-asa maitũ kana andũ angĩ mate Ngũsĩ, o na ethĩwa nĩ andũ maitũ ma mũsyĩ, nĩ ũndũ wa vata kũatĩĩa ũtao ũũ wa mũtũmwa Vaũlo: “Ndeto syenyu syĩthĩwe syĩ nzeo na syĩ na mũnyũ.” (Ako. 4:6) Ndeto isu sya kwendeesya na syaĩle nĩ sya vata mũno nĩ kana andũ maee ngewa nesa, na mayĩthĩwa na mũuo.
5 Kũea ngewa nesa kũyonanasya kũneena kyonthe kĩla ũũsũanĩa kana ũkwĩwʼa ĩvinda ĩna, na mũno mũno ethĩwa nũthatĩte. Maandĩko monanĩtye kana kũthata ũte kwĩsiĩĩa nĩ wonanyʼo wa kana mũndũ nĩ mwonzu, ĩndĩ nde na vinya. (Soma Nthimo 25:28; 29:11) Ĩvinda yĩmwe, Mose, ũla waĩ “mũuu mũno” kũvĩtũka andũ onthe ala maĩ ĩũlũ wa nthĩ nĩweetĩkĩlilye ũlei wa mbaĩ ya Isilaeli watuma athata mũno, na kwoou aema kũmũtaĩa Ngai. Mose nĩweeyĩeleisye ũtheinĩ ũndũ weewʼaa, ĩndĩ Yeova ndaaendeewʼa nĩ ũndũ ũsu. Ĩtina wa kũtongoesya Aisilaeli kwa myaka 40, Mose ndaakwata kĩanda kya kũmalikya Nthĩ wa Watho.—Mot. 12:3; 20:10, 12; Sav. 106:32.
6 Maandĩko nĩmakathaa ala mesiĩĩaa kana makatũmĩa ũĩ yĩla meũneena. Ĩandĩko ya Nthimo yaĩtye: “Wingĩnĩ wa ndeto vatyaa ĩvĩtyo; ĩndĩ ũla ũsiĩĩaa ilomo syake nĩwĩkaa na ũĩ.” (Nth. 10:19; 17:27) Ĩndĩ, kwĩthĩwa wĩ mũĩ ti kwonanyʼa kana ndwaĩle kwĩyĩelesya. Kwonanasya kũneena ndeto “nzeo,“ na ũu nĩ kwasya, kũtũmĩa ũĩmĩ waku kũvosya, vandũ va kũũmĩsya.—Soma Nthimo 12:18; 18:21.
MATUKŨ 23-29, MWEI WA 6
MAŨNDŨ MA VATA KUMA NDETONĨ YA NGAI NTHIMO 19
Ĩthĩwa Mũnyanya wa Wʼo kwa Ana-a-asa Maku
Ũthwii wa Kĩ-veva
it-1 515
Ũtao, Mũtai
Yeova nĩwe wĩ ũĩ ũla mwingĩ vyũ. Nowe e weka ũtethĩawa na vata wa mũndũ wa kũmũtaa. (Isa 40:13; Alo 11:34) Mwana wake e na ũtonyi wa kũtwʼĩka ‘Mũtai wa Ũsengyʼo,’ na kwoou nũtongoeasya kwa nzĩa ĩla yaĩlĩte, nũndũ nĩwanengiwe ũtao nĩ Ĩthe wake na aũatĩĩa. O na ĩngĩ, e na veva wa Ngai. (Isa 9:6; 11:2; Yoa 5:19, 30) Kĩu kĩonanyʼa nesa vyũ kana nĩ kana ũtao wĩthĩwe ũtonya kũtethya, no nginya twĩthĩwe na woni ta wa Yeova. Ũtao o na wĩva ũla ũũvĩngana na Ũla wĩ Ĩũlũ wa Onthe ndũtethya. Ũsu ti ũtao o na vanini.—Nth 19:21; 21:30.
MATUKŨ 30, MWEI WA 6–MATUKŨ 6, MWEI WA 7
MAŨNDŨ MA VATA KUMA NDETONĨ YA NGAI NTHIMO 20
Maũndũ Matonya Kũũtetheesya Kwĩka Ũtwi Mũseo Ĩvindanĩ ya Kwĩvaanyʼa
Ũthwii wa Kĩ-veva
g11 05 19 ¶1, 2
Syo Ilomo Syaku Nĩ “Mũio wa Wanake wĩ Thooa Mũnene”?
Mũsumbĩ Solomoni aandĩkie: “Ve thaavu, na tũvila twa maliani twingĩ mũno; ĩndĩ ilomo syĩ ũĩ nĩ mũio wa wanake wĩ thooa mũnene.” (Nthimo 20:15) Thaavu wĩthĩĩtwe wĩ wa vata mũno, na ĩvindanĩ ya Solomoni, o natwʼo tũvila twa maliani twoonekaa twĩ twa vata. Ĩndĩ, ilomo sitũ no syĩthĩwe syĩ sya vata mũno kwĩ syĩndũ isu. Ũu ũtonyeka ata? Ti kwondũ wa wanake wa ilomo isu, ĩndĩ nũndũ wa ndeto ila iũneena.
Ethĩwa ilomo sitũ nĩ sya vata mũno, ikaneenaa ndeto nzeo, syĩ na ĩnee, na wendo. Na ta “ilomo syĩ ũĩ,” nineenaa ũwʼo ĩũlũ wa Ngai, o tondũ Mbivilia yonanĩtye. Kwa wʼo, ĩvuku yĩĩ ya tene yusĩe ũĩ na ũwʼo ĩũlũ wa Mũmbi witũ, o vamwe na ũtao mũseo vyũ ũtonya kũtũtethya thayũnĩ.—Yoana 17:17.