“Ndũkasiĩĩe Kwʼoko Kwaku”

1-2. Ĩandĩko ya Mũtavanʼya 11:6 yĩkonanĩtye ata na wĩa wa kũtavanyʼa ũvoo mũseo wa Ũsumbĩ?

NTHĨ imwe, andũ methĩawa na mea maingĩ ma kwĩwʼa ũvoo mũseo. Nĩ ta methĩawa meteele makomane na mũndũ amatavye ũvoo ũsu! Ĩndĩ nthĩ ingĩ, andũ mayendeeawʼa mũno nĩ kũmũmanya Ngai kana Mbivilia. Mo andũ kĩsionĩ kyenyu mailye ata? O na methĩwe mewʼaa ata ĩũlũ wa ũvoo ũsu, Yeova endaa tũendeee kũtavanyʼa nginya yĩla wĩa ũsu wĩthela.

² Ĩvinda yĩla Yeova ũtwʼĩte yavika, wĩa wa kũtavanyʼa ũkathela na ĩndĩ “mũthya ũivika.” (Mt. 24:​14, 36) Ĩndĩ ĩvinda yĩu yĩtanavika, tũtonya kwĩka ata twonanyʼe nĩtũatĩĩaa ũtao ũũ wa Mbivilia: “Ndũkasiĩĩe kwʼoko kwaku”?b​—⁠Soma Mũtavanʼya 11:⁠6.

3. Twĩneenea kyaũ ĩsomonĩ yĩĩ?

³ Ĩsomo ĩvĩtu yĩneeneete maũndũ ana twaĩle kwĩka nĩ kana twĩthĩwe “atei ma andũ,” kana atavanyʼa ma ũvoo mũseo me na ũtũĩka. (Mt. 4:19) Ĩsomonĩ yĩĩ nĩtũũneenea maũndũ atatũ matonya kũtũtetheesya kũtwʼa vyũ kũtavanyʼa, o na ethĩwa twĩkomana na mawetu meva. Nĩtũkwĩmanyĩsya nĩkĩ nĩ ũndũ wa vata (1) kũtavanyʼa tũte kwĩtĩkĩla kũvĩngĩĩswa nĩ kĩndũ, (2) kwĩthĩwa na wũmĩĩsyo, na (3) kũendeea kwĩthĩwa na mũĩkĩĩo mũlũmu.

TAVANYʼA ŨTE KWĨTĨKĨLA KŨVĨNGĨĨSWA NĨ KĨNDŨ

4. Nĩkĩ twaĩle kũtethya wĩa ũla Yeova ũtũnengete tũte kwĩtĩkĩla kũvĩngĩĩswa nĩ kĩndũ?

⁴ Yesũ nĩwathanie maũndũ ala monanasya twĩkalĩte mĩthenyanĩ ya mũminũkĩlyo, na maũndũ asu no matume aatĩĩi make maola kĩthito kyoo wĩanĩ wa kũtavanyʼa. Na kwoou nĩweekĩie amanyĩwʼa make vinya ‘maendeee kũsyaĩĩsya.’ (Mt. 24:42) Mĩthenyanĩ ya Noa kwaĩ maũndũ maingĩ matumaa andũ matewʼa ũvoo kana ũkanyʼo ũla Noa wamatavasya. Maũndũ asu nomo maendeee, na o naitũ no matũvĩngĩĩse. (Mt. 24:​37-39; 2 Vet. 2:⁠5) Nĩkyo kĩtumi twaĩle kwĩkĩa kĩthito ũndũ tũtonya tũtethye wĩa ũla Yeova ũtũnengete tũte kwĩtĩkĩla kũvĩngĩĩswa nĩ kĩndũ.

5. Ĩandĩko ya Meko ma Atũmwa 1:​6-8 yonanĩtye ũvoo mũseo waĩlĩte kũtavanwʼa nginya va?

⁵ Ĩvindanĩ yĩĩ wĩa wa kũtavanyʼa waĩle kũtethwʼa na kĩthito kingĩ vyũ. Yesũ athanie kana amina kũkwʼa, ũvoo mũseo ũkatavanwʼa kĩsionĩ kĩnene vyũ na ũiendeea kwa ĩvinda yĩasa. (Yoa. 14:12) Ĩndĩ yĩla wakwie, amanyĩwʼa amwe make nĩmasyokeie wĩa woo wa kũtea makũyũ. Athayũũkwʼa, nĩweekie kyama kyatumie makwatya makũyũ maingĩ mũno. Atũmĩie ĩvinda yĩu kũmatetheesya maelewe kana wĩa wa kũtavanyʼa na kũtwʼĩkĩthya andũ amanyĩwʼa nĩwʼo wa vata vyũ kwĩ wĩa ũngĩ o na wĩva. (Yoa. 21:​15-17) Kavinda kakuvĩ atanasyoka ĩtunĩ, nĩwatavisye amanyĩwʼa make kana wĩa wa kũtavanyʼa ũla waĩ anambĩĩsya ũkatavanwʼa kuma Isilaeli nginya isio syĩ kũasa. (Soma Meko ma Atũmwa 1:​6-8.) Myaka mingĩ ĩtina wa vau, Yesũ nĩwoonisye mũtũmwa Yoana woni wa maũndũ makekĩka “mũthenyanĩ wa Mwĩaĩi.”c Ũndũ ũmwe wa kũsengyʼa Yoana woonie waĩ wa mũlaĩka ũũlũkĩte e na “ũvoo mũseo wa tene na tene,” aiũtavanyʼa “kwa kĩla mbaĩ na ũko na kĩthyomo na andũ.” (Ũvu. 1:10; 14:⁠6) Ũndũ ũsu wĩonanyʼa ũtheinĩ kana Yeova endaa tũtavanyʼe ũvoo ũsu mũseo nthĩ yonthe nginya yĩla wĩthela.

6. Nĩ kyaũ kĩtonya kũtũtetheesya tũtavanyʼe tũte kwĩtĩkĩla kũvĩngĩĩswa nĩ kĩndũ?

⁶ No tũtavanyʼe tũte kwĩtĩkĩla kũvĩngĩĩswa nĩ kĩndũ twavindĩĩsya maũndũ onthe ala Yeova wĩkĩte nĩ kana atũtetheesye. Kwa ngelekanyʼo, nũtũnengete lĩu mwingĩ wa kĩ-veva kwĩsĩla syĩndũ sya kwĩthukĩĩsya na vitio, mavuku matumbĩthye kana matonya kũkwatĩkana syĩndũnĩ ta simũ, na vulongulamu ingĩ mbingĩ tũtonya kwĩloela Indanetinĩ. Kwasũanĩa ũndũ ũũ: Kĩsese kitũ kĩ na ũvoo kwa ithyomo mbee wa 1,000! (Mt. 24:​45-47) O na ĩngĩ, ũmũnthĩ andũ ĩũlũ wa nthĩ nĩmaanĩtwʼe nĩ siasa, ndĩni, na viasala, ĩndĩ ve athũkũmi ma Ngai mbee wa milioni nyanya me ngwatanĩo o na kũtwʼĩka maumĩte kũndũ kwĩ kĩvathũkanyʼo. Kwa ngelekanyʼo, Wakatano, Matukũ 19, Mwei wa 4, 2019, Ngũsĩ nthĩ yonthe nĩsyeeloelile vitio ĩneeneete ĩandĩko ya mũthenya ũsu. Mũthenya ũsu ĩ ya wĩoo, andũ 20,919,041 nĩmoombanie malilikane kĩkwʼũ kya Yesũ. Kũvindĩĩsya kĩanda kya mwanya kĩla twĩ nakyo kya kwona maũndũ asu ma kũsengyʼa na kya kwĩthĩwa nthĩnĩ wa ngwatanĩo ĩsu ya ana-a-asa nthĩ yonthe, nĩkũtumaa tũtũnga ilĩko sitũ wĩanĩ wa kũtavanyʼa ũvoo wa Ũsumbĩ.

7. Ngelekanyʼo ya Yesũ ĩtonya kũtũtetheesya ata tũendeee kũtavanyʼa?

⁷ Ũndũ ũngĩ ũtonya kũtũtetheesya tũtavanyʼe tũte kwĩtĩkĩla kũvĩngĩĩswa nĩ kĩndũ nĩ kũatĩĩaa ngelekanyʼo ya Yesũ. We ndaaĩtĩkĩlya ũndũ o na ũmwe ũmũvĩngĩĩse aeke kũtavanyʼa. (Yoa. 18:37) Ndaaĩtĩkĩla kũtatĩka yĩla Satani wendie kũmũnenga “mosumbĩ onthe ma nthĩ na ũnene wamo”; o na ndaatatĩka yĩla andũ mendie kũmũtwʼĩkĩthya mũsumbĩ woo. (Mt. 4:​8, 9; Yoa. 6:15) We ndaaĩtĩkĩla kwĩthĩwa na wendi wa syĩndũ mbingĩ sya kĩ-mwĩĩ; o na ndaalikwa nĩ wia yĩla wavĩngiwe mũno. (Luka 9:58; Yoa. 8:59) Yĩla mũĩkĩĩo witũ watatwa, ũtao wa mũtũmwa Vaulo no ũtũtetheesye tũendeee kũtavanyʼa. Eekĩie Aklĩsto vinya maatĩĩe ngelekanyʼo ya Yesũ nĩ kana ĩmatetheesye ‘maikanoe na kũkwʼa ngoo.’​—⁠Aevl. 12:⁠3.

ĨTHĨWA NA WŨMĨĨSYO

8. Mũndũ wĩ wũmĩĩsyo ethĩawa ailye ata, na nĩkĩ nguma ĩsu nĩ ya vata mũno ũmũnthĩ?

⁸ Mũndũ wĩ wũmĩĩsyo ethĩawa atonya kweteela auĩtye nginya maũndũ mavĩndũke. Nĩtwaĩle kwĩthĩwa na nguma ĩsu mavinda onthe, twĩthĩwe tũkwatĩtwe nĩ ũndũ mũna mũthũku tũkwenda ũthele kana tweteele ũndũ mũseo wĩkĩke. Kwa ngelekanyʼo, mwathani Avakuki nĩwendaa mũno kwona ũngʼendu ũithela Yuta. (Ava. 1:⁠2) O namo amanyĩwʼa ma Yesũ meekwatĩtye kana Ũsumbĩ wa Ngai wĩũka “vau kwa vau” nĩ kana ũmaumye ũkombonĩ wa silikalĩ ya Alomi. (Luka 19:11) O naitũ ũmũnthĩ twĩ na mea maingĩ mũno ma kwona Ũsumbĩ wa Ngai ũivetanga ũthũku wʼonthe, na nthĩ ĩitiwa na andũ o ala mamwĩwʼaa Ngai. (2 Vet. 3:13) Ĩndĩ nĩtwaĩle kũendeea kwĩthĩwa na wũmĩĩsyo na tũyeteela nginya yĩla Yeova ũkosa ĩtambya yĩu. Ekai twone ũndũ ngelekanyʼo ya Yeova mwene ĩtonya kũtũmanyĩsya kwĩthĩwa na wũmĩĩsyo.

9. Nĩ maũndũ meva monanasya kana Yeova e wũmĩĩsyo?

⁹ Yeova nĩwe ngelekanyʼo ĩla nzeo vyũ ya wũmĩĩsyo. Nĩwamũnengie Noa ĩvinda yĩtoetye ya kwaka ngalawa na ayĩthĩwa “mũtavanyʼa wa ũlũngalu.” (2 Vet. 2:5; 1 Vet. 3:20) Nĩwamwĩthukĩĩisye Avalaamu yĩla ũ Avalaamu wamũkũlilye mavinda kauta ĩũlũ wa ũtwi wake wa kwananga andũ athũku ma Sotomo na Ngomola. (Mwa. 18:​20-33) Kwa myaka maana maingĩ, Yeova nĩwoomĩĩisye mũno vyũ Aisilaeli ala mataĩ aĩkĩĩku. (Nee. 9:​30, 31) Na ũmũnthĩ nĩtwonaa ũndũ Yeova wĩ wũmĩĩsyo wĩana nũndũ nũnengete andũ onthe ala mendaa kwĩthĩwa anyanyae ĩvinda yĩtoetye nĩ kana “mavikĩe kwĩlila.” (2 Vet. 3:9; Yoa. 6:44; 1 Tim. 2:​3, 4) Ngelekanyʼo ya Yeova yĩtũmanyĩsya kana nĩtwaĩle kwĩthĩwa na wũmĩĩsyo yĩla tũendeee kũtavanyʼa na kũmanyĩsya andũ. Ekai twone ngelekanyʼo ĩngĩ yĩ Ndetonĩ yake ũtũmĩaa kũtũmanyĩsya kwĩthĩwa na wũmĩĩsyo.

10. Kwosana na Yakovo 5:​7, 8, ngelekanyʼo ya mũĩmi yĩtũmanyĩsya kyaũ?

¹⁰ Soma Yakovo 5:​7, 8. Ngelekanyʼo ya mũĩmi nĩtũmanyĩasya ũndũ tũtonya kwĩthĩwa na wũmĩĩsyo. Nĩ wʼo kana ve syĩndũ imwe imeaa na kwĩana mĩtũkĩ mũno. Ĩndĩ, ve mĩtĩ ĩmwe, na mũno mũno ĩla ĩsyaaa matunda, ĩkuaa ĩvinda yĩasa ĩyĩsa kũsyaa na kũvikĩa kũkethwa. Kwa ngelekanyʼo, ĩvinda ya kũvanda na kũketha nthĩnĩ wa Isilaeli yaĩ ya ta myei thanthatũ. Mũĩmi avandaa mbeũ syake mbua ya mbee yaua Mweinĩ wa 10, na ayĩsa kũketha Mweinĩ wa 4. (Mko. 4:28) Nũseo tũkethĩwa na wũmĩĩsyo ta wa mũĩmi. Ĩndĩ ti laisi kwĩthĩwa nawʼo.

11. Wũmĩĩsyo ũkatũtetheeasya ata wĩanĩ witũ wa kũtavanyʼa?

¹¹ Mavinda maingĩ andũ mendaa kwona mosyao ma kĩthito kyoo mĩtũkĩ ũndũ vatonyeka. Ĩndĩ o ta mũĩmi, ethĩwa nĩtũkwenda mũũnda witũ ũsyae nesa, no nginya tũtũmĩe ĩvinda yingĩ tũiũseũvya, tũivanda, tũiĩmĩa lĩu, na tũinyithya kĩla twavanda. O ta ũu, no nginya twĩkĩe kĩthito kingĩ tũteũnoa wĩanĩ wa kũtwʼĩkĩthya andũ amanyĩwʼa. Kũtetheesya ala tũũmanyĩsya maekane na kĩmena na mayenda ala angĩ nĩkũkuaa ĩvinda. O na ĩngĩ, wũmĩĩsyo witũ ũkatũtetheeasya tũikakwʼe ngoo yĩla twoona andũ matekwenda kũtwĩthukĩĩsya. Ĩndĩ o na yĩla andũ amwe matwĩthukĩĩsya na meethĩwa na wendi wa kwĩmanyĩsya, no nginya twĩthĩwe na wũmĩĩsyo. Tũyĩsa kũlasimĩthya amanyĩwʼa ma Mbivilia methĩwe na mũĩkĩĩo. O na ve mavinda amanyĩwʼa ma Yesũ mataakwatya na mĩtũkĩ kĩla wamamanyĩasya. (Yoa. 14:⁠9) Kwoou ekai tũlilikanae kana no tũvande na tũinyithya, ĩndĩ Ngai nĩwe ũtumaa mbeũ sya ũla wʼo imea.​—⁠1 Ako. 3:⁠6.

12. Tũtonya kwĩthĩwa na wũmĩĩsyo ata yĩla tũũtavya andũ ma mũsyĩ mate Ngũsĩ ũvoo mũseo?

¹² No wĩthĩwe wĩ ũndũ wĩ vinya kwĩthĩwa na wũmĩĩsyo yĩla tũũtavya andũ ma mũsyĩ ala mate Ngũsĩ ũvoo mũseo. Ĩndĩ mwolooto ũla wĩ ĩandĩkonĩ ya Mũtavanʼya 3:7 no ũtũtetheesye. Ĩandĩko yĩu yaĩtye kana ve “ĩvinda ya kũvindya, na ĩvinda ya kũneena.” Mwĩkalĩle witũ mũseo no wĩthĩwe ũkũsĩ mwĩanu, ĩndĩ no twaĩle kwĩkalaa twĩ metho twone myanya ĩla ĩkumĩla ya kũmatavya ũla wʼo. (1 Vet. 3:​1, 2) No nginya twĩthĩwe na kĩthito yĩla tũũtavanyʼa na kũmanyĩsya, ĩndĩ nĩtwaĩle kũmĩĩasya andũ onthe, o vamwe na andũ maitũ ma mũsyĩ.

13-14. Nĩ andũ ta meva maĩ na wũmĩĩsyo tũtonya kwĩyĩelekanyʼa namo?

¹³ No twĩmanyĩsye kwĩthĩwa na wũmĩĩsyo twasũanĩa athũkũmi ma Ngai ma tene ala maĩ aĩkĩĩku, vamwe na angĩ ma ĩvinda yĩĩ. Ũmwe woo aĩ Avakuki. Nĩweeteele mũno kwona ũthũku wʼonthe ũithela, ĩndĩ aĩ na wũmĩĩsyo, na nĩkyo kĩtumi waisye atĩĩ: “Ngaũngama ũsyaĩĩsyonĩ wakwa.” (Ava. 2:⁠1) Ũngĩ aĩ mũtũmwa Vaulo. Nĩwendaa mũno “kũmina” ũthũkũmi wake. Ĩndĩ o na ũu wĩ o vo, aĩ na wũmĩĩsyo wa kũendeea “kumya ũkũsĩ mwĩanĩu ĩũlũ wa ũvoo mũseo.”​—⁠Meko 20:⁠24.

¹⁴ Kwasũanĩa ngelekanyʼo ya mwana-a-asa ũmwe na mũka. Mamina Sukulu ya Ngileati nĩmatũmiwe nthĩ ĩte Ngũsĩ mbingĩ, na yĩ andũ aingĩ mate Aklĩsto. Ti andũ aingĩ mendeeawʼa nĩ kwĩmanyĩsya Mbivilia. Ĩndĩ kĩvathũkanyʼo na ũu, anyanya moo ala maĩ namo sukulunĩ ĩsu matũmiwe nthĩ ingĩ, na nĩmamatavasya ũndũ meũtanĩa kwĩthĩwa na amanyĩwʼa aingĩ ma Mbivilia mekĩte maendeeo. Ĩndĩ mwana-a-asa ũsu na mũka nĩmaendeeie kwĩthĩwa na wũmĩĩsyo ũtavanyʼanĩ o na kau andũ aingĩ kĩsionĩ kĩu mayendeeawʼa. Ĩtina wa kũtavanyʼa kĩsionĩ kĩu kwa myaka nyanya, nĩmesie kũtanĩa mũno kũtetheesya mũmanyĩwʼa ũmwe wa Mbivilia nginya avatiswa. Ngelekanyʼo isu sya tene na sya matukũ aa syĩtũmanyĩsya kyaũ? Athũkũmi asu aĩkĩĩku mayaakwatwa nĩ ũtulu kana makasiĩĩa kwʼoko kwoo, na Yeova nĩwaathimie wũmĩĩsyo woo. Kwoou ekai tũatĩĩe “ngelekanyʼo ya ala makwataa mawatho nũndũ wa mũĩkĩĩo na wũmĩĩsyo.”​—⁠Aevl. 6:​10-12.

ENDEEEA KWĨTHĨWA NA MŨĨKĨĨO MŨLŨMU

15. Mũĩkĩĩo ũtũtetheeasya ata kwĩthĩwa na kĩthito kingĩ ũtavanyʼanĩ?

¹⁵ Nĩtũĩkĩĩe vyũ ũvoo ũla tũtavanasya, na nũndũ wa ũu, nĩtwĩthĩawa na wendi mwingĩ wa kũneena na andũ aingĩ ũndũ vatonyeka. Nĩkĩ tũĩkĩĩe ũvoo ũsu? Nũndũ twĩ na mũĩkĩĩo kana mawatho ala me Ndetonĩ ya Ngai nĩ ma wʼo. (Sav. 119:42; Isa. 40:⁠8) Nĩtwonete wathani mwingĩ wa Mbivilia ũianĩa ĩvindanĩ yĩĩ yitũ. O na nĩtwonete andũ maialyũla mwĩkalĩle woo matũmĩa ũtao ũla wĩ Mbivilianĩ. Maũndũ asu matũĩkĩĩthasya vyũ kana kĩla mũndũ nĩwaĩlĩte kũnengwa mwanya wa kwĩwʼa ũvoo mũseo wa Ũsumbĩ.

16. Kwosana na Savuli 46:​1-3, kũmũĩkĩĩa Yeova na Yesũ kũtũtetheeasya ata kũtavanyʼa na kĩthito?

¹⁶ O na ĩngĩ, nĩtũmũĩkĩĩe Yeova, ũla nĩwe ũtũnengete ũvoo ũla tũtavanasya, na nĩtũmũĩkĩĩe Yesũ, ũla Yeova wamũtwʼĩkĩthisye Mũsumbĩ wa Ũsumbĩ wake. (Yoa. 14:⁠1) Nĩtwĩsĩ o na twakwatwa nĩ maũndũ mailye ata, Yeova akeethĩawa wĩvitho na vinya witũ. (Soma Savuli 46:​1-3.) Na eka ũu, twĩ na mũĩkĩĩo kana Yesũ nĩwe ũtongoesye wĩa wa kũtavanyʼa e ĩtunĩ, atũmĩĩte vinya na ũkũmũ ũla Yeova ũmũnengete.​—⁠Mt. 28:​18-20.

17. Nengane ngelekanyʼo ĩkwonanyʼa nĩkĩ twaĩlĩte kũendeea kũtavanyʼa.

¹⁷ Mũĩkĩĩo nũtumaa twĩthĩwa tũte na nzika o na vanini kana Yeova nũathimaa kĩthito kitũ, na mavinda amwe ekaa ũu kwa nzĩa tũteĩ tũsũanĩa. (Mũta. 11:⁠6) Kwa ngelekanyʼo, kĩla mũthenya andũ ngili mbingĩ nĩmonaa mesa na tũkalĩ twitũ twa mavuku. Yo nzĩa ĩsu ya kũtavanyʼa yĩ mosyao maseo? Ĩĩ, vyũ! Ũthũkũmi Witũ wa Ũsumbĩ wa Mwei wa 11, 2014, nĩwawetie ĩũlũ wa mwĩĩtu ũmwe wa mũika waĩ yunivasiti na wendaa kũandĩka ũvoo ĩũlũ wa Ngũsĩ sya Yeova. Ndaakwata Nyũmba ya Ũsumbĩ ũtonya kũkwata ũvoo ũsu, ĩndĩ nĩwoonie mesa ya mavuku maitũ sukulu kwoo, na akwata vo ũvoo ũtonya kũtũmĩa kũandĩka maũndũ ala wendaa. Ĩtina, nĩwesie kwĩmanyĩsya na avatiswa, na yu nĩ vainia wa kĩla ĩvinda. Maũndũ ta asu nĩmatwĩkĩaa vinya tũendeee kũtavanyʼa, nũndũ monanasya kana ve andũ matiele me na wendi wa kwĩwʼa ũvoo mũseo wa Ũsumbĩ.

TWʼA VYŨ KŨLEA KŨSIĨĨA KWʼOKO KWAKU

18. Nĩ kyaũ kĩtũĩkĩĩthasya kana wĩa wa kũtavanyʼa ĩũlũ wa Ũsumbĩ ũkathela ĩvinda yĩla Yeova ũvangĩte yavika?

¹⁸ Nĩtwĩsĩ nesa vyũ kana wĩa wa kũtavanyʼa ũkathela ĩvinda yĩla yaĩlĩte yavika. Kwasũanĩa kĩla kyeekĩkie mĩthenyanĩ ya Noa. Yeova oonanisye nesa vyũ kana we nũatĩĩaa nesa ĩvinda yĩla ũtwʼĩte ya kwĩka maũndũ. Myaka ta 120 mbua ya ĩvinda ya Noa ĩtanamba kua, Yeova nĩwatwie ĩkambĩĩa ĩndĩĩ. Myaka mingĩ ĩtina wa Yeova kũtwʼa, nĩweeie Noa ake ngalawa. Nĩvatonyeka ũkethĩa Noa athũkũmie wĩa ũsu na kĩthito vandũ va myaka 40 kana 50. O na kau andũ mayaamwĩthukĩĩsya, we aendeeie kũmanenga ũkanyʼo nginya yĩla Yeova wamwĩie ambĩĩe kũlikya nyamũ ngalawanĩ. Na ĩndĩ ĩvinda yĩla yaĩle yavika, “Yeova amũvingĩa nthĩnĩ.”​—⁠Mwa. 6:3; 7:​1, 2, 16.

19. Tũkaathimwa ata twaema kũsiĩĩa kwʼoko kwitũ?

¹⁹ O mĩtũkĩ, Yeova nũkũmina wĩa wa kũtavanyʼa ĩũlũ wa Ũsumbĩ. Ĩtina wa ũu, akavetanga nthĩ ĩno nthũku ya Satani, na aiete nthĩ nzaũ, ĩla ĩkatũa o ala mamwĩwʼaa. Ĩndĩ ĩvinda yĩu yĩtanavika, ekai tũatĩĩe ngelekanyʼo ya Noa, Avakuki, na angĩ ala mataasiĩĩa kwʼoko kwoo. Na ekai tũendeee kũtavanyʼa tũte kwĩtĩkĩla kũvĩngĩĩswa nĩ kĩndũ, tũendeee kũmĩĩsya, na tũiendeea kũmũĩkĩĩa Yeova vyũ vamwe na mawatho make.