Ĩkũlyo yĩ Laisi Kĩla Mũndũ Ũtonya Kũkũlya

Mary na mũũme, John,a mekalaa nthĩ yĩ andũ aingĩ mathamĩĩe kũu nũndũ wa wĩa maumĩte nthĩ ya Philippines, na nĩmatanĩaa mũno kũmatavya ũvoo mũseo. Ĩvindanĩ ya ũwau wa COVID-19, Mary nĩwambĩĩie kwĩmanyĩsya Mbivilia na andũ mekalaa nthĩ ĩsu o vamwe na angĩ ma nthĩ ingĩ. Ũu watonyekie ata?

Mary akũlasya amanyĩwʼa make ma Mbivilia ũũ, “Nĩwĩthĩwa wĩsĩ mũndũ ũngĩ ũkwenda kwĩmanyĩsya Mbivilia?” Masũngĩa, ĩĩ, amakũlasya, “No ũmbonanyʼe nake?” Kaingĩ kũkũlya ĩkũlyo yĩ laisi ta yĩu nĩkũetae mosyao maseo. Nĩkĩ tũkwasya ũu? Nũndũ mavinda maingĩ andũ ala meũtanĩa maũndũ ala mekwĩmanyĩsya Ndetonĩ ya Ngai nĩmendaa kũelesya andũ moo ma mũsyĩ na anyanya moo maũndũ ala maendeee kwĩmanyĩsya. Veethĩiwe ata ĩtina wa Mary kũkũlya amanyĩwʼa make ĩkũlyo yĩu?

Mũmanyĩwʼa ũmwe wake wĩtawa Jasmin nĩwamũmanyĩthanisye na andũ angĩ ana mendaa kwĩmanyĩsya Mbivilia. Ũmwe woo nĩ Kristine na nĩwatanĩaa mũno kwĩmanyĩsya nginya akũlya Mary memanyĩasye kelĩ kwa kyumwa. Yĩla Mary wamũkũlilye ethĩwa nĩweesĩ mũndũ ũngĩ wendaa kwĩmanyĩsya Mbivilia, amwĩie, “Ĩĩ, nĩngũũmanyĩthanyʼa na anyanyawa.” Ĩtina wa syumwa mbũthũ, Kristine nĩwamanyĩthanisye Mary na anyanyae ana, ala mendaa kwĩmanyĩsya Mbivilia. O na ĩtina, nĩwamũeteie anyanyae angĩ, ala o namo mamũtetheeisye kũmanyana na andũ angĩ mendaa kwĩmanyĩsya Mbivilia.

O na ĩngĩ, Kristine nĩwendaa andũ make ma mũsyĩ, ala maĩ Philippines, o namo memanyĩsye Mbivilia. Kwoou nĩwaneenie na mwĩĩtu wake wĩtawa Andrea. Mbeenĩ, Andrea asũanĩaa ũũ, ‘Ngũsĩ sya Yeova nĩ ndĩni ĩsaanĩtye, maimũĩkĩĩaa Yesũ, na matũmĩaa o maandĩko ma Ũtianĩo Mũkũũ.’ Ĩndĩ ĩtina wa kwĩmanyĩsya savalĩ ũmwe tu, nĩwamanyie kana maũndũ asu wasũanĩaa mayaĩ ma wʼo. Kĩla ĩvinda weemanyĩsya ũndũ mweũ Mbivilianĩ, aasya ũũ asengʼete, “Nũndũ kĩu nĩkyo Mbivilia ĩwetete, no nginya kĩthĩwe kĩ kya wʼo!”

Ĩtina wa ĩvinda, Andrea nĩwamanyĩthanisye Mary na anyanyae elĩ na mũndũ mathũkũmaa ĩmwe, ala o namo mambĩĩie kwĩmanyĩsya Mbivilia. O na ĩngĩ, Mary nĩwesie kũmanya kana ve mũndũ mũka ũmwe ũsyaanĩwʼe na ĩthe wa Andrea wĩtawa Angela na ũtonaa nthĩ, ũla weethukĩĩasya mayĩmanyĩsya. Mũthenya ũmwe, Angela nĩwakũlilye Andrea ethĩwa Mary no ambĩĩe kũmũmanyĩsya Mbivilia. Angela nĩwendie mũno maũndũ ala weemanyĩasya. Mwei ũmwe ũithela, nĩweekĩĩte maandĩko maingĩ kĩlĩkonĩ na nĩwendaa mambĩĩe kwĩmanyĩasya mavinda ana kĩla kyumwa! O na Andrea nĩwamũtetheeisye ambĩĩa kũlikaa maũmbanonĩ ateũtĩĩa atũmĩĩte vulongulamu ya kũtetheesya andũ maneene menene.

Yĩla Mary wamanyie kana mũũme wa Kristine, Joshua, nĩweethukĩĩasya yĩla maendeee kwĩmanyĩsya, nĩwamũkũlilye ethĩwa o nake no ende kwĩmanyĩsya. Joshua amwĩie: “Nyie ngeekaa o kwĩthukĩĩsya, ĩndĩ ndũkatate kũngũlya makũlyo. Wangũlya, nĩĩka kũkĩla nĩthi.” Ĩndĩ ndatĩka itano kuma mambĩĩa kwĩmanyĩsya itanathela, Joshua nĩwakũlilye makũlyo maingĩ o na kwĩ ala Kristine wakũlilye na nĩwendaa maendeee kwĩmanyĩsya.

Mary nĩwakwatie amanyĩwʼa aingĩ ma Mbivilia atũmĩĩte ĩkũlyo yĩu yĩ laisi. Nĩweekie mĩvango nĩ kana amwe moo memanyĩasye Mbivilia na ana-a-asa na eĩtu-a-asa angĩ. Onthe ala wambĩĩie kwĩmanyĩsya namo nĩ andũ 28 me nthĩ inya syĩ kĩvathũkanyʼo.

Jasmin, ũla nĩwe mũmanyĩwʼa wa mbee katĩ wa ala mawetetwe ngewanĩ ĩĩ, avatisiwe Mwei wa 4, 2021. Nake Kristine avatisiwe Mwei wa 5, 2022 na asyoka kwoo Philippines. Eka ũu, amanyĩwʼa angĩ elĩ ala mambĩĩie kwĩmanyĩsya ĩtina wa Kristine kũmamanyĩthanyʼa na Mary nĩmavatisiwe. Ũngĩ nĩ Angela, ũla wavatisiwe myei mĩvũthũ ĩtina wa Kristine kũvatiswa, na oyu nĩ vainia wa kĩla ĩvinda. Nake Joshua ũla nĩ mũũme wa Kristine, mwĩĩtu woo ũla wĩtawa Andrea, na amanyĩwʼa angĩ kauta nĩmaendee kwĩmanyĩsya na nĩmekĩte maendeeo.

Ĩvindanĩ ya atũmwa, ũvoo mũseo nĩwanyaĩĩkaa na mĩtũkĩ nũndũ ala meemanyĩsya nĩmamanyĩasya andũ moo ma mũsyĩ na anyanya moo. (Yoa. 1:​41, 42a; Meko 10:​24, 27, 48; 16:​25-33) Wĩona ata ũkakũlya amanyĩwʼa maku ma Mbivilia na angĩ ala mekwendeewʼa ũũ, “Nĩwĩthĩwa wĩsĩ mũndũ ũngĩ ũkwenda kwĩmanyĩsya Mbivilia?” Kwa kũkũlya ĩkũlyo o yĩĩ yĩ laisi, tũyĩsĩ nĩ andũ meana ata matonya kwambĩĩa kwĩmanyĩsya Mbivilia.