Ũndũ Ũtonya Kũtũmĩa ‘Mũthĩnzĩo wa Kĩ-veva’ Ũla wĩ Nawʼo

Ithyonthe nĩtũtanĩaa kwĩkĩana vinya na ana-a-asa na eĩtu-a-asa maitũ yĩla twĩ vamwe namo. Ĩndĩ ve maũndũ maingĩ tũtonya kwĩka tũkekĩana vinya eka o kwĩthĩwa twĩ vamwe. Mbivilia yĩtĩte ũtonyi witũ wa kũlũlũmĩĩlya mũĩkĩĩo wa ala angĩ ‘mũthĩnzĩo wa kĩ-veva.’ (Alo. 1:​11, 12) Tũtonya kũtũmĩa mũthĩnzĩo ũsu ata?

Tũmĩa ndeto nzeo sya kwĩkĩa angĩ vinya. Kwa ngelekanyʼo, yĩla tũkumya maelesyo maũmbanonĩ, tũyaĩle kũneena mũno ĩũlũ witũ ene. Vandũ va ũu, twaĩle kũtũnga kĩlĩko maũndũnĩ ala twĩmanyĩĩtye kuma kwa Yeova, Ndeto yake, na andũ make. Na yĩla tũkũea ngewa na athaithi ala angĩ, twaĩle kũneenea maũndũ ma kwaka.

Ĩkĩa ala angĩ vinya kwĩsĩla motwi na meko maku. Kwa ngelekanyʼo, amwe nĩmatwʼĩte kũendeea na ũthũkũmi wa ĩvinda yonthe o na kau nĩmaendeee kũmĩanĩsya na mathĩna. Namo angĩ nĩmaendaa ũmbano wa katĩkatĩ wa kyumwa mateũtĩĩa o na kau methĩawa makwatene mũno wĩanĩ kana me na mathĩna manene ma mwĩĩ.

Mo meko maku na ndeto syaku nĩsyĩkĩaa vinya ana-a-asa na eĩtu-a-asa maku? Na we nũekaa maũndũ ala mawetaa na kwĩka makwĩkĩe vinya?