Makũlyo Kuma kwa Asomi Maitũ

Nĩ ‘kĩsũanĩo’ kĩva Yeova ũkilyĩ kwĩkĩa ngoonĩ sya mbaĩ?

Ĩandĩko ya Ũvuanyʼo 17:​16, 17 yaĩtye ũũ yĩineenea kwambĩĩa kwa ũla thĩna mũnene: “Mbya ĩkũmi ila wonie vamwe na ĩla nyamũ ya kĩthekanĩ, ikamena yĩla ĩlwaya na kũyĩvena syĩndũ syayo syonthe na kũyĩtia yĩ ĩthei, na ikaya nyama syayo na kũyĩvĩvya vyũ na mwaki. Nĩkwĩthĩwa Ngai nĩwĩkĩĩte ngoonĩ syoo mũvango wa kwĩka kĩla ũsũanĩĩte, ĩĩ, syĩke kwosana na kĩsũanĩo kyoo kĩmwe kwa kũnenga ĩla nyamũ ya kĩthekanĩ ũsumbĩ wasyo.” Navu tene, mavuku maitũ manaasya kana ‘kĩsũanĩo’ kĩla Yeova ũkekĩa ngoonĩ sya mbaĩ nĩ kya kwananga ndĩni sya ũvũngũ.

Ĩndĩ ve na vata wa kwĩka ũalyũku. ‘Kĩsũanĩo’ kĩla Yeova ũkekĩa ngoonĩ sya mbaĩ nĩ kya kũnenga “ĩla nyamũ ya kĩthekanĩ ũsumbĩ wasyo.” Nĩ kana tũelewe ũndũ kĩu kĩkeanĩa, ekai tũneenee makũlyo aa maatĩĩe.

Naaũ maneenewe wathaninĩ ũsu? “Yĩla ĩlwaya,” yĩla noyo yĩtĩtwe “Mbaviloni Ĩla Nene,” yonanasya ndĩni syonthe sya ũvũngũ. Nayo ĩla “nyamũ ya kĩthekanĩ ndune mũno” yonanasya ngwatanĩo ya kũete mũuo ĩũlũ wa nthĩ ĩla yambĩĩiwʼe mwakanĩ wa 1919 yeetawa Wovano wa Mbaĩ, na oyu yĩtawa Ngwatanĩo ya Nthĩ. (Ũvu. 17:​3-5) Nasyo ila “mbya ĩkũmi” syonanasya silikalĩ syonthe ila ikwataa mbau nyamũ ĩsu ya kĩthekanĩ.

Nĩ ngwatanĩo yĩva yĩthĩawa vo katĩ wa yĩla ĩlwaya na ĩla nyamũ ya kĩthekanĩ ndune mũno? Yĩla ĩlwaya yĩthĩĩtwe ‘yĩkalĩle’ ĩla nyamũ ya kĩthekanĩ, na ũu nĩ kwasya, nĩyĩathimaa nyamũ ĩsu na yĩkalikĩlĩĩla ũtongoi wayo yĩyenda kũmĩsumbĩka.

Nĩ kyaũ kĩkakwata ĩlwaya yĩu? Ĩla nyamũ ya kĩthekanĩ o vamwe na ila mbya ĩkũmi imĩkwataa mbau “ikamena yĩla ĩlwaya.” Nũndũ wa ũu, ikayĩvena ũthwii wayo wʼonthe na iivuanyʼa ũvuku wayo. Na ĩtina wa ũu, ikeanĩsya ũsilĩlo wa Yeova kwa kwananga ĩlwaya yĩu vyũ. (Ũvu. 17:1; 18:8) Ũsu nĩwʼo ũkethĩwa mũthya wa ndĩni sya ũvũngũ. Ĩndĩ kĩu kĩtanamba kwĩkĩka, Yeova akatuma mbaĩ syĩka kĩndũ kĩtaaĩkĩka kuma andũ mambĩĩa kwĩsumbĩka.

Yeova akatuma mbaĩ syĩka ata? Akeekĩa ‘kĩsũanĩo’ kyake ngoonĩ sya ila mbya ĩkũmi, nakyo nĩ “[kũnenga] ĩla nyamũ ya kĩthekanĩ [ndune mũno] vinya na ũkũmũ woo.” Nyamũ ĩsu noyo Ngwatanĩo ya Nthĩ. (Ũvu. 17:13) Ĩndĩ yo kĩu kĩonanyʼa ata? Syo silikalĩ sya andũ nĩsyo iketwʼĩĩa kũnenga nyamũ ĩsu ya kĩthekanĩ vinya na ũkũmũ wasyo? Aiee! Wathani wonanĩtye kana Ngai mwene nĩwe ũkatuma syĩka ũu. (Nth. 21:1; sianĩsya na Isaia 44:28.) Ĩndĩ wʼo ũndũ ũsu ũkeekĩka o kavola kwa kavola? Aiee! Ũwʼo nĩ kana ũkeekĩka na mĩtũkĩ tũtataĩĩe. Ĩtina wa nyamũ ĩsu ya kĩthekanĩ kũnengwa ũkũmũ, ĩkeanĩsya ũsilĩlo wa Yeova ĩũlũ wa ngwatanĩo sya ndĩni sya ũvũngũ kwa kũsyananga vyũ itakoneka ĩngĩ.

Kwoou nĩ ũndũ wĩva tweteele kwona ũyĩkĩka? Tũi na vata wa kũtinda tũatĩanĩe na livoti sya maũvoo twone ethĩwa silikalĩ niendeee o kavola kwa kavola kũkwata mbau Ngwatanĩo ya Nthĩ. Kĩla tweteele kwona nĩ kĩĩ: Tũtataĩĩe, Yeova akeekĩa kĩsũanĩo ngoonĩ sya mbaĩ nĩ kana inenge ĩla nyamũ ya kĩthekanĩ ũkũmũ wasyo. Yĩla kĩu kĩkekĩka, tũkamanya kana ũla thĩna mũnene ũkilyĩ kwambĩĩa. Ĩndĩ kwa oyu, ekai “twĩkale twĩ metho na tũisũvĩa ilĩko sitũ” nũndũ o mĩtũkĩ nĩkũkwĩthĩwa na moalyũku maingĩ!—1 Ath. 5:6.