Ũtethyo Kwondũ wa Aka Ala Maaĩkwa Maũndũ Mathũku

Isu nĩsyo ndeto ila syĩ mwambĩĩonĩ wa kĩlungu kĩ nthĩnĩ wa jw.org/kam kĩ na kyongo, “Woni wa Mbivilia Ĩũlũ wa Kũsũvĩa Aka.” Mũthyanĩ wa kĩlungu kĩu, ve link ũtonya kũtũmĩa ũkaumya na kũtumbĩthya kathangũ kau. Wakatumbĩthya nũtonya kũkakũnza ta tulakiti ya mathangũ ana. Mwĩĩtu-a-asa wĩkalaa Amelika wĩtawa Stacy aĩtye, “Nĩnatumbĩthisye tulakiti kauta na nĩ na mwĩĩtu-a-asa ũngĩ twaitwaa nyũmbanĩ ĩmwe yĩ kĩsionĩ kĩla kĩkundi kitũ kyaaĩwe kũtavanyʼa ĩtũmĩawa kũsũvĩa aka ala maumĩte kwoo nũndũ wa kwĩkwa maũndũ mathũku kana o maũndũ angĩ ta asu.”

Mũthũkũmi ũmwe wa vau nĩwamakũlilye ethĩwa no mamũnenge tulakiti mbingangĩ nĩ kana ethĩwe atonya kũaĩa ala mekalaa nyũmbanĩ ĩsu. Nũndũ wa ũu, eĩtu-a-asa asu nĩmamũnengie tulakiti ingĩ 40 o vamwe na kaati 30 sya kwelekelya andũ kĩsesenĩ kya jw.org. Yĩla eĩtu-a-asa asu mesie kũsyoka, ũla waũngamĩe maũndũ nyũmbanĩ ĩsu nĩwamakũlilye monyʼe aka ala mekalaa vau ũndũ twĩmanyĩasya Mbivilia na andũ.

Stacy na eĩtu-a-asa angĩ elĩ nĩmeeyoneie kĩu yĩla maendie nyũmbanĩ ĩngĩ ta ĩsu, na ĩtina wa kũnengane tulakiti itano makũlwʼa mongele ingĩ. Mũthũkũmi ũmwe ameie ũũ, “Kavuku kaa nĩkeũtetheesya aka ala mekalaa vaa.” Ongelile kwasya, “Kĩĩ nĩkyo tũkwenda.” Yĩla eĩtu-a-asa asu mesie kũsyoka, aka kauta nĩmoombanie vamwe nĩ kana monwʼe ũndũ twĩmanyĩasya Mbivilia na andũ, na elĩ katĩ woo nĩmaisye kana nĩmekwenda kũka maũmbanonĩ wikendi ũla waatĩĩe Nyũmbanĩ ya Ũsumbĩ.

Stacy aĩtye: “Nĩtũsengʼetwʼe mũno nĩ ũndũ andũ mekwendeewʼa nĩ kĩlungu kĩĩ. Yĩla watumbĩthya tulakiti ĩsu na wamĩkũnza, no ũmĩtũmĩe kũtavya aka ala makuawa naĩ ũvoo wa Ũsumbĩ. Nĩtwatanĩthiwʼe mũno nĩ kwona ũndũ andũ meetĩkĩlile ũvoo ũla twamatavasya, na twĩ na mea ma kwona ũndũ Yeova ũkũathima kĩthito kitũ kya kũendeea kũtavya andũ ta asu ũvoo mũseo.”