Endeeai “Kwĩthĩwa na Ũũmwe wa Veva”
MŨTŨMWA Vaũlo athuthisye Aklĩsto ma Eveso maendeee “[kũmĩanĩsya] ene kwa ene wendonĩ, na [maitata] mũno kũendeea kwĩthĩwa na ũũmwe wa veva nthĩnĩ wa ngwatanĩo ya mũuo.”—Avs. 4:2, 3.
“Ũũmwe,” kana ngwatanĩo ĩla tũtanĩaa yĩthĩawa vo nũndũ “wa veva.” Ũu wĩonanyʼa kana ngwatanĩo ĩsu nĩ ũsyao wa veva mũtheu wa Ngai. Ĩndĩ o tondũ Vaũlo wawetie, kĩthito nĩkyendekaa nĩ kana ngwatanĩo ĩsu ĩendeee kwĩthĩwa vo. Nũũ waĩle kwĩkĩa kĩthito? Vate nzika, no nginya kĩla Mũklĩsto eanĩsye kĩanda ĩ kyake kya kũĩkĩĩthya nĩvethĩwa na “ũũmwe wa veva.”
Kwa ngelekanyʼo, twasye mũndũ mũna nĩwaũthooea ngalĩ. Nũũ wĩthĩawa na kĩanda kya kũmĩsũvĩa? Ũsũngĩo wĩ ũtheinĩ. Ndwĩsa kũtũla mũtĩ mũndũ ũsu ethĩwa ngalĩ ĩsu nĩyaanangĩka nũndũ ndũneemĩsũvĩa.
O ta ũu, o na kau ngwatanĩo yitũ ya Kĩklĩsto nĩ mũthĩnzĩo tũnengetwe nĩ Ngai, kĩla ũmwe witũ nĩwaĩle kũmĩsũvĩa. Ethĩwa tũi na ngwatanĩo nzeo na mwana-a-asa kana mwĩĩtu-a-asa, twaĩle kwĩkũlya-ĩ, ‘Nĩndatĩte ũndũ ndonya nĩthĩwe na ũũmwe wa veva kwa kũtata nĩwʼane nake?ʼ
‘TATAI MŨNOʼ MŨENDEEE KWĨTHĨWA NA NGWATANĨO
O tondũ Vaũlo waandĩkie, mavinda amwe no tũlasimĩke kwĩkĩa kĩthito kingĩ nĩ kana tũendeee kwĩthĩwa na ũũmwe wa veva. Na no vethĩwe vailye ũu mũno mũno ethĩwa ve mwana-a-asa kana mwĩĩtu-a-asa ũtũvĩtĩsye. Ĩndĩ kwʼo kũendeea kwĩthĩwa na ngwatanĩo nĩ kwasya kana kĩla ĩvinda twavĩtĩwʼa twaĩle kũthi kũneenea ũndũ ũsu na ũla ũtũvĩtĩsye? Ti nginya twĩke ũu. Ĩkũlye-ĩ, ‘Kwʼo kũneenea ũndũ ũũ kwĩete mũuo-ĩ kana kwĩĩka kwanangĩĩa maũndũ?’ Mavinda amwe, wĩthĩaa nĩ kavaa ũkaema kũtindanĩa na ũndũ ũsu na ũitwʼa kũekea ũla ũkũvĩtĩsye.—Nth. 19:11; Mlko. 11:25.
Ĩkũlye-ĩ, ‘Kwʼo kũneenea ũndũ ũũ kwĩete mũuo-ĩ kana kwĩĩka kwanangĩĩa maũndũ?
O tondũ mũtũmwa Vaũlo waandĩkie, ekai tũendeee “[kũmĩanĩsya] ene kwa ene wendonĩ.” (Avs. 4:2) Ĩvuku yĩmwe yĩeleetye Mbivilia yaĩtye kana mũsoa ũũ no ũalyũlwe ta “kwosa angĩ o ũndũ mailye.” Ũu wĩonanyʼa kwĩtĩkĩla kana athaithi ala angĩ no andũ me na naĩ, o taitũ. Nĩ wʼo kana nĩtũendeee “kwĩvwʼĩka mwĩkalĩle mweũ.” (Avs. 4:23, 24) O na vailye ũu, vai ũmwe witũ ũtonya kwĩka ũu ateũvĩtanyʼa. (Alo. 3:23) Ethĩwa nĩtũkwĩtĩkĩlana na ũwʼo ũsu, vakeethĩawa ve laisi kwitũ kũmĩĩsya ala angĩ na kũmaekea, na nũndũ wa ũu, tũkaendeeaa “kwĩthĩwa na ũũmwe wa veva.”
Yĩla twaekea ala angĩ na twoolwa nĩ maũndũ ala mekĩte makatũũmĩsya o na tũteũthi kũneena namo ĩũlũ wa ũndũ ũsu, nĩtũendeeaa kwĩthĩwa na “ngwatanĩo ya mũuo.” Ndeto ya Kĩkiliki ĩla ĩalyũlĩtwe “ngwatanĩo” nthĩnĩ wa Aeveso 4:3 ĩalyũlĩtwe ta “malangũ” nthĩnĩ wa Akolosai 2:19. Malangũ nĩ makono malũmu ala makwatanasya ĩvĩndĩ yĩmwe na yĩla yĩngĩ. O ta ũu, kwĩthĩwa na mũuo na ana-a-asa maitũ na kũmenda nĩkũtũtetheeasya kwĩkalanyʼa namo nesa o na kau nĩtũtonya kũvĩtũũkana.
Kwoou yĩla mũthaithi ũngĩ wakũũmĩsya, waũthatya, kana watuma ũthilĩka, tataa kũmwĩwʼĩa ĩnee vandũ va kwona o maũndũ mathũku ala wakwĩka. (Aks. 3:12) Na nũndũ ithyonthe twĩ ene naĩ, o naku nũtonya kwĩthĩwa ve ĩvinda waũmĩisye mũndũ ũngĩ. Kũlilikana ũndũ ũsu kũkaũtetheeasya wĩanĩsye kĩanda i kyaku kya kũĩkĩĩthya nĩtwaendeea “kwĩthĩwa na ũũmwe wa veva.”