Mboya sya Mũndũ Mũka Ũmwe Kĩlalinda Nĩsyasũngĩiwe

Mũthenya ũmwe, mũndũ mũka ũmwe Ngũsĩ kuma nthĩ ya Asia wĩtawa Yanmei nĩweeyumisye kũtetheesya mũndũ mũka kĩlalinda wĩtawa Mingjie kũkĩlanĩlya lelũ.a Mingjie amina kũtetheewʼa amwĩie: “Nĩ mũvea. Ngai nakũathime!” Ĩtina wa ũu, Yanmei nĩwamũkũlilye Mingjie ethĩwa no ende makomane maneenee Mbivilia vamwe. Mingjie esie kũmwĩa kana eethĩĩtwe aivoya kĩla mũthenya nĩ kana akwate Aklĩsto ma wʼo. Nĩkĩ wavoyaa ũndũ ũsu?

Mingjie aeleisye kana mwakanĩ wa 2008, mũnyanyae ũmwe kĩlalinda nĩwamũthokisye ĩkanisanĩ yĩmwe yĩtetheeasya andũ ala methĩawa na mawonzu ma mwĩĩ. Ĩtina wa kwĩthukĩĩsya ũtavanyʼa, Mingjie nĩwakũlilye mũthembi nĩ ĩvuku yĩva watũmĩaa. Amwĩie kana atũmĩaa Mbivilia, ĩla nĩyo Ndeto ya Ngai ya wʼo. Mingjie nĩweendeeiwʼe mũno nĩ kũmĩsoma. Kwoou nĩwamanthie Mbivilia ya mũandĩko wa ala matonaa ya kĩthyomo kya Chinese, ĩla yumĩĩwʼe mavukunĩ manene 32. Amasomie onthe kwa ĩvinda ya vakuvĩ myei thanthatũ. O ũndũ waendeeie kũsoma Mbivilia, nĩwamanyie kana ũmanyĩsyo wa Ũtatũ ũla wamanyĩawʼa kanisanĩ woo nĩ wa ũvũngũ, na kana Ngai etawa Yeova.

Ĩtina wa ĩvinda, Mingjie nĩwatũlĩkile ngoo nũndũ wa kwona mwĩkalĩle wa athaithi ma kanisa ũsu. Nĩwamanyie kana mayekalaa kwosana na kĩla wasomaa Mbivilianĩ. Kwa ngelekanyʼo, ala mataĩ ilalinda manengawe lĩu ũla mũseo, ĩndĩ ala ilalinda manengawe matialyo. Ũndũ ũsu nĩwamũthatisye mũno, na kwoou ambĩĩa kũmantha makanisa angĩ kĩsionĩ kyoo. Kĩu nĩkyo kyatumaa avoya nĩ kana akwate Aklĩsto ma wʼo.

Mingjie nĩweetĩkĩlile kũmanyĩwʼa Mbivilia nĩ Yanmei nũndũ wa kĩu wamwĩkie. Ĩtina, Mingjie nĩwaendie maũmbanonĩ ma Ngũsĩ sya Yeova kwa ĩvinda ya mbee. Aĩtye: “Ndikolwa nĩ ũmbano wa mbee ũla naendie. Ana-a-asa na eĩtu-a-asa onthe mangethisye me atanu. Neewie nakiitwa ngoo mũno. O na kũtwʼĩka nyie nĩ kĩlalinda, nĩnamanyie kana mo me wendo ũte kyende.”

Mingjie nĩwaendeeie kwĩka maendeeo na ambĩĩa kũendaa maũmbanonĩ ateũtĩĩa. Nĩwatanĩaa kwina mbathi sya Ũsumbĩ, ĩndĩ waĩ ũndũ wĩ vinya kwake nũndũ ndaĩ na ĩvuku ya mbathi ya mũandĩko wa ala matonaa. Nũndũ wa ũu, Mingjie nĩwaseũvisye ĩvuku yake ya mbathi atetheewʼe nĩ ana-a-asa na eĩtu-a-asa kĩkundinĩ. Atũmĩie masaa 22 kũandĩka mbathi syonthe 151! Mweinĩ wa 4, 2018, Mingjie nĩwatwʼĩkie mũtavanyʼa, na kĩla mwei atavanasya masaa ta 30.

Nĩ kana Yanmei amũtetheesye kwĩyũmbanĩsya ũvatiso, nĩweelekootie aisoma makũlyo asu vamwe na mĩsoa ya Mbivilia ĩla yĩ ĩvukunĩ Tengenezo Linalofanya Mapenzi ya Yehova. Twĩ Mwei wa 7, 2018, Mingjie nĩwavatisiwe. Aĩtye: “Neewie nakiitwa mũno nĩ wendo ũla ana-a-asa na eĩtu-a-asa mambonisye ũmbanonĩ ũsu mũnene. Natanie mũno nginya nambĩĩa kũĩa, nũndũ yu naĩ ũmwe wa Aklĩsto ma wʼo.” (Yoana 13:34, 35) Ũmũnthĩ Mingjie nĩ mũtavanyʼa wa ĩvinda yonthe, na nũtwʼĩte kwonyʼa angĩ kana nũmendete o ũndũ we wooniwʼe nĩwendetwe.