Tetheesya Ala Matonaa Memanyĩsye Ĩũlũ wa Yeova

1. Yesũ oonanisye ata kana nĩwamewʼĩaa tei andũ ala matonaa?

¹ Ĩvinda yĩmwe Yesũ aumĩte mũsyĩ wa Yeliko, vatiele o mĩthenya mĩnini oawe, nĩwakomanie na ililinda ilĩ na syamwĩta na wasya mũnene iyasya: “Mwĩaĩi, twĩwʼĩe tei.” O na kau maũndũ ala meeteele kũmũkwata maĩ maito, nĩwaũngamie na eeta aũme asu na amavosya. (Mt. 20:29-34) Tũtonya ata kũatĩĩa ngelekanyʼo ya Yesũ ya ũndũ weewʼĩaa tei andũ ala matonaa?

2. Tũtonya ata kũmũtavya ũvoo mũseo mũndũ ũtonaa ĩla twakomana nake kũndũ kwĩ andũ aingĩ?

² Matetheesye: Ĩla wakomana na mũndũ ũtonaa, ta kwa ngelekanyʼo, vandũ ve andũ aingĩ, mũtavye nue ũũ na ũimũtetheesya. Nũndũ andũ asu nĩmakuawa naĩ nĩ andũ ala angĩ, mwambĩĩonĩ no ethĩwe na nzika naku. Ĩndĩ weethĩwa na ũnyanya na ũyendeewʼa nĩwe, no ewʼe e mwĩanĩe. Kũlilikana kana kwĩ andũ monaa o vanini, na angĩ matonaa o na vanini, no kũũtetheesye kũmanya ũtethyo ũla ũtonya kũmanenga. Wamina kũmũtetheesya, no ũmũtavye kana ũmanyĩasya andũ Mbivilia. Mũsomee maandĩko ta Savuli 146:8 kana Isaia 35:5, 6. Ethĩwa mũndũ ũsu nĩwĩsĩ kũsoma kĩthyomo kya ala matonaa, mũkũlye kana no endeewʼe nĩ mavuku ma kĩthyomo kĩu nĩ kana emanyĩsye Mbivilia. O na no ũmũtetheesye akakwata ũvoo ũsometwe na wasya kuma kĩsesenĩ kya jw.org. Ethĩwa kombiũta yake no ĩsome na wasya syĩndũ ila syĩkĩĩtwe vo, no endeewʼe mũno nĩ kwĩthukĩĩsya ũvoo ũla wĩ kĩsesenĩ kya jw.org o vamwe na mavuku ala matonya kumwʼa kwa nzĩa ya RTF (Rich Text Format).—Sisya ĩsandũkũ “Ĩla Ũũtetheesya Mũndũ Ũtonaa . . .”

3. Tũtonya ata kũmantha andũ ala matonaa kĩsionĩ kitũ?

³ Mantha Ala Matonaa: Mavinda maingĩ tũikomanaa na andũ ala matonaa ĩla tũũtavanyʼa nyũmba na nyũmba, nũndũ aingĩ moo nĩmakĩaa kũneena na andũ matamesĩ. Kwoou, nĩvendaa kĩthito ‘kũmantha’ andũ asu nĩ kana tũmatavye ũvoo. (Mt. 10:11) Ve mũndũ ũthũkũmaa nake kana ũsomaa nake ũtonaa? Osa ĩtambya ya kũneena nake mbee. Ethĩwa kĩsionĩ kyenyu ve sukulu ya ala matonaa, matwaĩe mavuku ma kĩthyomo kya ala matonaa nĩ kana maiwe vala mavuku ma sukulu maiawa. Nĩwĩsĩ mũndũ wĩ mũndũ woo wa mũsyĩ ũtonaa? Kĩsionĩ kyenyu ve mĩvango ya kũtetheesya andũ ala matonaa kana ya kũmanenga vandũ va kwĩkala? Ethĩwa ũu nĩwʼo vailyĩ, mũelesye mũndũ ũsu wa mũsyĩ, kana ũla ũũngamĩe mũvango ũsu wa kũtetheesya ala matonaa, kana Ngũsĩ sya Yeova nĩsyendeeawʼa nĩ kũtetheesya ala matonaa, mũtavye kana no ũmũetee mavuku ma kĩthyomo kya ala matonaa vamwe na ũvoo wa kwĩthukĩĩsya. Mwonyʼe watho wa Mbivilia kana o mĩtũkĩ Ngai nũkũveta vyũ thĩna wa kwaa metho. O na no ũmwonyʼe vitio kuma kĩsesenĩ kya jw.org yĩ na kyongo “Without It, I Would Feel Lost,” ĩla yĩeleetye ĩũlũ wa mũndũũme ũmwe ũtonaa, watethiwʼe nĩ Mbivilia ya kĩthyomo kya ala matonaa. Waelesya kĩtumi kya kũmathokea, no ũkwate mwanya wa kũneena na andũ ala matonaa.

4. Tũtonya kwĩmanyĩsya kyaũ kumana na ngelekanyʼo ya Janet?

⁴ Mwĩĩtu-a-asa ũmwe ũtonaa wĩtawa Janet nĩwaendie nyũmba ĩmwe yekalaa andũ matonaa. Nĩwambĩĩie kũneena na mũndũ mũka ũmwe wa mũika. Janet amũtavisye kana, “Yesũ nĩwavoisye ala matonaa nĩ kana onanyʼe ũndũ ĩvinda yũkĩte ũkaveta thĩna wa kũlea kwona.” Nĩmasomie vamwe ĩandĩko ya Ũvuanʼyo 21:3, 4 na Janet amũelesya ũndũ Ũsumbĩ wa Ngai ũkeanĩsya maũndũ asu. Mũndũ mũka ũsu avindisye kwa kavinda na amwĩa: “Ndyaaĩwʼa ndeto ta isu ineenetwe nĩ mũndũ ũtonaa. Andũ aingĩ ala monaa nthĩ masũanĩaa kana andũ ala matonaa makwatiwe nĩ thĩna ũsu nũndũ wa ũndũ meekie, kana weekiwe nĩ aaũmae moo.” Janet amũtũmĩie ũvoo ũtonya kũmũtetheesya kũkwata ĩvuku Mbivilia Ĩmanyĩasya, indanetinĩ na yu memanyĩasya Mbivilia kelĩ kwa kyumwa.

5. O na kau tũyĩsa kũvosya ala matonaa o tondũ Yesũ weekie, kwendeewʼa nĩmo kũtonya kũete moathimo maũ?

⁵ Vate nzika, tũyĩsa kũvosya andũ ala matonaa o tondũ Yesũ weekie, ĩndĩ no tũmatetheesye ala ilĩko syoo syaĩtwʼe nĩ ngai ya nthĩ ĩno, o vamwe na ala matonaa nthĩ nĩ kana maelewe ũwʼo wa Ndeto ya Ngai. (2 Ako. 4:4) Yesũ avoisye ala aũme elĩ vakuvĩ na Yeliko nũndũ ‘nĩwamewʼĩie tei.’ (Mt. 20:34) Tweethĩwa tũilyĩ ũu kwa kwendeewʼa nĩ ala matonaa, no tũtanĩe kũtethya amwe makendeewʼa nĩ kwĩmanyĩsya ĩũlũ wa Yeova, ũla ũkavetanga thĩna wa kũlea kwona tene na tene.