Yesũ Nĩwavoisye Mũndũũme Wasyaĩtwe e Kĩlalinda

Mũthenya wa Savato wavikie Yesũ e o Yelusaleme. O aendeee kũtembea ndũanĩ ĩsu e vamwe na amanyĩwʼa make, nĩmoonie mũvoyi waĩ kĩlalinda kuma kũsyawa. Amanyĩwʼa moona mũndũ ũsu mamũkũlilye Yesũ atĩĩ: “Lavai, nũũ ũla weekie naĩ nĩ kana mũndũ ũũ asyawe e kĩlalinda, nĩwe mwene, kana nĩ asyai make?”—Yoana 9:2.

Amanyĩwʼa nĩmatonya kwĩthĩwa masengʼaa ethĩwa mũndũ nũtonya kũvĩtya e ĩvunĩ ya inyia. Yesũ aimasũngĩa ameie atĩĩ: “Ti mũndũ ũũ weekie naĩ o na ti asyai make, ĩndĩ ũu weekĩkie nĩ kana mawĩa ma Ngai matonye kwoneka ũndũnĩ ũsu.” (Yoana 9:3) Kwoou, mũndũ ũsu ndaasyawa e kĩlalinda aĩ nũndũ ve naĩ weekĩte kana yeekĩtwe nĩ asyai make. Ĩndĩ nũndũ wa naĩ ĩla Atamu weekie, andũ onthe nĩ ene naĩ na no masyawe me na mathĩna ma mwĩĩ, ta mũndũ kwĩthĩwa e kĩlalinda. Mũndũ ũsu wasyaĩtwe e kĩlalinda esaa kũtuma Yesũ akwata mwanya wa kwonanyʼa mawĩa ma Ngai, o tondũ weekaa mavinda ala angĩ wavoasya andũ.

Yesũ nĩwakindĩlĩĩle kana nĩwaaĩle kũtethya wĩa wa Ngai na mĩtũkĩ. Aisye atĩĩ: “Nũndũ no nginya tũtethye mawĩa ma Ũla wandũmie kwĩ mũthenya; ũtukũ nĩwũkĩte yĩla vatakethĩwa ve mũndũ ũtonya kũthũkũma. Ĩvinda yĩla nĩ kũũ nthĩ, nyie ninyie kyeni kya nthĩ.” (Yoana 9:4, 5) Vate nzika, vatiele o ĩvinda ĩnini ũtukũ ũvike, kana kwa ndeto ingĩ, Yesũ akwʼe na aithikwa mbũanĩ, vala ũtaĩ esa kwĩka ũndũ o na ũmwe. Ĩndĩ ĩvinda yĩu yĩte ĩviku, Yesũ nĩwe waĩ kyeni kya nthĩ.

Ĩndĩ we Yesũ eekie ata nĩ kana avosye mũndũ ũsu? Atwʼĩlile mata nthĩ na aulua kataka namo. Ĩtina wa ũu nĩwoosie kataka kau amũvaka metho na amwĩa atĩĩ: “Enda ũkathambe ndianĩ ya Siloami.” (Yoana 9:7) Mũndũũme ũsu nĩwaatĩĩie kĩla Yesũ wamũtavisye na kwoou avoa na ambĩĩa kwona. Kwasũanĩa ũndũ weewie mũyo yĩla woonie nthĩ kwa ĩvinda ya mbee thayũnĩ wake!

Atũi ma mũndũ ũsu vamwe na andũ angĩ ala meesĩ kana aĩ kĩlalinda nĩmasengʼie mamwona. Makũlanilye-ĩ: “Ũũ nĩ ũla mũndũ ũnekalaa nthĩ na kũvoya syĩndũ, kana tiwe?” Andũ amwe masũngĩie masya: “Nĩwe.” Ĩndĩ angĩ ala mataĩkĩĩaa masũngĩie masya: “Aiee, ĩndĩ avwʼanene nake.” Nake mũndũ ũsu wavoiwʼe asya: “Ninyie we.”—Yoana 9:8, 9.

Amina kũsũngĩa mamũkũlilye atĩĩ: “Na yu metho maku manasalukilwʼe ata?” Ameie-ĩ: “Mũndũ ũmwe wĩtawa Yesũ anauluile kataka, ambaka metho, na ambĩa, ‘Enda Siloami ũkathambe.’ Nakwa nathi nathamba na nambĩĩa kwona.” Ĩtina wa ũu mamũkũlilye-ĩ: “Mũndũ ũsu aĩ va?” Nake mũndũ ũsu waĩ anavowʼa amasũngĩa amea: “Nyie ndyĩsĩ.”—Yoana 9:10-12.

Andũ asu nĩmoosie mũndũ ũsu na mamũtwaa kũla kwĩ Avalisi, ala o namo mendaa kũmanya kĩla kĩkĩkie nĩ kana ambĩĩe kwona. Mũndũ ũsu eeie Avalisi atĩĩ: “Anambakie kataka metho, na nathamba nambĩĩa kwona.” Avalisi nĩmaaĩle kũtana vamwe na mũndũ ũsu wavoiwʼe. Ĩndĩ vandũ va ũu, amwe moo mambĩĩie kũmũneenea Yesũ naĩ makyasya: “Mũndũ ũsu ndaumĩte kwa Ngai, nũndũ ndakwataa Savato.” Ĩndĩ ve angĩ makũlasya: “Mwĩki wa naĩ atonya kwĩka syama ta ii ata?” (Yoana 9:15, 16) Kwoou nĩkweethĩiwe na mũaanĩko katĩ woo.

Nũndũ Avalisi maĩ na mawoni me kĩvathũkanyʼo ĩũlũ wa ũndũ ũsu, nĩmamũvĩndũkĩie ũla mũndũũme wavoiwʼe na mamũkũlya: “We wĩasya ata ĩũlũ wake nũndũ nue ũsalukilwʼe metho?” Nũndũ mũndũ ũsu ndaĩ na nzika ĩũlũ wa Yesũ eeie Avalisi atĩĩ: “Mũndũ ũsu [Yesũ] nĩ mwathani.”—Yoana 9:17.

Avalisi nĩmaleile kũĩkĩĩa kĩla mũndũ ũsu wamatavisye. Noĩthwa masũanĩaa kana ve kamũvango Yesũ ũvangĩte na mũndũ ũsu nĩ kana makenge andũ. Matwie kana nzĩa ĩla nzeo ya kũmina ũndũ ũsu nĩ kũkũlya asyai ma mũndũ ũla wavoiwʼe kana kwa wʼo eethĩawa e kĩlalinda.