Nĩmatũngie Mũvea Nũndũ wa Valũa Syake

Brooke nĩ ũmwe wa Ngũsĩ sya Yeova ũla wĩkalaa nthĩ ya Amelika. Ivindanĩ ya ũwau wa COVID-19, nĩwatavanasya kwa nzĩa ya kũandĩka valũa. Kwa wʼo, Brooke nĩwaandĩkaa valũa mbingĩ kĩla kyumwa. Ĩndĩ o na vailye ũu, ĩtina wa mwaka ũmwe na nusu nĩwakwie ngoo.Ĩndĩ ivindanĩ yĩu yonthe, no mũndũ ũmwe wasũngĩĩte valũa wake—na akamwĩa kana ndakaasyoke kũmũandĩkĩa valũa ĩngĩ. Brooke nĩwambĩĩie kwona kana kĩthito kĩla weekĩaa kyaĩ o kya mana.

Ĩndĩ ĩtina wa ĩvinda, Kim, ũla o nake nĩ Ngũsĩ ya Yeova na ũthũkũmaa vengi, nĩwatavisye Brooke ĩũlũ wa ũneenanyʼa waĩ nawʼo na kasitoma. Kasitoma ũsu nĩwatavisye Kim kana nĩwakwatie valũa waumĩte kwa ũmwe wa Ngusĩ sya Yeova. Ĩtina, Kim nĩwesie kũmanya kana aneeneaa valũa ũmwe katĩ wa ila Brooke waandĩkaa. Kyumwa kĩla kyaatĩĩe kasitoma ũsu nĩwasyokie ĩngĩ vengi. Aendeee kũneena na Kim nĩwamũkũlilye kana no alike maũmbanonĩ maitũ ala ĩvinda yu meekawa kwĩsĩla vulongulamu ya andũ kũneena menene.

Ĩtina wa kavinda kanini, David, ũla o nake nĩ Ngũsĩ, nĩwatavisye Brooke ĩũlũ wa mũndũ mathũkũmaa ĩmwe ũla o nake wakwatĩte valũa syake. Mũndũũme ũsu nĩwendeeiwʼe mũno kũmanya kana valũa ũsu waandĩkĩtwe na moko. Aisye: “Andũ aingĩ nĩmaĩlĩte kwonanyʼa kana nĩmekwendeewʼa nĩ ala angĩ.” David nĩwatũmĩie mwanya ũsu kũendeea kũmumĩsya ũkũsĩ na amwĩa nũkũmũetee mavuku nĩ kana maendeee kwĩmanyĩsya na nĩweetĩkĩlile e mũtanu.

Ngũsĩ sya Yeova nĩsyĩthĩawa syĩsĩ kana ti mavinda onthe itonya kũmanya kana mbeũ ila syavandie ũtavanyʼanĩ nĩsyameie. (Mũta 11:5, 6) Ĩndĩ o na vailye ũu, maũndũ asu monekete nĩmatumie Brooke akwata vinya ĩngĩ wa kũendeea na wĩa wa kũtavanyʼa.—1Ko 3:6 3.