Tetheka Nĩ Nthembo ya Yesũ
Ĩvinda yĩmwe kĩla mwaka, Ngũsĩ sya Yeova na andũ milioni mbingĩ ala methĩawa mathoketwʼe ĩũlũ wa nthĩ yonthe, nĩmombanaa nĩ kana malilikane kĩkwʼũ kya Yesũ o tondũ watwĩaĩe. (Luka 22:19) Ũmbano ũsu nũtũtetheeasya kũelewa vata wa kĩla Yesũ weekie yĩla waumisye thayũ wake kwondũ wa andũ. O na ĩngĩ ũmbano ũsu nũtũtetheeasya kũelewa ũndũ nthembo yake ĩtonya kũtũtethya yu, na ĩvinda yĩla yũkĩte.—Yoana 3:16.
Wĩthĩwe nũnaendie ũmbanonĩ wa kũlilikana kĩkwʼũ kya Yesũ mwaka ũũ kana ndũneethi, ũtonya kwĩka ata nĩ kana ũtetheke nĩ nthembo ya Yesũ? Yesũ nĩwatũmanyĩisye maũndũ elĩ ma vata twaĩle kwĩka:
1. Ĩmanyĩsye ĩũlũ wa Ngai na Yesũ. Yĩla Yesũ wavoyaa kũla kwĩ Asa wake wa ĩtunĩ, aisye: “Na thayũ wa tene na tene nĩwʼo ũũ, maendeee kũkwata ũmanyi ĩũlũ waku, Ngai ũla wa wʼo weka, na ĩũlũ wa ũla wamũtũmie, nake nĩ Yesũ Klĩsto.”—Yoana 17:3.
2. Ĩka kwosana na kĩla ũkwĩmanyĩsya. Yesũ nĩwakindĩlĩĩile kana nĩtwaĩle kũtũmĩaa momanyĩsyo make thayũnĩ witũ. Kwa ngelekanyʼo, aminĩĩie Ũtavanyʼa wake wa Kĩĩmanĩ kwa kũkatha onthe ala ‘mewʼaa ndeto ila ũneenaa na kũsyĩka.’ (Luka 6:46-48) O na ve ĩvinda yĩngĩ waisye atĩĩ: “Ethĩwa nĩmwĩsĩ maũndũ aa, mwĩ atanu ethĩwa mũkameka.”—Yoana 13:17.
We no wende kwĩmanyĩsya maũndũ maingangĩ ĩũlũ wa Ngai na Yesũ? No wende kũkwata ũtao ũtonya kũũtetheesya kũmanya ũndũ ũtonya kũatĩĩa kĩla ũkwĩmanyĩsya? Vaa ve maũndũ amwe matonya kũũtetheesya wĩke ũu.
Mũvango wa kwĩmanyĩsya Mbivilia
Mũvango witũ wa kwĩmanyĩsya Mbivilia vate ndĩvi, nũtetheesye andũ aingĩ makemanyĩsya Mbivilia na makamanya ũndũ matonya kũtũmĩa kĩla mekwĩmanyĩsya thayũnĩ woo.
Lika kĩsesenĩ kitũ vala vonanĩtye Mũvango Witũ wa Kwĩmanyĩsya Mbivilia na Mwalimũ Vate Ndĩvi, nĩ kana wĩmanyĩsye maũndũ maingangĩ.
Ĩloele vitio Wĩmũthokye Ĩmanyĩsyonĩ Yaku ya Mbivilia, wone ũndũ Ngũsĩ sya Yeova syĩmanyĩasya Mbivilia na andũ.
Maũmbano ma Ngũsĩ sya Yeova
Kelĩ kĩla kyumwa, Ngũsĩ sya Yeova nĩsyũmbanĩaa nyũmbanĩ syoo sya kũthaithĩa ila syĩtawa Nyũmba sya Ũsumbĩ. Maũmbanonĩ asu nĩtwĩmanyĩasya Mbivilia na tũyona ũndũ tũtonya kũtũmĩa momanyĩsyo mayo thayũnĩ witũ.
Kĩla mũndũ ethĩawa e mũthokye kũka maũmbanonĩ asu, kwoou ti lasima wĩthĩwe wĩ Ngũsĩ nĩ kana ũthi. Kwosana na ũndũ maũndũ mailye kĩsionĩ kyenyu, no ũtwʼe kũthi maũmbanonĩ asu Nyũmbanĩ ya Ũsumbĩ kana ũkalika ũtũmĩĩte vulongulamu sya kũmbana twenene (videoconference).
Ĩloele vitio Nĩ Kyaũ Kĩendeeaa Nyũmbanĩ ya Ũsumbĩ? nĩ kana wone maũndũ ala mekawa maũmbanonĩ asu.
Nĩ kana ũmanye vala Ngũsĩ syũmbanĩaa vakuvĩ na kĩsio kyenyu, lika kĩsesenĩ kitũ vala vaandĩkĩtwe Maũmbano ma Kĩkundi ma Ngũsĩ sya Yeova.
Ilungu syĩ kĩsesenĩ na vitio
Ilungu mbingĩ na vitio ila syĩthĩawa kĩsesenĩ kitũ no iũtetheesye ũkemanyĩsya maũndũ maingangĩ ĩũlũ wa momanyĩsyo ma Yesũ na vata wa nthembo yake.
Kwa ngelekanyʼo, nĩ kana wĩmanyĩsye ũndũ ne ũndũ ũtonyeka kĩkwʼũ kya mũndũ ũmwe kĩkatethya andũ milioni mbingĩ, soma ilungu “Yesũ Atangĩĩaa Andũ Ata?” na “Nĩkĩ Yesũ Wathĩniwʼe na Akwʼa?” kana wĩloele vitio Yesũ Akwie Nĩkĩ?