Nũũ Ũla Wambĩlĩĩlye Ndĩni ya Ngũsĩ sya Yeova?

Ngũsĩ sya Yeova sya matukũ aa syambĩĩe mũthyanĩ wa myaka ya 1800. Ĩvinda yĩu nĩwʼo kĩkundi kĩnini kya Amanyĩwʼa ma Mbivilia ala mekalaa vandũ vetawa Pittsburgh, Pennsylvania, nthĩ ya Amelika, kyambĩĩe kũkunĩkĩla Mbivilia nesa kĩatĩĩe walanyʼo mũseo. Masyaanĩasya momanyĩsyo ma makanisa na kĩla Mbivilia ĩmanyĩasya. Kĩla meemanyĩsya makĩandĩkaa mavukunĩ, makasetinĩ ma maũvoo, na ĩkasetinĩ yĩla ũmũnthĩ yĩtawa Mũsyaĩĩsya—Yĩtavanasya Ũsumbĩ wa Yeova.

Ũmwe wa Amanyĩwʼa asu ma Mbivilia, maĩ na ngoo nzeo, eetawa Charles Taze Russell. O na kau Russell nĩwe watongoesye wĩa wa kũmanyĩsya Mbivilia ĩvinda yĩu, na nĩwe waĩ mũandĩki wa mbee wa ĩkaseti wa Mũsyaĩĩsya, we ndaambĩĩsya ndĩni nzaũ. Kĩeleelo kya Russell na asu angĩ meetawa Amanyĩwʼa ma Mbivilia ĩvinda yĩu, kyaĩ kũendeesya momanyĩsyo ma Yesũ, na kũatĩĩa kĩla kyeekawa nĩ kĩkundi kya Kĩklĩsto kya ĩvinda ya atũmwa. Kwoou nũndũ Yesũ nĩwe wambĩĩisye Ũklĩsto, ithyĩ tũĩkĩĩaa nĩwe mwambĩlĩĩlya wa Ngũsĩ sya Yeova.—Akolosai 1:18-20.