“Yo Mbivilia Yaasya Ata Ĩũlũ wa Ũthasyo wa Kwĩnyuvĩa? Ngai Nĩwavangie Kuma Tene Ũndũ Thayũ Waku Ũkethĩwa Ũilyĩ”
Ũndũ Mbivilia yaasya
Ngai onanĩtye nũtũnengete ndaĩa kwa kũtũnenga ũthasyo wa kwĩnyuvĩa vandũ va we mwene kũtũnyuvĩaa kana kũtũamũĩaa maũndũ ala makatũkwataa. Kwoona ũndũ Mbivilia ĩmanyĩasya.
Ngai oombie andũ na mũvwʼano wake. (Mwambĩlĩlyo 1:26) Kĩvathũkanyʼo na nyamũ, ila itatongoeawʼa nĩ kĩlĩko, andũ mavwʼanene na Mũmbi woo kwa kwĩthĩwa matonya kwonanyʼa ndaĩa nzeo ta wendo na ũsili wa katĩ. Na, ta Mũmbi witũ twĩthĩawa na ũthasyo wa kwĩnyuvĩa.
Kwa kĩthimo kĩnene, nithyĩ twĩnyuvĩaa kana nĩtũkwenda twĩtanĩa ĩvinda yitũ yũkĩte. Mbivilia ĩtwĩkĩaa vinya ‘tũnyuve thayũ kwa kwĩthukĩĩsya wasya wa Ngai,’ na twĩkaa ũu ĩla twaatĩĩa mĩao yake. (Kũtũngĩlĩlwa Kwa Mĩao 30:19, 20) Keka ti ithyĩ twĩnyuvĩaa maũndũ, ndeto isu syĩthĩwa syĩ sya mana na iyonanyʼa kana Ngai nde tei. Vandũ va kũtũlasimĩthya twĩke maũndũ ala wendete, Ngai atwĩsũvĩte ũũ: “A! kethĩwa wethukĩĩsye mĩao yakwa! nĩvo ĩndĩ mũuo waku wĩthĩwa wailyĩ ta ũsĩ.”—Isaia 48:18.
Kwoou, noithyĩ tũtonya kũtuma tũendeea nesa kana tũendeea naĩ. Ethĩwa nĩtũkwenda maũndũ maitũ mathi nesa ũndũnĩ o na wĩva, no nginya twĩkĩe kĩthito. Mbivilia yaĩtye atĩĩ: “O ũla kwʼoko kwaku kwona wa kwĩka, ĩka na vinya waku.”(Mũtavanʼya 9:10) Ĩsyokete ĩkasya atĩĩ: “Mosũanĩo ma ala athingu maelete wingĩnĩ wa syĩndũ.”—Nthimo 21:5.
Ũthasyo wa kwĩnyuvĩa nĩ mũthĩnzĩo kuma kwa Ngai, nũndũ ũthasyo ũsu nũtumaa tũmwenda na ‘ngoo yonthe,’ tũte kũlasimĩthwʼa.—Mathayo 22:37.
We Ngai nĩwe ũtongoesye kĩla kĩndũ?
Mbivilia ĩmanyĩasya kana Ngai nĩwe mwene vinya wʼonthe, na kana vinya wake ndũsiĩĩka nĩ mũndũ o na wĩva. (Yovu 37:23; Isaia 40:26) Ĩndĩ Ngai ndatũmĩaa ũkũmũ wake kũtongoesya kĩla kĩndũ. Kwa ngelekanyʼo, Mbivilia yaĩtye kana Ngai eekie ‘kwĩsiĩĩa’ kwelekela Mbaviloni ĩla yaĩ mũmaitha wa andũ make. (Isaia 42:14) O ta ĩvindanĩ yĩu, ũmũnthĩ Ngai nĩwũmĩĩasya ala matũmĩaa ũthasyo woo wa kwĩnyuvĩa kũũmĩsya angĩ. Ĩndĩ ndemomĩĩsya tene na tene.—Savuli 37:10, 11.