Syo Ngũsĩ sya Yeova Nivĩndũĩte Mbivilia Yosane na Maũndũ Ala Iĩkĩĩaa?
Aiee, tũivĩndũĩte. Kĩvathũkanyʼo na ũu, yĩla twamanya kana maũndũ ala tũĩkĩĩaa mayosanĩte na kĩla kĩ Mbivilianĩ, nĩtũvĩndũaa maũndũ asu.
Myaka mingĩ tũtambĩte kumya Mbivilia ya Ũalyũlo wa Nthĩ Nzaũ mwaka wa 1950, nĩtweemanyĩisye Mbivilia kwa ũliku. Nĩtwatũmĩie Mbivilia o na yĩva ĩla yaĩ ĩtonya kũkwatĩkana na kwoou twaĩkĩĩthya kana maũndũ ala tũĩkĩĩaa nĩ ma wʼo. Kwasisya ngelekanyʼo ya maũndũ amwe Ngũsĩ sya Yeova syĩthĩĩtwe iyĩĩkĩĩa kwa ĩvinda yĩasa na ũyĩtwʼĩĩa ethĩwa kwa wʼo maũndũ asu nĩmosanĩte na kĩla Mbivilia ĩmanyĩasya.
Kĩla tũĩkĩĩa: Ngai ti Ũtatũ. Ĩkaseti ya Mwei wa 7, 1882 ya Zion’s Watch Tower yaisye: ”Asomi maitũ nĩmesĩ kana o na kau nĩtũmũĩkĩĩaa Yeova, Yesũ, na veva mũtheu nĩtũleanaa na ũmanyĩsyo ũte wa kĩmaandĩko wa kana Ngai nĩ ũtatũ kana o tondũ maasya Ngai nĩ itatũ nthĩnĩ wa mũndũ ũmwe.”
Ũndũ Mbivilia Yaasya: “Yeova Ngai witũ nĩ Yeova ũmwe.” (Kũtũngĩlĩĩlwa kwa Mĩao 6:4, The Holy Bible, by Robert Young) “Kwĩ Ngai ũmwe, Asa, ũla kwondũ wake syĩndũ syonthe syĩvo, naitũ twĩ make; na Mwĩai ũmwe Yesũ Klĩsto, ũla kwĩsĩla kwake syĩndũ syonthe syethĩiwe, o naitũ tweethĩiwe kwĩsĩla kwake.” (1 Akolintho 8:6, American Bible Union Version) Yesũ mwene awetie ũũ: “Asa nĩ mũnene kwĩ nyie.”—Yoana 14:28, Douay-Rheims Version.
Kĩla tũĩkĩĩaa: Andũ maikathĩnĩwʼa ĩianĩ ya mwaki tene na tene. Ĩkaseti ya Zion’s Watch Tower ya Mwei wa 6, 1882 yaĩ na kyongo “Ĩtuvi ya Naĩ Nĩ Kĩkwʼũ,” na ndeto isu syaumĩtwʼe Mbivilianĩ ya King James Version ĩandĩkonĩ ya Alomi 6:23. Ĩkaseti yĩu yaisye: “Ndeto ii syĩ laisi na nikũeleeka nesa. Nĩ ũndũ ũte kwosana na kĩlĩko kana andũ aingĩ ala maasya nĩmetĩkĩlĩte kana Mbivilia nĩ Ndeto ya Ngai, mavĩngaa ndeto ii na maasya kana nĩmesĩ kĩla maĩkĩĩaa nĩkyo kya wʼo, na kana Mbivilia ĩmanyĩasya kana ĩtuvi ya naĩ nĩ kũthĩnwʼa ĩianĩ ya mwaki tene na tene.”
Ũndũ Mbivilia Yaasya: “Thayũ ũla wĩkaa naĩ, ũkakwʼa.” (Esekieli 18:4, 20, King James Version) Kĩla kĩkakwata onthe ala mamũvĩngaa Ngai ti kũthĩnwʼa ĩianĩ ya mwaki tene na tene, ĩndĩ nĩ “kwanangwa tene na tene.”—2 Athesalonika 1:9, King James Version.
Kĩla tũĩkĩĩaa: Ũsumbĩ wa Ngai nĩ silikalĩ ya wʼo, ĩndĩ ti kĩndũ kĩ ngoonĩ. Ĩkaseti ya Zion’s Watch Tower ya Mwei wa 12, 1881 yĩineenea Ũsumbĩ wa Ngai yaisye ũũ: “Ũndũ ũmwe ũsumbĩ ũsu ũkeka waũngamwʼa nĩ kũmina mosumbĩ onthe ala me vaa ĩũlũ wa nthĩ.”
Ũndũ Mbivilia Yaasya: “Mĩthenyanĩ ya asumbĩ asu, Ngai wa ĩtunĩ akaũngamya ũsumbĩ ũla ũtakanangĩka, na ũsumbĩ ũsu ndũkatiĩwa andũ angĩ, ĩndĩ ũkatilanga na kũmina mosumbĩ asu onthe, nawʼo ũkaũngama tene na tene.”—Ndanieli 2:44, King James Version.
Syo Ngũsĩ sya Yeova syĩthĩawa syĩkwatĩtye Mbivilia ya Ũalyũlo wa Nthĩ Nzaũ ĩkwate mbau kĩla iĩkĩĩaa?
Aiee, nũndũ tũtũmĩaa Mbivilia ialyũlĩtwe na ithyomo mbingĩ syĩ kĩvathũkanyʼo wĩanĩ witũ wa kũtavanyʼa. Ĩndĩ, o na kau nĩtũnenganae Mbivilia ya Ũalyũlo wa Nthĩ Nzaũ vate ndĩvi yĩla tũkwĩmanyĩsya Mbivilia na andũ, nĩtũtanĩaa kwĩmanyĩsya na ala mekwenda kũtũmĩa Mbivilia ingĩ.