Wathani Nĩ Kyaũ?

Ũndũ Mbivilia ĩsũngĩĩte

Wathani nĩ ũvoo mũveveee nĩ Ngai kana ũvuanyʼo kuma kwa Ngai. Mbivilia yaĩtye kana athani “maneenie kĩla kyaumie kwa Ngai kwosana na ũndũ veva mũtheu wamatongoesye.” (2 Vetelo 1:20, 21) Kwoou mwathani nĩ mũndũ ũla ũkwataa ũvoo kuma kwa Ngai, na ĩndĩ aiũelesya andũ ala angĩ.—Meko ma Atũmwa 3:18.

Athani makwataa ata ũtũmani kuma kwa Ngai?

Ngai nĩwatũmĩie nzĩa kauta kũmanyĩthya athani mosũanĩo make:

• Kũandĩka. Ĩvinda yĩmwe Ngai nĩwatũmĩie nzĩa ĩno yĩla wanengae Mose ĩla Mĩao Ĩkũmi yĩ mĩandĩke.—Kuma 31:18.

• Kũtũmĩa alaĩka kũnengane ũtũmani. Kwa ngelekanyʼo, Ngai nĩwatũmĩie mũlaĩka kũnenga Mose ũtũmani ũla waĩ atwaĩe Valao wa nthĩ ya Misili. (Kuma 3:2-4, 10) Yĩla waĩ na vata wa kũnengane ũvoo wa mwanya ĩmwe kwa ĩmwe, Ngai nĩwatũmaa alaĩka matavanyʼe ũtũmani wake o tondũ weekie yĩla watavisye Mose, “Waĩle kũandĩka ndeto ii, nũndũ kwosana na ndeto ii, nĩngũtianĩa ũtianĩo naku na Isilaeli.”—Kuma 34:27.a

• Mawoni. Mavinda amwe mwathani oonawʼa mawoni atakomete. (Isaia 1:1; Avakuki 1:1) Mawoni amwe meethĩawa me maũndũ me ũtheinĩ vyũ ũkethĩa o na we mwene nũkũmeka. (Lũka 9:28-36; Ũvuanyʼo 1:10-17) Ĩndĩ mavinda angĩ aĩ atonya kwonwʼa woni aendeee kũvindĩĩsya maũndũ ta ũkũota. (Meko ma Atũmwa 10:10, 11; 22:17-21) O na ĩngĩ, Ngai nĩwanengae athani ũtũmani wake ndotonĩ yĩla me too.—Ndanieli 7:1; Meko ma Atũmwa 16:9, 10.

• Kũtongoesya mosũanĩo moo. Ngai nĩwatongoeasya mosũanĩo ma athani make nĩ kana amanenge ũtũmani wake. Na kĩu nĩkyosanĩte na kĩla Mbivilia yaĩtye kana “Maandĩko onthe nĩmaveveeiwe nĩ Ngai.” Ndeto “nĩmaveveeiwe nĩ Ngai” no ialyũlwe ta “mĩthũmũ ya Ngai.” (2 Timotheo 3:16; The Emphasised Bible) Ngai atũmĩie veva wake mũtheu, kana vinya wake, “kũveveea” mosũanĩo make ilĩkonĩ sya athũkũmi make. Ũtũmani waumĩte kwa Ngai, ĩndĩ athani nĩmo mamanyaa ndeto ila meũtũmĩa kũandĩka.—2 Samueli 23:1, 2.

Yo mavinda onthe wathani wĩthĩawa ũiweta ĩũlũ wa ĩvinda yũkĩte?

Aiee, wathani wa Mbivilia ndwĩthĩawa o ũiweta ĩũlũ wa ĩvinda yũkĩte tũ. Ĩndĩ, ũvoo mwingĩ kuma kwa Ngai wĩthĩawa ũineenea ĩũlũ wa ĩvinda yũkĩte o na ethĩwa ti ĩmwe kwa ĩmwe. Kwa ngelekanyʼo, athani ma Ngai nĩmakanasya Aisilaeli ĩngĩ na ĩngĩ ĩũlũ wa meko moo mathũku. Ũkanyʼo ũsu woonanasya kana meethĩwa me ewi maĩ makwate moathimo ma ĩvinda yũkĩte, ĩndĩ meethĩwa mate ewi maĩ makwatwe nĩ mũisyo. (Yelemia 25:4-6) Maũndũ ala Aisilaeli manyuva kũatĩĩa nĩmo moonanasya ethĩwa nĩmeũkwata moathimo kana nĩ kĩumo.—Kũtũngĩlĩĩlwa kwa Mĩao 30:19, 20.

Ngelekanyʼo sya mawathani me Mbivilianĩ matawetete ĩũlũ wa ĩvinda yũkĩte

• Ĩvinda yĩmwe yĩla Aisilaeli mamũkũlilye Ngai amatetheesye, nĩwatũmie mwathani amaelesye kana ndaĩ esa kũmatetheesya nũndũ nĩmaleile kwĩwʼa mĩao yake.—Asili 6:6-10.

• Yĩla Yesũ waneenie na mũndũ mũka Mũsamalia, nĩwavuanisye meko make ma tene ala ũtaĩ esa kũmamanya atavuanĩwʼe nĩ Ngai. Mũndũ mũka ũsu nĩwamanyie kana Yesũ nĩ mwathani o na kũtwʼĩka ndaaweta maũndũ makonetye ĩvinda yũkĩte.—Yoana 4:17-19.

• Yĩla Yesũ watatawa, amaitha make nĩmamũkunĩkie ũthyũ, mamũkũna, na ĩndĩ mamwĩa: “Athana! Nũũ ũla waũkũna?” Mayendaa Yesũ athane ĩũlũ wa ĩvinda yũkĩte, ĩndĩ mendaa onanyʼe kwĩsĩla ũtonyi wa Ngai nũũ wamũkũna.—Lũka 22:63, 64.