Ngũsĩ sya Yeova Syĩthĩawa na Woni Mwaũ Ĩũlũ wa Kũthasya Mũtwaano?
Nĩtũatĩĩaa woni wa Mbivilia ĩũlũ wa kũtwaana na kũthasya mũtwaano. Ngai ambĩĩie mũtwaano nĩ kana wĩthĩwe ngwatanĩo ndũmu katĩ wa mũndũũme na mũndũ mũka. Ũndũ ũla wonanĩtwʼe Maandĩkonĩ waĩle kũtuma andũ mathasya mũtwaano no ũlaalai tũ.—Mathayo 19:5, 6, 9.
Syo Ngũsĩ sya Yeova nitetheeasya mĩtwaano ĩla yĩ na mathĩna?
Ĩĩ, nĩsyĩkaa ũu kwa nzĩa syĩ kĩvathũkanyʼo. Imwe sya nzĩa isu nĩ:
Mavuku maumĩtye ũvoo Mbivilianĩ. Mavinda maingĩ mavuku asu nĩmethĩawa na ũvoo ũtonya kũtetheesya mũtwaano, o na ĩla yonekaa ta ĩtesa kũseũva. Kwa ngelekanyʼo, soma ilungu ila syĩ na kyongo, “Wajibika Sikuzote Katika Ndoa Yako,” “Jinsi ya Kusamehe” na “Jinsi ya Kuanza Kuaminiana Tena.”
Maũmbano. Nĩtũneeneaa motao ma Mbivilia matonya kũtethya mũtwaano, na twĩkaa ũu twĩ maũmbanonĩ ma kĩkundi na maũmbanonĩ manene.
Atumĩa. Atumĩa ma kĩkundi nĩmatetheeasya andũ ala matwaanĩte, na mekaa ũu kwa kũtũmĩa maandĩko ta Aeveso 5:22-25.
Yo atumĩa ma kĩkundi nĩmo maĩle kũnenga Ngũsĩ mwanya wa kũthasya mũtwaano?
Aiee. O na ĩla atumĩa makũlwʼa matetheesye ala me na mathĩna mũtwaanonĩ, mayĩthĩawa maĩle kũmekĩa ũtwi ĩũlũ wa ũndũ mekwĩka. (Akalatia 6:5) Ĩndĩ o na ũu wĩ o vo, mũndũ ũla watwʼa kũthasya mũtwaano ate na itumi syosanĩte na Maandĩko, ndethĩawa atonya kũnengwa ianda sya mwanya kĩkundinĩ, na kwosana na Maandĩko, ti mũthasye kũtwaana kana kũtwawa.—1 Timotheo 3:1, 5, 12.
Ngũsĩ sya Yeova syĩthĩawa na woni mwaũ ĩũlũ wa kũtaanĩsya?
Mbivilia nĩyĩkĩaa vinya andũ ala matwaanĩte maendeee kwĩkala vamwe o na ĩla me na mathĩna. (1 Akolintho 7:10-16) Andũ ala matwaanĩte no mamine mathĩna maingĩ kwa kũvoya na kĩthingʼĩĩsyo, kwa kũtũmĩa myolooto ya Mbivilia, na kwonanyʼa wendo.—1 Akolintho 13:4-8; Akalatia 5:22.
Ĩndĩ o na ũu wĩ o vo, ĩla veethĩwa na mathĩna maito, Aklĩsto amwe nĩmaamũaa kũtaanĩsya na ũla matwaanĩte nake. Mathĩna asu nĩ ta:
Ethĩwa mũndũ elea na ngũlũ kwĩanĩsya mavata ma mũsyĩ wake.—1 Timotheo 5:8.
Ethĩwa mũndũ nũkũvũa kĩveti kyake kana mũũme wake.—Savuli 11:5.
Ethĩwa mũndũ ndekwĩanĩsya mavata ma kĩ-veva ma mũsyĩ wake. Kwa ngelekanyʼo, ethĩwa ũla ũtwaanĩte nake ti Ngũsĩ na ekũlasimĩthya ũtũle mĩao ya Ngai ũndũnĩ mũna, no wone kũtaanĩsya nake newʼo ũndũ ũla waĩle nĩ kana ‘ũmwĩwʼe Ngai mbee wa kũmewʼa andũ.’—Meko ma Atũmwa 5:29.