ŨTETHYO KWONDŨ WA ANDŨ MA MŨSYĨ
Ũndũ Ũtonya Kwĩka Ũsiĩĩe Ũthatu Waku
Ve mavinda mũũme waku kana kĩveti kyaku kĩtonya kwĩka ũndũ ũkewʼa woo ĩndĩ ũivindya. Aũsisya aimanya ve ũndũ ũũkũthĩnyʼa na ayambĩĩa kũũkũlya nĩ kyaũ kĩthũku. Kĩu nakyo kĩikwongeleela woo ũla wĩĩ nawʼo. Ũtonya kwĩka ata ũsiĩĩe ũthatu waku maũndũ mekala ũu?
Maũndũ ala waĩle kũlilikana
Kwĩka maũndũ na ũthatu no kũtume ũkwatwa nĩ mathĩna ma mwĩĩ. Ũkunĩkĩli wonanasya kana mũndũ ũthataa ate kwĩsiĩĩa nũtonya kwĩsa kwambatwa nĩ nthakame, kũwaa ngoo, kũkwatwa nĩ ũla ũwau wa kũkwʼa ngoo, na mathĩna ma ĩvu. O na ĩngĩ, mathĩna ta kwaĩwa nĩ too, kwĩmakĩa kwingĩ, mathĩna ma kĩkonde, na kũkũnwa nĩ stroke nĩmatonya kũkwata andũ ala mathataa mũno. Kwoou ũtao ũũ wĩ Mbivilianĩ nĩ mũseo. Yaĩtye: ‘Eka ũthatu, nĩwʼo ũtumaa naĩ yĩkwa.’—Savuli 37:8.
O nakwʼo kũvingĩa ũthatu no kũũmĩsye mũndũ. Kwĩkala wĩ mũthatu no ũndũ ũmwe na kwĩthĩwa na ũwau ũendeee kũkũũmĩsya o kavola. Kwa ngelekanyʼo, nũtonya kũtwʼĩka mũndũ wa kumanyʼa ala angĩ kana mũndũ ũtesaa kwona ũseo woo. Kĩu no kĩtume wĩthĩwa wĩ mũndũ wĩ vinya mũno kwĩkalanyʼa na andũ, na nĩkĩtonya kwananga mũtwaano waku.
Ũndũ ũtonya kwĩka
Tata wonae ũseo wa ũla ũtwaanĩte nake. Andĩka maũndũ atatũ ala wendete ĩũlũ wake. Wesa kũmwĩwʼĩa woo nũndũ wa ũndũ ũkwĩkĩte, sũanĩa maũndũ asu ũandĩkĩte. Ũndũ ũsu no ũkũtethye ũkasiĩĩa ũthatu waku.
Mwolooto wĩ Mbivilianĩ: “Ĩthĩwai mũitũnga mũvea.”—Akolosai 3:15.
Ĩthĩwa wĩ mũndũ wa kũekea. Mbee, tata wone maũndũ ũndũ mũũme waku kana kĩveti kyaku kĩũmona. Kwĩka ũu no kũũtetheesye kũmũelewa. Kĩu nĩkyo Mbivilia ĩwetaa yĩla yaasya, “ĩwʼanĩai tei.” (1 Vetelo 3:8) Kuma vau ĩkũlye atĩĩ, ‘Kĩla kĩnthatĩtye nĩ kĩnene mũno ũndũ ndamba kũmũekea?’
Mwolooto wĩ Mbivilianĩ: “Nĩ ndaĩa . . . kũekea ĩvĩtyo.”—Nthimo 19:11.
Neena nesa yĩla ũkwĩyĩelesya na ũitũmĩa ũĩ. Tũmĩaa ndeto “Nyie.” Kwa ngelekanyʼo, vandũ va kwasya, “We ndwĩthĩawa ũinzũanĩa yĩla waema kũngũnĩa simũ ũndavye vala ũĩ,” no wasye, “Nyie nĩwʼaa ndithĩnĩka mũno yĩla waselewa na ũyĩthĩa ndiũmanya kana wĩ sawa wĩ vala ũĩ.” Kwĩyĩelesya wĩ mũuu no kũũtetheesye kũsiĩĩa ũthatu waku.
Mwolooto wĩ Mbivilianĩ: “Ndeto syenyu syĩthĩwe syĩ nzeo na syĩ na mũnyũ.”—Akolosai 4:6.
Ĩthukĩĩsye wĩ na ndaĩa. Wamina kwĩyĩelesya, nenga ũla ũtwaanĩte nake mwanya aũsũngĩe na ndũkamũtilĩĩle. Amina kũneena, weta kĩla waũtavya o kwa ũkuvĩ nĩ kana ũĩkĩĩthye nĩwamũelewa nesa. O kwĩthukĩĩsya kwʼoka no kũtume ũsiĩĩa ũthatu waku.
Mwolooto wĩ Mbivilianĩ: ‘Ĩthĩwa wĩ mĩtũkĩ ya kwĩthukĩĩsya, ũte na mĩtũkĩ ya kũneena.’—Yakovo 1:19.