Vulongulamu ya Kwĩka Maũmbano ma Kĩkundi Andũ Menene

Silikalĩ mbingĩ ĩũlũ wa nthĩ nĩvatĩte andũ kũthengeanĩa na ikavatana maũmbano ma andũ aingĩ. Ngũsĩ sya Yeova nitwʼĩte vyũ kũatĩĩa kĩu, ĩndĩ ĩvindanĩ o yĩu, iiendeea na ũthaithi wasyo kwa nzĩa ĩtekũilikya mũisyonĩ. Nĩ kana ũndũ ũsu ũtonyeke, ikundi syĩthĩĩtwe iitũmĩa vulongulamu sya kũmatetheesya meke maũmbano menene, ta Zoom.

Nĩ kana twĩthĩwe tũtonya kwĩka maũmbano tũteũtĩĩa na kwa nzĩa ĩteũtũlikya mũisyonĩ, Nzama Ĩla Ĩtongoesye nĩyeetĩkĩlilye mĩvothi ĩtũmĩwe kũthooa akaondi sya Zoom kwondũ wa ikundi. Ũndũ ũsu nũtethetye mũno ikundi imwe ila itaĩ itonya kũĩvĩa ndola katĩ wa 15 na 20, kana mbeange, ila syendekaa kũthooa akaondi isu. Ikundi imwe ta isu syatũmĩaa vulongulamu sya mana sya kũmatetheesya kwĩka maũmbano andũ menene. Ĩndĩ vulongulamu isu ti nzeo nũndũ syĩtĩkĩlasya o andũ anini kũkwatanwʼa ũmbanonĩ ĩvinda yĩmwe, na nitonya kũtũmĩwa naĩ nĩ andũ me na kĩeleelo kĩthũku. Ikundi syonthe ila itũmĩaa akaondi ya Zoom ĩla ĩthooetwe nĩ ũseũvyo nitethekete mũno nũndũ yĩ laisi kũtũmĩa na nĩ laisi kũsiĩĩa andũ maikamĩtũmĩe naĩ, na eka ũu, andũ aingĩ no makwatanwʼe ũmbanonĩ. Kũvika ũmũnthĩ, ikundi mbee wa 65,000 syĩ nthĩ mbee wa 170 nitũmĩaa akaondi isu.

Kairagi nĩ kĩkundi kĩ taoninĩ nene ya Manado, kĩvalonĩ kya ngalĩko ya ĩũlũ ya Sulawesi, nthĩ ya Indonesia. Kĩkundi kĩu nĩkyaekie kũtũmĩa vulongulamu ya mana na kyambĩĩa kũtũmĩa akaondi ĩsu ya ũseũvyo. Mwana-a-asa Hadi Santoso aeleetye ũũ: “O na ana-a-asa na eĩtu-a-asa ala matesene na syĩndũ sya tekinolongyia yu no matanĩe maũmbano mũno, na kĩtumi nũndũ ti nginya malike ũmbanonĩ ũmwe mavinda kauta.”

Lester Jijón, Jr. nĩ mũtumĩa wa Kĩkundi kya Guayacanes Oeste, kĩla kĩ Guayaquil, nthĩ ya Ecuador, na aĩtye: “Nũndũ ana-a-asa na eĩtu-a-asa me ũkwati wĩ nthĩ, ũnaĩ ũndũ ũtatonyeka kwa ikundi imwe kũĩvĩa laĩsenzi ya Zoom ĩtonya kwĩtĩkĩlya kĩkundi kyonthe kũkwatanwʼa maũmbanonĩ. Ĩndĩ yu nũndũ ũseũvyo nũtũtetheesye kũkwata akaondi ya Zoom ĩtonya kũkwatanyʼa andũ aingĩ, no tũthokye angĩ maũmbanonĩ tũteũkĩa nĩmekwingĩva nginya wĩthĩe maikwatanwʼa onthe.”

Johnson Mwanza nĩ mũtumĩa wa Kĩkundi kya Ngwerere North kĩla kĩ Lusaka, nthĩ ya Zambia, na aandĩkĩte ũũ: “Ana-a-asa na eĩtu-a-asa aingĩ methĩĩtwe mayasya, ‘akaondi ya Zoom ya ũseũvyo ĩtumĩte twĩwʼa twĩ ngwatanĩo na ana-a-asa na eĩtu-a-asa maitũ, na ĩtumĩte tũmanya kana Yeova nũtwendete na nũtũsũvĩaa.’”

Ũseũvyo ũthooete akaondi isu na mbesa ila syĩthĩawa siĩtwe itũmĩwe kũnengane ũtethyo ĩvinda ya mũisyo. Mbesa isu nĩ ila syumawʼa ta mĩvothi ya ngoo ya kwenda nĩ ala mekwenda kũtetheesya wĩa wa nthĩ yonthe. Aingĩ maumasya mĩvothi ĩsu kwĩsĩla donate.jw.org. Twĩkũtũngĩa mũvea mũno nũndũ wa ũlau waku wa kumya mĩvothi, ĩla ĩtetheeasya o na ũthũkũminĩ wa kũnengane ũtethyo nthĩ yonthe.—2 Akolintho 8:14.