Kũnengane Ũtethyo Ĩvinda ya Mĩisyo 2023—“Nĩtwĩyoneete Ũndũ Yeova Ũtwendete”

Mbivilia nĩyathanĩte kana “mbaĩ ĩkookĩlĩla mbaĩ” na kũkeethĩwa na mĩisyo ta ithingitho sya nthĩ “[mũminũkĩlyonĩ] wa ĩvinda yĩĩ.” (Mathayo 24:3, 7) Nĩtwĩyoneete wathani ũsu ũianĩa mwakanĩ wa ũthũkũmi wa 2023.a Ĩndĩ o na kũtwʼĩka kũnaĩ na makaũ na mĩisyo ĩsu vakuvĩ nthĩ ta 100, Ngũsĩ sya Yeova nĩsyonanĩtye wendo ta wa Yeova. Ata?

Mwakanĩ wa ũthũkũmi wa 2023, ana-a-asa maitũ nĩmakwatiwe nĩ mĩisyo ta ithingitho sya nthĩ kana o ĩngĩ yĩetetwe nĩ andũ mbee wa 200. Ala manatũmĩiwe nĩ Ngũsĩ sya Yeova kũnengane ũtethyo manatũmĩie mbee wa ndolab milioni ĩkũmi sya mbesa ĩla syĩthĩawa ĩvathĩtwe kwondũ wa wĩa wa nthĩ yonthe. Na tũitalĩte mbesa ila ana-a-asa na eĩtu-a-asa aingĩ manatũmĩie maumĩtye mĩvukonĩ yoo nĩ kana matetheesye ala me isionĩ sya kwoo. Kwoona ũndũ mĩvothi yaku ĩnatũmĩiwe kũtetheesya mĩisonĩ o ĩlĩ, o na kau ve ĩngĩ mingĩ ĩnamakwatie.

“Nĩtweeyoneie Wendo wa Wʼo”

Mavinda kwa mavinda, isio imwe sya nthĩ ya Nigeria nĩsyĩthĩawa na mbua mbingĩ. O na vailye ũu, mbua mbingĩ ĩla yauie Mwei wa 10, 2022 nĩyo yaĩ nthũku mũno kua kũu kwa ĩvinda ya myaka ĩkũmi mĩvĩtu. Mĩũnda ya eka mbee wa 1,670,432 (676,000 hectares) nĩyaanangiwe, na andũ mbee wa milioni ilĩ nĩmatiie mĩsyĩ yoo. Ovisi wa ũvonge wa Nigeria nĩwaseũvisye Kamitii sya Kũnengane Ũtethyo na mĩtũkĩ nĩ kana inengane syĩndũ sya ũtethyo na iitetheesya ana-a-asa na eĩtu-a-asa methĩwe na mũĩkĩĩo mũlũmu.

Wasyo Ũla Ana-a-asa na Eĩtu-a-asa Maitũ Makwatie

• Atavanyʼa 7,505 nĩmathamĩĩie kũndũ kũngĩ

• Mĩsyĩ 860 nĩyaanangiwe

• Nyũmba sya Ũsumbĩ 90 na ĩmwe ya Maũmbano Manene nĩsyavwʼĩkiwe nĩ kĩwʼũ

Ũndũ Mĩvothi Yatũmĩiwe

Mbee wa ndola 250,000 nĩsyatũmĩiwe kũnengane ũtethyo na syathooie syĩndũ ta:

• Mbaa lĩu ta mũsele, mboso, na noodles

• Syĩndũ sya mũsyĩ ta mĩto na neti sya ũmuu

• Kũtũngĩĩa kana kwaka ĩngĩ nyũmba ila mbanangĩku

Ana-a-asa maitũ maĩkĩĩthisye ata kana mĩvothi ĩla yaĩ vo nĩyatũmĩwa nesa? Nzĩa ĩmwe yaĩ kũsisya nesa kĩla nyũmba mamanye kana nĩyaĩlĩte kũtũngĩĩwa. Ethĩwa ve nyũmba ĩkwenda kwakwa ĩngĩ, maakaa matũmĩĩte mũsolo wĩ laisi ta wa nyũmba ila ingĩ kũu.

Ana-a-asa na eĩtu-a-asa ala matetheeiwʼe nĩmatũngie mũvea mũno. Mwĩĩtu-a-asa ũmwe aĩtye: “Mbua ĩsu nĩyaanangie mũũnda witũ wʼonthe na weethĩa vai vandũ twĩkala. Nĩtweewie twausya yĩla ana-a-asa na eĩtu-a-asa mookie mũthenya o ũsu kũtũtetheesya na twakwata vandũ vaseo tũtonya kũkoma. Na tweewie twausya ĩ-ya mũno yĩla twakwatie lĩu kuma ovisinĩ wa ũvonge. Mwa twatiiwe tũkwete mĩnuka nũndũ nĩtweeyoneie ndeto ila syĩ Yoana 13:34, 35 iyĩanĩa kwitũ. . . . Nĩtweeyoneie wendo wa wʼo. Nyie na mũsyĩ wakwa mwa twĩmatũngĩa mũvea ana-a-asa ala mookie kũtũtetheesya ĩvindanĩ yĩla yaaĩlĩte vyũ.”

Ala angĩ kĩsionĩ nĩmoonie wĩa ũla twatethasya. Mũnene wa kĩsio kya Sabagreia, Bayelsa State, aisye: “Ve ngwatanĩo mbingĩ na makanisa maingĩ ĩũlũ wa nthĩ, ĩndĩ no Ngũsĩ sya Yeova syĩkĩte ũndũ ta ũsu. . . . Ũseũvyo [wenyu] nĩ ũmwe katĩ wa ĩla mĩseo vyũ ĩũlũ wa nthĩ.”

“Nĩtwĩyoneete Ũndũ Yeova Ũtwendete Mũno Wĩana”

Twĩ Mwei wa 2, 2023, myaki mbee wa 400 nĩyaanangie mũno nthĩ ya Chile. Mbee wa eka 1,060,553 (430,000 hectares) sya nthĩ, na syĩndũ ingĩ sya vata kũu ta malelũ nĩsyaanangiwe. Kĩu nĩkyatumie andũ ta 8,000 makĩĩa kũndũ kũngĩ. Kavinda kakuvĩ ĩtina wa mũisyo ũsu, ovisi wa ũvonge nĩwambĩĩisye mũvango wa kũnengane ũtethyo.

Wasyo Ũla Ana-a-asa na Eĩtu-a-asa Makwatie

• Atavanyʼa 222 nĩmathamĩĩiwʼe kũndũ kũngĩ

• Nyũmba 20 nĩsyaanangiwe

Ũndũ Mĩvothi Yatũmĩiwe

Mbee wa ndola 200,000 nĩsyatũmĩiwe kwondũ wa kũnengane ũtethyo na syathooie syĩndũ ta:

• Lĩu na kĩwʼũ

• Mauta, syĩndũ sya kwĩka ũtheu, na ndawa

• Kwaka ĩngĩ nyũmba ila mbanangĩku

Mũsyĩ ũmwe nĩwatelemile kwĩthĩa kana syĩndũ syoo syonthe nĩsyaanangiwe, o vamwe na nyũmba na viasala woo. Kĩu kyamatiie mate na ũkwati. Mĩthenyanĩ ya mbee, makusaa ngoo mũno mona nyũmba yoo ĩte vo ĩngĩ. Ĩndĩ yĩla moonie nyũmba yoo ĩyakwa ĩngĩ, nĩmeewie kavaa. Kwona ũndũ mendetwe na mathĩnĩkĩawa nĩ ala meeyumĩtye kũmatetheesya nĩkwatumie momĩĩsya. Makiitiwe mũno nginya maendanyʼa na ana-a-asa ala meeyumĩtye nĩ kana makĩe mwana-a-asa ũngĩ nyũmba.

Wĩa ũsu wa kũnengane ũtethyo nĩwakiitie ana-a-asa na eĩtu-a-asa aingĩ. Mwana-a-asa ũmwe aisye: “Mũvango ũsu wa Yeova wa kwĩthĩwa na Kamitii sya Kũnengane Ũtethyo ndwĩ maela. Mũthenya ũla waatĩĩe kuma mũisyo waumĩla, maĩ mavikie vaa nĩ kana manengane syĩndũ ila sya vata. Yĩla wasoma ĩũlũ wa ũndũ isio ingĩ inakwatie ũtethyo, nĩwĩwʼaa weekĩwa vinya. Ĩndĩ yĩla we mwene weeyonea ũndũ ta ũsu, nĩwĩwʼaa ũndũ wĩ kĩvathũkanyʼo. Kĩu kĩtumaa ũtũngĩa ũseũvyo witũ mũvea mũnango; wĩyonea ũndũ ana-a-asa me na nguma ta sya Yeova; na ũndũ mathĩnĩkĩaa mavata maitũ ma kĩ-mwĩĩ, kĩ-veva na ma ngoonĩ. Kwa wʼo, nĩtwĩyoneete ũndũ Yeova ũtwendete mũno wĩana.”

O ũndũ mũminũkĩlyo wa nthĩ ĩno ũendeee kũthengeea, nowʼo mĩisyo ta ithingitho sya nthĩ ĩkũendeea kwongeleka. (Luka 21:10, 11) O na vailye ũu, Mũsumbĩ witũ wĩ wendo, Yesũ Klĩsto, nũkũendeea kũtũmĩa kĩkundi kya Kĩklĩsto kũtwonyʼa ũndũ ũkũendeea kwĩthĩwa vamwe naitũ “mĩthenya yonthe nginya mũminũkĩlyo wa ĩvinda yĩĩ.” (Mathayo 28:20) Mĩvothi yaku ya ũlau kwondũ wa wĩa wa nthĩ yonthe, ĩla wumasya kwĩsĩla donate.jw.org na nzĩa ingĩ o vamwe na ĩvinda na vinya waku, nĩkwonanyʼa kana nũkwete mbau Ũsumbĩ ũsu na Mũsumbĩ wawʼo, ũla ũtwendete. Nĩ mũvea mũno nũndũ wa ũlau waku.