Amisonalĩ Matavanasya “Kũvika Itulu sya Nthĩ”

Yesũ eeie amanyĩwʼa make atĩĩ: “Mũkeethĩwa mwĩ ngũsĩ syakwa . . . kũvika itulu sya nthĩ.” (Mek 1:8) Ũmũnthĩ, Ngũsĩ sya Yeova nĩsyĩkĩaa kĩthito kingĩ mũno nĩ kana ianĩsye mwĩao ũsu. Ĩndĩ o na vailye ũu, kwĩ isio imwe, o na ingĩ syĩkalawa nĩ andũ aingĩ itatavanĩtwʼe nesa. Na nthĩ ingĩ syĩ Ngũsĩ o nini. (Mathayo 9:37, 38) Yo twĩkaa ata nĩ kana tũvikĩe andũ aingĩ ũndũ vatonyeka?

Nĩ kana Kamitii ya Ũthũkũmi ya Nzama Ĩla Ĩtongoesye ya Ngũsĩ sya Yeova ĩtetheesye wĩa ũsu wĩanĩwʼe, nĩtũmaa amisonalĩ isionĩ syĩ kĩvathũkanyʼo ĩũlũ wa nthĩ ila syĩ na vata wa atavanyʼa. Yu tũĩ, ve na amisonalĩ 3,090 nthĩ yonthe.a Aingĩ nĩmamanyĩĩtwʼe sukulunĩ sya Mbivilia ta, Sukulu ya Atavanyʼa ma Ũsumbĩ. Amisonalĩ nĩmethĩawa meyumĩtye kũtia kwoo na kũthi nthĩ ingĩ. Na nũndũ wa kwĩthĩwa mo nĩ akomau, nĩmamanyĩĩtwʼe, na me na ũtũĩka mwingĩ wĩanĩ wa kũtavanyʼa, amisonalĩ aa methĩawa na kĩthito na nĩmatetheesye ũvoo mũseo ũkanyaĩĩkwʼa kũndũ kwingĩ na makaiĩa amanyĩwʼa eũ ngelekanyʼo nzeo.

Nĩmatetheewʼe Nĩ Kana Matetheesye Angĩ

Nthĩnĩ wa kĩla ovisi wa ũvonge, Ovisi wa Kũthĩnĩkĩa Atavanyʼa ma Ĩvinda Yonthe ma Mwanya ũla wĩthĩawa ungu wa Mũvĩa wa Ũthũkũmi, nĩwĩthĩawa na ngwatanĩo na kamitii ya ovisi wa ũvonge nĩ kana mone ũndũ maũndũ ta mavata ma nyũmba, ma ũiiti, na ma mbesa nini sya kũĩvĩa tũmavata tũngĩ twa amisonalĩ, matonya kũthĩnĩkĩwa. Mwakanĩ wa ũthũkũmi wa 2020, Ngũsĩ sya Yeova syatũmĩie mbee wa silingi mbilioni 2 kũthĩnĩkĩa mavata ma amisonalĩ. Ũtethyo ũsu amisonalĩ makwataa nũtumaa methĩwa na ĩvinda yingĩ ya kũtũmĩa ũtavanyʼanĩ, na ya kũlũlũmĩlya ikundi.

Mo amisonalĩ matetheesye ata wĩanĩ wa kũtavanyʼa? Frank Madsen ũla wĩthĩawa nthĩnĩ wa Kamitii ya Ovisi wa Ũvonge wa Malawi easya: “Nũndũ amisonalĩ methĩawa na ũkũmbaũ na ũtũĩka mwingĩ nĩmatetheesye ikundi ikambĩĩa kũtavanyʼa isionĩ ila ite laisi kũtavanyʼa, ta kũla kwĩthĩawa na asikalĩ ngeitinĩ. Na nĩmaitetheesye ikambĩĩa kũtavanyʼa isionĩ ila syĩ andũ mataneenaa ithyomo syoo. O na ĩngĩ, nũndũ nĩmekĩaa kĩthito kwĩmanyĩsya ithyomo ngeni na syĩthĩo sya kũla mathi, methĩawa ngelekanyʼo nzeo mũno kwa angĩ, o na nĩmatumĩte andũ ma mũika mambĩĩa kwendeewʼa nĩ kũlika ũthũkũminĩ wa ĩvinda yonthe. Tũmũtũngĩaa Yeova mũvea mũno nũndũ wa amisonalĩ.”

Nake mwana-a-asa ũngĩ wĩthĩawa nthĩnĩ wa Kamitii ya Ovisi wa Ũvonge wa nthĩ ĩngĩ aĩtye: “Ngelekanyʼo ya amisonalĩ nĩyonanasya nesa vyũ kana andũ ma Yeova nthĩ yonthe me ngwatanĩo. O na andũ ala mate Ngũsĩ nĩmonaa ũtheinĩ kana syĩthĩo iitũaanasya, ĩndĩ vandũ va ũu, maũndũ ala twĩmanyĩĩtye Mbivilianĩ nĩmatũtetheetye tũkethĩwa andũ ma Yeova me ngwatanĩo.”

Amisonalĩ matethasya atavanyʼa ma kũla matũmwa ata? Paulo kuma Timor-Leste, nũtũngaa mũvea mũno nũndũ wa amisonalĩ matũmĩtwe kĩkundinĩ kyoo. Aĩtye atĩĩ: “Kũũ kwitũ nĩ kũvyũ vyũ. Ĩndĩ o na kau amisonalĩ ala matũmĩtwe kĩkundinĩ kitũ maumĩte kũndũ kũthithu, kĩu kĩitumaa maeka kũtavanyʼa. Kĩla ĩvinda methĩawa maũmbanonĩ ma ũtavanyʼa. Mavinda maingĩ nĩnĩmonaa maendete kũsyokea andũ mũthenya yĩla kũvyũ vyũ, o na masaa ma ĩ ya mawĩoo. Nĩmatetheesye andũ aingĩ makemanyĩsya Mbivilia, o vamwe nakwa. Mamũthũkũmaa Yeova me atanu na me na kĩthito, na kĩu nĩkĩtumĩte kĩkundi kyonthe kĩyumya mũnango kũmũthũkũma Yeova.”

Ketti nĩ vainia wa kĩla ĩvinda kuma Malawi na nũeleetye ũndũ mũndũ na mũka ala matũmĩtwe ta amisonalĩ kwoo matetheeisye mũsyĩ woo. Easya atĩĩ: “Ĩvinda yĩla matũmiwe kĩkundinĩ kitũ, no inyie naĩ Ngũsĩ mũsyĩ kwitũ. Ĩndĩ nĩmandetheeisye mũno na matuma ndũũ na mũsyĩ witũ. Ngelekanyʼo yoo nzeo nĩyatetheeisye syana syakwa kwona ũndũ kũmũthũkũma Yeova kũetae ũtanu na kũkatuma andũ mekala meanĩwe. Nũndũ wa ngelekanyʼo yoo nzeo, yu eĩtu makwa atatũ nĩ mavainia ma kĩla ĩvinda na mũemewa nĩwũkaa maũmbanonĩ.”

Mo mavata ma amisonalĩ mathĩnĩkĩawa ata? Mathĩnĩkĩawa kwĩsĩla mĩvothi ĩla yumawʼa kwondũ wa wĩa wa nthĩ onthe, ĩla yumawʼa kwĩsĩla nzĩa syĩ kĩvathũkanyʼo ila syonanĩtwʼe nthĩnĩ wa donate.jw.org. Ana-a-asa nĩmatũngĩawa mũvea mũno nũndũ wa mĩvothi ĩno maumasya na ngoo ya kwenda.