Maveva Mayaaĩkala Ĩũlũ wa Nthĩ na Kũkwʼĩĩa Vo

Maveva me kwʼo! Nthĩnĩ wa wĩkalo wa maveva, kwĩ maveva maseo o na mathũku. Atĩĩ, maveva asu nĩ andũ ala maaĩkala ĩũlũ wa nthĩ na kũkwʼĩĩa vo?

Aiee, ti mo. Yĩla mũndũ wakwʼa, ndaingaa aendete ũtũonĩ wa maveva, tondũ andũ aingĩ mesilasya. Twĩsĩ ata ũvoo ũsu? Nĩ kwoondũ Mbivilia ĩwetaa ũu. Mbivilia nĩ ĩvuku ya wʼo yĩla yumĩte kwa Ngai ũla wa wʼo weka, ũla syĩtwa yake nĩ Yeova. Yeova nĩwe woombie andũ; we nĩwĩsĩ nesa kĩla kĩmakwataa yĩla makwʼa.—Savuli 83:18; 2 Timotheo 3:16.

Mbivilia ĩwetaa kana Ngai oombie Atamu, mũndũ wa mbee, “na kĩtoo kya nthĩ.” (Mwambĩlĩlyo 2:7) Ngai amwiie nthĩnĩ wa Valatiso, mũũnda wa Eteni. Kethĩwa Atamu nĩweewie mwĩao wa Yeova, ndethĩwa aakwʼa; ethĩwa e thayũ o na ũmũnthĩ. Ĩndĩ yĩla Atamu watũlile mwĩao wa Ngai kwa kwenda, Ngai amwĩie: “Ũkasyoka mũthanganĩ; nũndũ wĩ kĩtoo, na nũkasyoka kĩtoonĩ.”—Mwambĩlĩlyo 3:19.

Ũu wĩonanyʼa ata? Yo tene-ĩ, Atamu aĩ va Yeova atanamba kũmũmba kuma kĩtoonĩ? Ndaĩ vandũ. Ndaĩ ĩtunĩ e veva ũte mũsyae. Ndaĩ kwʼo. Kwoou yĩla Yeova waisye Atamu ‘akasyoka mũthanganĩ,’ oonanasya kana Atamu akakwʼa. Ndaakĩla mũingo ũya ũngĩ wa wĩkalo wa maveva. Yĩla wakwie, Atamu asyokie atwʼĩka kĩndũ kĩte thayũ, kĩte kwʼo. Kĩkwʼũ nĩ wau wa thayũ.

Ĩndĩ kũilyĩ ata ũvoonĩ wa ala angĩ makwʼĩte? Aĩ o na mo ti kwʼo maĩ? Mbivilia ĩsũngĩaa atĩĩ:

• “Onthe [andũ o na nyamũ] maendaa vandũ vamwe; onthe nĩ ma kĩtoo, na onthe masyokaa ĩngĩ kĩtoonĩ.”—Mũtavanyʼa 3:20.

• “Akwʼũ matyĩsĩ ũndũ o na wĩva.”—Mũtavanyʼa 9:5.

• “Wendo woo, o na kĩmena kyoo na kĩwĩu kyoo, nĩsyaaie tene mũno.”—Mũtavanyʼa 9:6.

• “Kũti wĩa kana ũsũanĩo, kana ũmanyi, kana ũĩ, Seoli [mbũanĩ] vala ũendete.”—Mũtavanyʼa 9:10.

• “[Mũndũ] nũsyokaa mũthanganĩ wake; mũthenya o ũsu mosũanĩo make nĩmaaa.”—Savuli 146:4.

We wĩona nĩ vinya kwĩtĩkĩla maandĩko asu? Ethĩwa nũu, ĩsilye atĩĩ: Nthĩnĩ wa mĩsyĩ ya andũ aingĩ, mũndũ mũũme nĩwe ũthũkũmĩaa mbesa sya kũendeesya mũsyĩ wake. Yĩla mũndũ mũũme ũsu wakwʼa, mavinda maingĩ andũ ma mũsyĩ wake nĩmathĩnaa. Mavinda amwe mũka na syana syake o na mayĩthĩawa na mbesa mbĩanĩu kũthooa lĩu. No kwĩthĩwa amaitha ma mũndũ mũũme ũsu matonya kũmeka maũndũ mathũku. Yuyu kweekũlye atĩĩ: ‘Ethĩwa mũndũ mũũme ũsu e thayũ nthĩnĩ wa ũtũo wa maveva, nĩkĩ ũtaendeeaa kũmanthĩa andũ ma mũsyĩ wake mavata moo? Nĩkĩ ũtasũvĩaa andũ ma mũsyĩ wake na andũ athũku?’ Nĩkwĩthĩwa maandĩko meneena wʼo. Mũndũ mũũme ũsu nde thayũ, ndatonya kwĩka ũndũ o na wĩva.—Savuli 115:17.

Atĩĩ, ũu nĩ kwonanyʼa kana akwʼũ maikasyoka kwĩthwa thayũ ĩngĩ? Aiee. Nĩtũkwĩsa kũneena ũvoo wa ũthayũũkyo ĩtina. Ĩndĩ ũndũ ũsu wĩonanyʼa kana akwʼũ mayĩsĩ kĩla we ũkwĩka. Maitonya kũkwona, kũkwĩwʼa, kana kũneena naku. Ndwĩ na vata wa kũmakĩa. Maitonya kũkũtethya, na maitonya kũkwĩka naĩ.—Mũtavanyʼa 9:4; Isaia 26:14.