Lea Ndĩnĩ ya Ũvũngũ; Atĩĩa Ĩla ya Wʼo

1. Kwosana na maũndũ ma ũthaithi, andũ melekanĩle na ũnyuvi mwaũ ũmũnthĩ?

YESŨ aisye: “Ũla ũte ngalĩ yakwa ũsu e ũndũ nakwa.” (Mathayo 12:30) Tweethĩwa tũte ngalĩ ya Yeova twĩ ngalĩ ya Satani. Andũ aingĩ mesilasya kana ũthũkũmi woo kwa Ngai nĩwĩtĩkĩlĩtwe, ĩndĩ Mbivilia yonanasya Satani nĩ “mũkengani wa nthĩ yonthe.” (Ũvuanʼyo 12:9) Andũ milioni mbingĩ maĩkĩĩaa kana mathaithaa Ngai, o yĩla kwa ũwʼo mathaithaa Satani Ndevili! Andũ no nginya manyuve katĩ wa maũndũ aa elĩ: Kũmũthũkũma Yeova, “Ngai wa wʼo,” kana Satani “ĩthe wa ũvũngũ.”—Savulĩ 31:5; Yoana 8:44.

Lea Ndĩni ya Ũvũngũ

2. Satani atataa ũtumĩa nzĩa myaũ amasiĩĩe andũ maikamũthaithe Yeova?

² Kũtwʼa kũthaitha Yeova nĩwʼo ũnyuvi ũla wa wũĩ, nũndũ nĩwʼo ũla ũkatuma wĩtĩkĩlwa nĩ Ngai. Manya nake Satani ndamwendete mũndũ ona wĩva ũla ũmũthaithaa Ngai. Nũmaeteae thĩna mwingĩ ala mamũthaithaa Ngai. We ekaa ũu kwa nzĩa ya kũthekeewa kana kũvĩngwa nĩ andũ ala angĩ, o na anyanyau na andũ ma mũsyĩ waku. Yesũ awetie ũkanyʼo ũũ: “Amaitha ma mũndũ makeethĩwa ala ma nyũmba yake.”—Mathayo 10:36.

3. Ethĩwa andũ ma mũsyĩ waku kana anyanyau makavĩnga ũthaithi waku kwa Ngai-ĩ, we ũkeeka ata?

³ Ũndũ ũũ wesa ũkũkwata-ĩ, ũkeeka ata? Andũ aingĩ nĩmesĩ kana ũthaithi woo wĩ mavĩtyo ĩndĩ, nĩmaũteteaa ũkethĩa maĩkwenda kũekana na wʼo. Mesilasya meeka ũu makaananga wĩwʼano woo wa mũsyĩ. Ĩndĩ-ĩ, ku nĩ kwĩsilya kũseo? Ũkesa ũmanya kana andũ ala ma mũsyĩ waku nĩmatumĩaa syĩndũ sya ũmila ta vangi, we ndũtonya ũmatavya ũthũku wasyo? We o naku no wambĩlĩĩlye kũitũmĩaa o tamo?

4. Yosua mĩthenyanĩ yake eeie Aisilaeli ata kwosana na uthaithi?

⁴ Aisilaeli nĩmataviwe nĩ Yosua maekane na syĩthĩo na mokũũ ma aa-ĩthe moo. We aisye: “Kwondũ wa ũũ ĩndĩ kĩai Yeova, na mũimũthũkũma na wʼo, na vate wanganganʼyo; na vetai ngai ila aaĩthe menyu mathũkũmie mũingo wa ũla Ũsĩ, na ku Misili; na mũithũkũma Yeova.” (Yosua 24:14) Yosua alũmanĩtye na Yeova ki thayũnĩ wake, nake Yeova nĩwamũathimie. Naitũ twalũmanya na Yeova akatũathima o ta Yosua. —2 Samueli 22:26.

Ananga Syĩndũ Ila Itũmĩawa Ũthaithinĩ wa Ũvũngũ

5. Nĩkĩ nĩtwaĩlwe nĩkwananga vyũ syĩndũ sya mowe?

⁵ Nzĩa ĩngĩ ya kũlea ndĩni ya ũvũngũ nĩ kwananga syĩndũ syonthe sya ũwe ila tũtonya kwĩthĩwa twĩ nasyo ta mĩthea, ititi, mĩnyoo, mbingo, na syĩndũ ingĩ ta isu. Na kwĩka ũu nĩ ũndũ wa vata mũno nũndũ tũkoonanyʼa vyũ kana wĩkwatyo witũ wʼonthe wĩ kũla kwĩ Yeova.

6. Aklĩsto ma mbee meekie ata na mavuku moo ma mowe?

⁶ Kwavindĩĩsya ũndũ Aklĩsto ma mbee mekie yĩla matwʼie maatĩĩe ndĩni ya wʼo. Mbivilia ĩtũtavasya: “Andũ aingĩ ala meekaa maũndũ ma ũwe maete mavuku moo na moombanʼya vamwe, na mamavĩvĩsya mbee wa andũ onthe.”—Meko 19:19.

7. Tũtonya kwĩka ata ndaimoni syambĩlĩĩlya ũtũthĩnyʼa?

⁷ Andũ amwe ala mambĩlĩlya kũmũthũkũma Yeova, na mena na syĩndũ sya ũwe kana ũoi na syĩndũ ingĩ ta isu nĩmatonya kwambĩĩa kũthĩnwʼa nĩ ndaimoni. Ethĩwa ikaũthĩnyʼa, voya kwa Yeova, ũyĩta syĩtwa yake na wasya mũnene. We akaũtethya.—Nthimo 18:10; Yakovo 4:7.

8. Aklĩsto monaa ata mĩvwʼanano, mavisa na syĩndũ ila ingĩ itũmĩawa nthĩnĩ wa ũthaithi wa ũvũngũ?

⁸ Ala meenda ũmũthũkũma Yeova maitonya ona vanini kwĩĩyiĩa kana kũtũmĩaa mĩvwʼanano, kana mavisa ma ndĩni sya ũvũngũ. Aklĩsto ma wʼo ‘makinyaa kwa kũĩkĩĩa, ti kwa kwona.’ (2 Akolintho 5:7) Mo nĩmaatĩĩaa mwĩao wa Ngai ũla ũvatanaa ũtũmĩi wa mĩvwʼanano nthĩnĩ wa ũthaithi.—Kuma 20:4, 5.

Ĩthĩwa Wĩ Ngwatanĩo na Andũ ma Yeova

9. Nĩ ũtao mwaũ ũkonetye kwĩthĩwa twĩ oĩ ũnenganĩtwe nĩ Mbivilia?

⁹ Sisya, Mbivilia yĩasya: “Endaa na andũ oĩ, na ũkeethĩwa mũĩ.” (Nthimo 13:20) Ethĩwa nĩtũkwenda kwĩthĩwa twĩ oĩ, twĩ na vata wa kũendanasya kana kwĩthĩwa na ngwatanĩo na Ngũsĩ sya Yeova. Nĩmo andũ ala maendele nzĩanĩ ya thayũ ũtathela.—Mathayo 7:14.

10. Ngũsĩ sya Yeova itonya ata kũũtetheesya ũmũthũkũme Ngai?

¹⁰ Ngũsĩ sya Yeova kwawʼo nĩmendeaa ũseo andũ ala angĩ. Wĩa woo nĩ kũtetheesya andũ ala me ngoo mbaĩlu mamanye ũwʼo wa Mbivilia ũla ũtongoasya kũvika thayũ ũtathela. Mo nĩmatonya kũũtetheesya kwa kwĩmanyĩsya Mbivilia vamwe naku mateukũĩvya kĩndũ. Makaũsũngĩa makũlyo maku na maikwonyʼa ũndũ ũtonya ũtũmĩaa ũmanyi kuma Mbivilianĩ.—Yoana 17:3.

11. Maũmbano ma Kĩklĩsto makaũtetheesya ata?

¹¹ Maũmbanonĩ moo, ala mavinda maingĩ mekewa nthĩnĩ wa Kingdom Hall (Nyũmba ya Ũsumbĩ), ũkeemanyĩsya maũndũ maingĩ makonetye nzĩa sya Yeova. Na nengĩ makaũmanyĩsya ũndũ o naku ũtonya ũtetheesya andũ angĩ memanyĩsye ũwʼo kuma Mbivilianĩ.—Aevelania 10:24, 25.

12. Mboya o nayo ikatonya ata kũũtetheesya ũmũthũkũme Ngai?

¹² Weethingʼĩĩsya kwĩmanyĩsya mũno ieleelo sya Yeova na kwenda kwake, nĩvatonyeka wendo waku kwa nzĩa syake sya wendo ũkongeleka. Na ĩngĩ ongeleela wendi waku wa kwĩka maũndũ ala mamwendeeasya na ũimena wʼonthe ũla ũtamũtanĩthasya. Lilikana kana nutonya ũmũvikĩa Yeova nthĩnĩ wa mboya na ũimũkũlya aũtetheesye kwĩka ũndũ ũla mwaĩlu na kwĩsũvĩana na maũndũ ala mathũku.—1 Akolintho 6:9, 10; Avilivi 4:6.

13. Ũkatuma ata ngoo ya Yeova yĩthĩwe na ũtanu?

¹³ Waendeea kwĩana kĩveva ĩvinda yĩkavika yĩla wĩona vata wa kwĩyumya ũvatiswe ta ũmwe wa Ngũsĩ sya Yeova. Wavikĩa vau ũkeethĩwa watwʼĩka ũmwe wa andũ ma Yeova na ũkatũma ngoo ya Yeova ĩtana. (Nthimo 27:11) Yu ĩndĩ ũkeethĩwa katĩ wa andũ atanu ala Ngai waasya ũũ ĩũlũ woo: “Ngekalaa nthĩnĩ woo, na kũendaa nthĩnĩ woo; na ngeethĩwa Ngai woo, namo makeethĩwa andũ makwa.”—2 Akolintho 6:16.