Nthĩ Nzaũ Kwĩanana na Watho wa Ngai

Mbivilia, Ndeto ya Ngai nĩtũnengae wĩkwatyo ĩla ĩkwasya: “Ĩndĩ kwĩanana na watho wake, tweteele matu meũ na nthĩ nzaũ, nawʼo ũlũngalu ũtwĩe nthĩnĩ wayo.”—2 Vetelo 3:13.

“Matu meũ” nĩ kyaũ? Mbivilia ĩelekanasya matu na ũsumbĩ. (Meko 7:49) “Matu meũ” nĩ silikalĩ nzaũ ĩla ĩkasumbĩka ĩũlũ wa nthĩ. Nĩ nzaũ nũndũ ĩkaũngama vandũ va walanyʼo wa ũsumbĩ ũla wĩvo ũmũnthĩ. Na ĩngĩ, nĩ ũndũ mweũ nthĩnĩ wa kwĩanĩsya kĩeleelo kya Ngai. Nĩ Ũsumbĩ ũla Yesũ watũmanyĩisye tũvoyae. (Mathayo 6:10) Na nũndũ Ngai nĩwe Wumo wawʼo na ekalaa ĩtũnĩ, wĩtawa “ũsumbĩ wa ĩtu.”—Mathayo 7:21.

“Nthĩ nzaũ” nĩ kyaũ? Ti nthĩ nzaũ (mũthanga), nũndũ Mbivilia yaasyaa ũtheinĩ kana nthĩ ĩkatũaa andũ tene na tene. “Nthĩ nzaũ” nĩ andũ eũ. Makeethĩwa me andũ eũ nũndũ ala athũku makeethĩwa me avetange. (Nthimo 2:21, 22) Ala onthe makethĩwa thayũ makamũnenga Mũmbi ndaĩa na kũmwĩwʼa na makekalaa kwĩanana na mĩao yake. (Savuli 22:27) Andũ ma mbaĩ syonthe yu nĩmeũkũlwʼa memanyĩsye mĩao ĩsu na maimĩatĩĩa. We nĩwĩkaa ũu?

Nthĩnĩ wa nthĩ nzaũ ya Ngai, kĩla mũndũ akanenga ũsumbĩki Wake ndaĩa. Wendo waku kwa Ngai nũkũsukumaa ũmwĩwʼe? (1 Yoana 5:3) Ũu nĩwonekaa mũsyĩ kwaku? na wĩanĩ kana sukulu? na mwĩkalĩlenĩ waku?

Nthĩnĩ wa nthĩ ĩsu nzaũ, andũ makeethĩwa na ngwatanĩo nthĩnĩ wa kũthaitha Ngai ũla wa wʼo. We ũthaithaa Mũmbi wa ĩtu na nthĩ? Ũthaithi waku kwa wʼo nũkũkwatanasya na athaithi ala angĩ ma nthĩ syonthe, ngo syonthe, na ithyomo syonthe?—Savuli 86:9, 10; Isaia 2:2-4; Nzevania 3:9.

[Ĩsandũkũ ĩthangũnĩ ya 17]

Ngai Ũla Wathanĩte Maũndũ Asu

Nĩwe Mũmbi wa matu na Nthĩ. Nĩwe “Ngai ũla wa wʼo weka” o ta ũndũ Yesũ Klĩsto wawetie. —Yoana 17:3.

Andũ aingĩ mataĩaa ngai syoo meseũvĩsye. Andũ Milioni mbingĩ mathaithaa mĩvwʼanano ĩte na thayũ. Angĩ mataĩaa mawalanyʼo ma andũ na malĩ na ũĩ wa nthĩ kana mawendi moo. O na ala maasyaa nĩmaatĩaa Mbivilia maiyĩnengae ndaĩa syĩtwa ya ũla ĩmwĩtaa “Ngai wa wʼo.”—Kũtũngĩlĩlwa Kwa Mĩao 4:35, NW.

Mũmbi ewetete atĩĩ: “Ninyie Yeova, nĩyo syĩtwa yakwa.” (Isaia 42:5, 8) Ĩsyĩtwa yĩu yonekaa ta mavinda 7,000 Mbivilianĩ nthĩnĩ wa ithyomo ila yaandĩkiwe nasyo. Yesũ Klĩsto amanyĩisye amanyĩwʼa make mavoyae atĩĩ: “Asa waitũ ũla wĩ ĩtunĩ, syĩtwa yaku yĩtaĩwe.”—Mathayo 6:9.

Ngai wa wʼo ailye ata? Eyĩeleetye ta mũndũ wĩ “tei na mũseo, ũtathataa mĩtũkĩ, na wĩ na wingĩ wa ũseo wĩ wendo na wʼo” ũla ũtakatwʼa mũvĩtanyʼa kwĩthĩwa ti mũvĩtanyʼa o na ata. (Kuma 34:6, 7) Isitoli ya ũndũ wĩkĩte andũ nĩyĩĩkĩĩthĩtye ũwʼo wa ndeto isu.

Syĩtwa ya Ngai nĩyaĩle kũtaĩwa kana kũthewʼa. Ta Mũmbi na Mũsumbĩki Ũla Mũnene Vyũ, nĩtwaĩlwe kwĩthĩwa twĩ ewʼi kwake na kũmũthaitha. We nũmwĩwʼaa na kũmũthaitha?

[Ĩsandũkũ/Visa ĩthangũnĩ ya 18]

“Matu Meũ na Nthĩ Nzaũ” Ikaete Maũalyũku Maũ?

Nthĩ ĩkalyũlwa ĩtwʼĩke Valatiso Luka 23:43

Mũuo nthĩ yonthe Savuli 37:10, 11; Mika 4:3, 4

Wĩa ũkũete kwĩanĩwa na lĩu mwingĩ Isaia 25:6; 65:17, 21-23

Ũwau, kĩmako na kĩkwʼũ ikavetangwa Isaia 25:8; Ũvuanʼyo 21:1, 4

Andũ onthe makathaitha Ngai wa wʼo mena ngwatanĩo Ũvuanʼyo 15:3, 4

[Ĩsandũkũ/Visa ĩthangũnĩ ya 19]

Ũkatetheka?

Ngai ndatonya kũneena ũvũngũ!—Tito 1:2.

Yeova aĩtye atĩĩ: “Ndeto yakwa . . . ndĩkanzyokea mana, ĩndĩ ĩkeanĩsya ũndũ nendete, nayo ĩkaaĩla ũndũnĩ ũla namĩtũmĩe.”—Isaia 55:11.

Yeova yu nĩ ũendee na kũmba “matu meũ na nthĩ nzaũ.” Silikalĩ ya ĩtunĩ yu nĩsumbĩkĩte. Mĩsingi ya “nthĩ nzaũ” yu yĩvo.

Ĩvuku ya Ũvuanyʼo yamina kũtavanyʼa maũndũ ala maseo andũ makaetewe nĩ “matu meũ na nthĩ nzaũ” yĩwetaa Ngai Mũsumbĩki Ũla Mũnene, ayasya atĩĩ: “Sisya, nĩngũtwʼa maũndũ onthe meũ.” Na asya ĩngĩ atĩĩ, “Andĩka: nĩkwĩthĩwa ndeto ii nĩ sya kĩthito na nĩ sya wʼo.”—Ũvuanʼyo 21:1, 5.

Ĩkũlyo ya vata nĩĩ, Ithyĩ nĩtũendee na kũalyũla mĩkalĩle yitũ nĩ kana twĩĩtĩkĩlwʼa tũlike “nthĩ nzaũ” ĩla ĩsumbĩkĩtwe nĩ “matu meũ”?