Yosia Aĩ na Anyanya Aseo

We nĩwonaa wĩ ũndũ wĩ vinya kwĩka maũndũ maseo?— Andũ aingĩ monaa ũndũ ũsu wĩ vinya. Mbivilia ĩtũtavĩtye kana ndwaĩ ũndũ wĩ laisi kwa kamwana keetawa Yosia kwĩka maũndũ maseo. Ĩndĩ, kaĩ na anyanya aseo ala makatetheeasya. Eka twĩmanyĩsye maũndũ angĩ ĩũlũ wa Yosia na anyanyae make.

Ĩthe wa Yosia eetawa Amoni na aĩ mũsumbĩ wa Yuta. Amoni aĩ mũndũ mũthũku mũno na athaithaa mĩvwʼanano. Ĩla wakwie, Yosia nĩwe watwʼĩkie mũsumbĩ wa Yuta, e na ũkũũ wa myaka nyanya! Wĩona Yosia ta waĩ mũthũku ta ĩthe wake?— Aiee!

Kuma e mũnini, Yosia nĩwendete kũmwĩwʼa Yeova. Kwoou anyuvie andũ ala mamwendete Yeova methĩwe anyanyae make. Anyanyae asu make nĩmamũtetheeisye kwĩkaa maũndũ maseo. Amwe ma anyanyae asu ma Yosia maĩ aaũ?

Ũmwe wa anyanyae asu eetawa Nzevania. Nzevania aĩ mwathani, na nĩwatavasya andũ ma Yuta kana makakwatwa nĩ maũndũ mathũku ethĩwa maikaeka kũthaitha mĩvwʼanano. Yosia nĩwamwĩthukĩĩisye Nzevania na anyuva kũmũthaitha Yeova, ĩndĩ ti kũthaitha mĩvwʼanano.

Yosia aĩ na mũnyanyae ũngĩ weetawa Yelemia. Elĩ masyaĩtwe vakuvĩ ĩvinda yĩmwe, na ĩla maĩ anini mĩsyĩ yoo nĩyathengeanĩe. Yosia na Yelemia nĩmendene mũno vyũ. Kwoou, ĩla Yosia wakwie Yelemia nĩwaandĩkie wathi waĩ mũseo ĩũlũ wa ũndũ weewʼaa ĩtina wa Yosia akwʼa. Yelemia na Yosia nĩmatetheanĩasya kwĩka maũndũ maseo na nĩmamwĩwʼaa Yeova.

Nĩ kyaũ ũtonya kwĩmanyĩsya kumana na Yosia?— O na ĩla Yosia waĩ o kamwana, nĩwendaa kwĩka maũndũ ala maseo. Nĩweesĩ kana anyanyae make maaĩlĩte kwĩthĩwa me andũ mamwendete Yeova. Kwoou o naku no ũtate kũnyuva anyanya ala mamwendete Yeova, na ala matonya ũkũtetheesya wĩke maũndũ ala maseo!