Yosia Nĩwendete Mĩao ya Ngai

Yosia atwʼĩkie mũsumbĩ wa Yuta e na myaka nyanya. Ĩvindanĩ yĩu, andũ nĩmeekwatanĩtye na maũndũ ma ũwe na mathaithaa ngai sya mĩvwʼanano. Yosia e na myaka 16, nĩweemanyĩisye ũndũ ũtonya kũmũthaitha Yeova kwa nzĩa ĩla yaĩle. E na myaka 20, nĩwambĩĩie kwananga ngai sya mĩvwʼanano na ithembeo nthĩ ĩsu. Na avikya myaka 26, nĩwavangie kũseũvya ĩngĩ ĩkalũ ya Yeova.

Ĩkalũ yĩendeee kũseũvwʼa, mũthembi mũnene, Ilikia, nĩweethĩie ĩvuku ya kũkũnzwa yaandĩkĩtwe Mĩao ya Yeova. Nĩvatonyeka ĩvuku yĩu yĩkethĩwa no yĩla yaandĩkiwe nĩ Mose. Mũandĩki wa mũsumbĩ, ũla weetawa Savani, nĩwatwaĩie Yosia ĩvuku yĩu ya kũkũnzwa na ambĩĩa kũmũsomea yo na wasya. Yĩla Yosia weethukĩĩisye Mĩao ĩsu ĩisomwa, nĩwamanyie kana vandũ va myaka mingĩ andũ mayamwĩwʼaa Yeova. Nũndũ wa ũu, Mũsumbĩ Yosia amwĩie Ilikia atĩĩ: ‘Yeova nũthatĩte mũno nũndũ witũ. Thi ũkaneene nake. Na Yeova nũkũtũtavya ũndũ twaĩle kwĩka.’ Yeova nĩwaneenie namo kwĩsĩla mwathani mũndũ mũka weetawa Ulita. Aisye atĩĩ: ‘Andũ ma Yuta nĩmandiie. Makasilĩlwa, ĩndĩ ti ĩvindanĩ yĩĩ Yosia ũendeee kũsumbĩka, nũndũ we nũtatĩte ũndũ ũtonya eke maũndũ kwosana na Mĩao yakwa.’

Yĩla Mũsumbĩ Yosia wataviwʼe ũvoo ũsu, nĩwaendie ĩkalũnĩ na oombanyʼa andũ onthe ma Yuta vau. Na ĩndĩ amasomea Mĩao ya Yeova na wasya mũnene. Yosia na andũ asu nĩmamwathie Yeova kana makamwĩwʼaa na ngoo yonthe.

Andũ ma Yuta mekalĩte vandũ va myaka mingĩ matatanĩa Vasaka. Ĩndĩ yĩla Yosia wasomie Mĩaonĩ kana nĩmaĩle kũtanĩaa Vasaka kĩla mwaka, ameie atĩĩ: ‘Nĩtũkwĩthĩwa na Vasaka kwondũ wa Yeova.’ Kwoou, Yosia nĩwavangie kumya nthembo mbingĩ na avanga aini ala makaina ĩkalũnĩ mũthenya ũsu. Andũ nĩmatanĩie Vasaka, na ĩtina wa ũu meethĩwa na Mboka ya Kĩmũtũ Kĩte Ĩlawa, ĩla matanĩie vandũ va mĩthenya mũonza. Kũyaĩ kwaaĩthĩwa na Vasaka ĩngĩ ta ĩsu kuma ĩvinda ya Samueli. Kwa wʼo Yosia nĩwendete Mĩao ya Ngai. We nũtanĩaa kwĩmanyĩsya ĩũlũ wa Yeova?