Yesũ Nĩwatũmie Amanyĩwʼa 70 Makatavanyʼe

Ĩtina wa Yesũ na amanyĩwʼa make kwĩthĩwa Yelusaleme kwondũ wa Mboka ya Ivanda, noĩthwa mataathi vaasa na ndũa ĩsu. Ĩvindanĩ yĩu, mwaka wa 32 wakilyĩ kũthela, na nĩvathelete myaka vakuvĩ ĩtatũ kuma Yesũ avatiswa. (Luka 10:38; Yoana 11:1) Myei thanthatũ ya mũthya e ĩũlũ wa nthĩ, Yesũ atũmĩie ĩvinda yingĩ aitavanyʼa Yutia kana mũingo wa Ũsĩ wa Yolotani nthĩ ya Velea. O nasyo isio isu syaĩ na vata wa kũtavanwʼa.

Ĩvinda ĩnini ĩtina wa Vasaka ya mwaka wa 30, Yesũ nĩwatũmĩie myei yĩana ũna aitavanyʼa, na noĩthwa atavanasya kĩsionĩ kya Yutia nginya Kalilii esĩle Samalia. Nayo Vasaka ya mwaka wa 31 ĩkilyĩ kũvika, Ayuti ala maĩ Yelusaleme nĩmendaa kũmũaa Yesũ. Mwaka ũmwe na nusu ũla waatĩĩe, Yesũ nĩwamanyĩisye ngalĩko ya ĩũlũ ya Kalilii. Ĩvindanĩ yĩu, andũ aingĩ nĩmatwʼĩkie aatĩĩi make. Yesũ e kũu Kalilii, nĩwamanyĩisye atũmwa make na amatũma makatavanyʼe. Ameie atĩĩ: “Tavanyʼai, mũkyasya: ‘Ũsumbĩ wa ĩtu nĩ mũthengeeu.’” (Mathayo 10:5-7) Ĩndĩ ĩvindanĩ yĩu Yesũ e kĩsionĩ kya Yutia kĩla kyaĩ na vata mũnene wa kũtavanwʼa, nĩwavangie kambeini ĩngĩ ya kũtavanyʼa.

Nĩ kana ambĩĩsye kambeini ĩsu, Yesũ nĩwanyuvie amanyĩwʼa 70 na amatũma elĩ elĩ. Kwoou, vaĩ na ikundi 35 sya atavanyʼa ma Ũsumbĩ kĩsionĩ kĩu, vala ‘ngetha yaĩ nene, ĩndĩ atethya ma wĩa maĩ anini.’ (Luka 10:2) Maaĩlĩte kwamba kũthi kũtavanyʼa isionĩ ila Yesũ ũtonya kwĩthĩwa avangĩte kũthi kũtavanyʼa ĩtina wa kavinda kanini. Amanyĩwʼa asu 70 maaĩle kũthi maivosya awau na mainyaĩĩkya ũvoo ũla Yesũ watavanasya.

O na kau amanyĩwʼa nĩmaaĩlĩte kũthi kũtavanyʼa masinakokenĩ, mayaaĩlĩte kũtavanyʼa kũu kwĩ o kwʼoka. Yesũ ameie mathi makatavanyʼe mĩsyĩ kwa andũ. Ameie atĩĩ: “Nyũmba o na yĩva ĩla mwĩlika, ambai kwasya: ‘Mũuo nĩwĩthĩwe nyũmbanĩ ĩno.’ Na ethĩwa ve mũndũ wendete mũuo nyũmbanĩ ĩsu, mũuo wenyu ũkeethĩwa vamwe nake.” Ĩndĩ amanyĩwʼa maaĩle kũtavanyʼa ĩũlũ wa kyaũ? Yesũ ameie mathi maitavya andũ atĩĩ: “Ũsumbĩ wa Ngai wĩ vakuvĩ nenyu.”—Luka 10:5-9.

Yesũ nĩwatavisye amanyĩwʼa asu 70 maũndũ ala maaĩle kũatĩĩa me ũtavanyʼanĩ. Maũndũ asu mavwʼanene na ala watavĩtye atũmwa 12 mwaka ũmwe mũvĩtu. Nĩwamatavisye kana ti andũ onthe makamathokya nesa. Ĩndĩ kĩthito kyoo nĩkyesaa kũtetheesya andũ ala maĩ na ngoo nzeo nĩ kana ĩtina wa kavinda kanini Yesũ avika kĩsionĩ kĩu, andũ aingĩ methĩwe na mea ma kũmwona Mwĩaĩi na mayĩmanyĩsya kuma kwake.

Ĩtina wa ĩvinda ĩnini, ila ikundi 35 sya atavanyʼa ma Ũsumbĩ nĩsyasyokie vala ve Yesũ. Amanyĩwʼa asu me atanu mamwĩie Yesũ atĩĩ: “Mwĩaĩi, o na ndaimoni niũtwĩnyivĩsya twatũmĩa ĩsyĩtwa yaku.” Ndeto isu nĩsyamũtanĩthisye Yesũ mũno nginya eea amanyĩwʼa make atĩĩ: “Nĩngwona Satani avalũkĩte kuma ĩtunĩ ta ũtisi. Sisyai! nĩnamũnenga ũkũmũ wa kũkinyanga nzoka na ingʼauĩ.”—Luka 10:17-19.

Kwoou, Yesũ nĩwaĩkĩĩthisye amanyĩwʼa make kana maĩ makĩlye vinya maũndũ matonya kũmaũmĩsya, ala maelekanĩtwʼe na nzoka na ingʼauĩ. O vamwe na ũu, nĩmaaĩle kwĩthĩwa mate na nzika kana ĩvinda yũkĩte Satani akekwʼa kuma ĩtunĩ. O na ĩngĩ Yesũ nĩwatetheeisye ala amanyĩwʼa 70 kũmanya ũndũ ũla waĩ wa vata vyũ. Aisye atĩĩ: “Mũikatane nĩkwĩthĩwa maveva nĩmeũmwĩnyivĩsya, ĩndĩ tanai nũndũ masyĩtwa menyu nĩmaandĩke ĩtunĩ.”—Luka 10:20.

Yesũ nĩwatanie mũno na amũtaĩa Ĩthe wake ũtheinĩ nũndũ wa kũtũmĩa athũkũmi asu make maĩ na wĩnyivyo kwa nzĩa ya mwanya. Avĩndũkĩie amanyĩwʼa make na amea atĩĩ: “Nĩ matanu metho ala mekwona maũndũ ala mũkwona. Nũndũ nĩngũmwĩa, athani aingĩ na asumbĩ nĩmendie mũno kwona maũndũ ala mũkwona ĩndĩ mayaamona, na kwĩwʼa maũndũ ala mũkwĩwʼa ĩndĩ mayaamewʼa.”—Luka 10:23, 24.