Kũtana Yĩla Mwĩki wa Naĩ Weelila

Ve mavinda kauta Yesũ e ũtavanyʼa wakindĩlĩĩile vata wa kwĩthĩwa na wĩnyivyo. (Luka 14:8-11) Aĩ na mea ma kũmantha aũme na aka ala maĩ na wendi wa kũmũthũkũma Ngai menyivĩtye. Kũvikĩĩa ĩvindanĩ yĩu, andũ amwe katĩ wa asu Yesũ wamanthaa nĩmatonya kwĩthĩwa maendeee kwĩka maũndũ mathũku mũno.

Avalisi na aandĩki nĩmamanyie kana andũ asu moonaa mate vata, nĩmendeeawʼa nĩ Yesũ na ũvoo ũla watavanasya. Nũndũ wa ũu nĩmanyungunyĩisye ĩũlũ wa Yesũ masya: “Mũndũ ũũ athokasya eki ma naĩ na kũya vamwe namo.” (Luka 15:2) Avalisi na aandĩki moonaa me ma vata mũno na makuaa andũ ma kĩlasi kya nthĩ naĩ mũno. Moonaa andũ asu ta kĩko kĩla makinyangaa na maaũ moo. Yĩla meũneenea andũ asu, atongoi asu matũmĩaa ndeto ya Kĩevelania ‛am ha·’aʹrets, ĩla yonanasya “andũ ma nthĩ,” na ũu woonanasya ũndũ mamavũthĩtye.

Kĩvathũkanyʼo na Avalisi na aandĩki, Yesũ nĩwanengete andũ onthe ndaĩa, na nĩwamewʼĩaa tei. Na nũndũ wa ũu, andũ aingĩ ala moonekaa me ma kĩlasi kya nthĩ, o na ala meesĩkĩe ta mekaa maũndũ mathũku, maĩ na wendi wa kũmwĩthukĩĩsya Yesũ. Ĩndĩ Yesũ eekie ata Avalisi na aandĩki maneena maũndũ mathũku nũndũ wa kwona aitetheesya andũ asu moonekaa me ma kĩlasi kya nthĩ?

Ũsũngĩo wa ĩkũlyo yĩu nĩwamanyĩkie nesa yĩla Yesũ waumisye ngelekanyʼo yakiitie ngoo sya ala meethukĩĩsye. Ngelekanyʼo ĩsu yailyĩ ĩla waumisye ĩvinda yĩla waĩ Kavelinaumi. (Mathayo 18:12-14) Nthĩnĩ wa ngelekanyʼo isu syelĩ, Yesũ aelekanilye Avalisi na andũ alũngalu na ta malondu masũvĩĩku ĩĩthyanĩ ya Ngai. Na ĩndĩ asyoka aelekanyʼa andũ ma kĩlasi kya nthĩ na malondu ala matiĩte nzĩa na maĩte. Yesũ aisye-ĩ:

“Nĩ mũndũ wĩva katĩ wenyu e na malondu 100, aasya yĩmwe, ũtatiaa ala angĩ 99 weũnĩ na aithi kũmantha yĩu yĩmwe yaie nginya yĩla ũkayona? Na amina kũyona, aiyilĩĩla ituonĩ syake na aitana. Na avika mũsyĩ, ayĩta anyanyae na atũi make vamwe, na aimea, ‘Tanai vamwe nakwa, nũndũ nĩnoona ĩlondu yakwa yĩla yĩnaaĩte.’”—Luka 15:4-6.

Nĩ kyaũ Yesũ wendaa kwonanyʼa aitũmĩa ngelekanyʼo ĩsu? Aeleisye asya atĩĩ: “O ta ũu, nĩmũtavya kana kwĩthĩawa ũtanu mwingĩ ĩtunĩ yĩla mwĩki ũmwe wa naĩ weelila, kũte ũtanu ũla wĩthĩawa kwondũ wa andũ 99 alũngalu mate na vata wa kwĩlila.”—Luka 15:7.

Yĩla Yesũ wawetie kwĩlila no nginya ethĩwe atelemilye Avalisi. Moonaa me alũngalu na mayoonaa ve vata wa kwĩlila. Yĩla Avalisi amwe maneeneie Yesũ naĩ myaka mĩvĩtu nũndũ wa kũĩsanĩa na aumĩthya ma koti na eki ma naĩ, Yesũ ameie: “Ndyaaũka kwondũ wa ala alũngalu, ĩndĩ nookie kwondũ wa eki ma naĩ.” (Maliko 2:15-17) Nũndũ Avalisi asu moonaa me alũngalu mayoonaa vata wa kwĩlila, na kwoou mayatumaa ĩtunĩ kwĩthĩwa na ũtanu. Ĩndĩ eki ma naĩ nĩmeelilaa kuma ngoonĩ na ũu ũituma ĩtunĩ kwĩthĩwa na ũtanu.

Yesũ aikindĩlĩĩla kana eki ma naĩ ala meelila nĩmatumaa ĩtunĩ kwĩthĩwa na ũtanu mũnene, nĩwatũmĩie ngelekanyʼo ĩngĩ ĩkonetye maũndũ mekĩkaa mũsyĩ. Aisye: “Nĩ mũndũ mũka wĩva e na ndulakima ĩkũmi, aasya ndulakima ĩmwe, ũtakwatasya taa na aituta nyũmba yake na aimĩmantha nesa nginya yĩla ũkamyona? Na amyona, ayĩta anyanyae na atũi vamwe, na aimea, ‘Tanai vamwe nakwa nũndũ nĩnoona ndulakima yakwa ĩla nĩnaaĩtye.’”—Luka 15:8, 9.

Yesũ aeleisye ngelekanyʼo ĩsu o tondũ waeleisye ngelekanyʼo ya ĩlondu yaaĩte. Amina kũelesya aisye: “O ta ũu, nĩmũtavya, alaĩka ma Ngai nĩmatanaa yĩla mwĩki ũmwe wa naĩ weelila.”—Luka 15:10.

Nĩ ũndũ wa kwendeesya mũno kũmanya kana alaĩka ma Ngai nĩmatanaa mũno yĩla moona eki ma naĩ meelila! Ũndũ ũsu nĩ wa vata mũno nũndũ eki ma naĩ ala meelila na makwata mwanya Ũsumbĩnĩ wa ĩtu makeethĩwa na kĩanda kĩnene mũno kwĩ alaĩka! (1 Akolintho 6:2, 3) Ĩndĩ o na ũu wĩ o vo, alaĩka mayĩwʼĩaa andũ asu kĩwĩu. Naitũ twaĩle kwĩwʼa ata yĩla mwĩki wa naĩ wamũsyokea Ngai na eelila kuma ngoonĩ?