Yesũ Akatuma Nthĩ Yĩthĩwa yĩ Nzeo

Kavinda kanini Yesũ amina kũvatiswa, nĩwakomanie na mũmaitha mũthũku watwʼĩte vyũ kũmũvalũkya o na atambĩĩe ũthũkũmi wake. Vate nzika, mũmaitha ũsu mũthũku nĩ Ndevili, ũla wamũtatie Yesũ mavinda kauta. Ĩtina, Yesũ nĩwesie kũweta ndeto ii ĩũlũ wa mũmaitha ũsu mũthũku: “Mũnene wa nthĩ nĩwũkĩte, nake nde na ũtonyi ĩũlũ wakwa.”—Yoana 14:30.

Mũtũmwa Yoana nĩwoonie woninĩ ĩũlũ wa kĩla kĩkakwata ‘mũkũnga, ĩla nzoka ngũũ yĩtawa Ndevili na ĩngĩ Satani.’ Woni ũsu nĩwoonanisye kana mũmaitha ũsu mũthũku wa andũ akekwʼa kuma ĩtunĩ “e na ũthatu mwingĩ, nũndũ nĩwĩsĩ e na kavinda o kanini.” (Ũvuanyʼo 12:9, 12) Aklĩsto me na itumi nzeo sya kũĩkĩĩa kana yu mailyĩ ĩvindanĩ yĩu ya “kavinda o kanini” na kana o mĩtũkĩ “ũla mũkũnga, ĩla nzoka ngũũ,” ũkekwʼa ĩimanĩ yĩte kĩtulu na ũyĩthĩwa ũtatonya kwĩka ũndũ o na ũmwe kwa myaka 1,000 yĩla Yesũ ũkethĩwa asumbĩkĩte Ũsumbĩnĩ wa Ngai.—Ũvuanyʼo 20:1, 2.

Nĩ maũndũ meva makekĩka vaa nthĩ ĩvindanĩ yĩu ya myaka ngili? Naaũ makekala vaa nthĩ, na maũndũ makeethĩwa mailyĩ ata? Yesũ mwene nĩwawetie ũndũ maũndũ makethĩwa mailyĩ. Nthĩnĩ wa ĩla ngelekanyʼo ya mbũĩ na malondu, Yesũ nĩwawetie kĩla kĩkwata andũ ala alũngalu maelekanĩtwʼe na malondu, ala methĩawa na ngwatanĩo nzeo na ana-a-asa ma Yesũ na mamatetheeasya. O na ĩngĩ, nĩwawetie nesa kĩla kĩkakwata andũ ala mate alũngalu na maelekanĩtwʼe na mbũi. Aisye atĩĩ: “Asu [mbũi] makathi wanangĩkonĩ wa tene na tene, ĩndĩ ala alũngalu [malondu] makalika thayũnĩ wa tene na tene.”—Mathayo 25:46.

Ũndũ ũsu nũtũtetheeasya kũelewa ndeto ila Yesũ watavisye kĩla kĩngʼendilĩ kyambĩtwe ũtee wake. Yesũ ndaatavya kĩngʼendilĩ kĩu kana kĩkakwata mũthĩnzĩo ũla wathĩtwe atũmwa make aĩkĩĩku, nawʼo nĩ kwĩthĩwa me Ũsumbĩnĩ wa ĩtu. Ĩndĩ Yesũ eeie mũndũũme ũsu waĩ aneelila atĩĩ: “Nĩ wʼo ũmũnthĩ nĩngũkwĩa, ũkeethĩwa vamwe nakwa Ũseonĩ.” (Luka 23:43) Kwoou, mũndũũme ũsu nĩwakwatie wĩkwatyo wa kwĩsa kwĩkala Valatiso kana nthĩnĩ wa nthĩ ĩno yĩ nzeo. Ĩvindanĩ yũkĩte Yesũ akasilĩla andũ, na ala makasilĩlwa kwĩthĩwa malondu na mailika “thayũnĩ wa tene na tene” makeethĩwa nthĩnĩ wa Valatiso kana nthĩ nzeo.

Ũu nĩwosanĩte na ũndũ mũtũmwa Yoana waeleisye ĩũlũ wa ũndũ maũndũ makethĩwa mailyĩ vaa ĩũlũ wa nthĩ. Aisye atĩĩ: “Ĩeema ya Ngai yĩ vamwe na andũ, na akekalaa vamwe namo, na makeethĩwa andũ make. Na Ngai mwene akeethĩwa vamwe namo. Na akavangũla methoi onthe methonĩ moo, na kĩkwʼũ kĩikethĩwa vo ĩngĩ, o na kũikethĩwa ĩngĩ kĩmeto kana kĩĩo kana woo. Maũndũ ma mbee nĩ mavĩtu.”—Ũvuanyʼo 21:3, 4.

Nĩ kana kĩla kĩngʼendilĩ kĩtanĩa thayũ nthĩnĩ wa nthĩ nzaũ, no nginya kĩthayũũkwʼa. Ĩndĩ ti kyo kĩkathayũũkwʼa kĩ kyoka. Yesũ nĩwoonanisye kana ve andũ angĩ makathayũũkwʼa yĩla waisye atĩĩ: “Saa nĩwũkĩte yĩla ala onthe me mbũanĩ makewʼa wasya wake namo makauma, ala meekie maũndũ maseo kwa ũthayũũkyo wa thayũ, na ala meekie maũndũ mathũku kwa ũthayũũkyo wa ũsilĩlo.”—Yoana 5:28, 29.

Nao nata ĩũlũ wa atũmwa na Aklĩsto angĩ avũthũ ala makethĩwa na Yesũ ĩtunĩ? Mbivilia yaĩtye ũũ ĩũlũ wamo: “Makeethĩwa athembi ma Ngai na ma Klĩsto, na makasumbĩka me asumbĩ vamwe nake myaka 1,000.” (Ũvuanyʼo 20:6) Andũ asu makasumbĩka vamwe na Klĩsto nĩ aũme na aka maumĩte kũũ nthĩ. Kwoou, me asumbĩ ĩtunĩ makeethĩwa me andũ me tei na mekũelewa mavata ma andũ ala makethĩwa kũũ nthĩ.—Ũvuanyʼo 5:10.

Yesũ akatũmĩa nthembo ĩla waumisye ya wovosyo nĩ kana atangĩĩe andũ kuma ũkombonĩ wa naĩ ĩla matiĩwe nĩ Atamu. E vamwe na ala makasumbĩka nake, makatetheesya andũ nginya methĩwe mate na naĩ. Vate nzika, ĩvindanĩ yĩu andũ makatanĩa kwĩkala ũndũ Ngai wendaa mwambĩĩonĩ yĩla weeie Atamu na Eva masyaane maingĩve mausũsye nthĩ. O na kĩkwʼũ kĩla twatiĩwe nĩ Atamu nũndũ wa naĩ ĩla weekie kĩikethĩwa vo ĩngĩ!

Maũndũ asu meanĩa, Yesũ akethĩwa eanĩsya maũndũ onthe ala Yeova wamwĩĩte nĩ eke. Mũthyanĩ wa Ũsumbĩki wa Myaka Ngili, Yesũ akatũngĩa Ĩthe wake Ũsumbĩ na ainengane andũ onthe mate na naĩ kwa Ĩthe wake. Mũtũmwa Vaulo aielesya ũndũ ũsu mũseo Yesũ ũkeka nũndũ e wĩnyivyo mwingĩ, aisye atĩĩ: “Yĩla syĩndũ syonthe ikaiwa ungu wake, nĩvo ĩndĩ ũ Mwana mwene ũkeyia ungu wa Ũla waiie syĩndũ syonthe ungu wake, nĩ kana Ngai ethĩwe syĩndũ syonthe kwa onthe.”—1 Akolintho 15:28.

Vate nzika, Yesũ e na kĩanda kĩnene nthĩnĩ wa kwĩanĩsya ieleelo sya Ngai. Na o ũndũ ieleelo isu sya Ngai ikethĩwa iendeee kwĩanĩa, nowʼo Yesũ ũkethĩwa aendeee kwĩanĩsya ndeto ii waneenie ĩũlũ wake mwene: “Nyie ninyie nzĩa na ninyie wʼo na ninyie thayũ.”—Yoana 14:6.