Tũtonya Kwĩmanyĩsya Kyaũ Kumana na Kĩngʼendilĩ?

Kĩngʼendilĩ kĩla tũtonya kwĩmanyĩsya ũndũ ĩũlũ wakyo nĩ kĩĩ ũkwona kĩineena na Yesũ vaa visanĩ. Kĩngʼendilĩ kĩĩ nĩkĩkwĩlila nũndũ wa mavĩtyo makyo. Kĩtavya Yesũ atĩĩ: “Wĩndilikana yĩla wĩvika ũsumbĩnĩ waku.” Yesũ eneena na kĩngʼendilĩ kĩĩ o tondũ ũkwona visanĩ ũũ. We nĩwĩsĩ Yesũ ekĩa ata?—a Yesũ ekĩa atĩĩ: ‘Nĩ wʼo nĩngũkwĩa ũmũnthĩ, ũkeethĩwa vamwe nakwa Ũseonĩ.’

We wĩĩsilya Ũseonĩ vakeethĩwa vailyĩ ata?— Nĩ kana tũkwate ũsũngĩo ũla waĩle, eka tũneene ĩũlũ wa vandũ vaseo vala Ngai waseũvĩisye asyai maitũ ma mbee, Atamu na Eva. Vandũ vau vaseo vaĩ va? Vaĩ ĩtunĩ kana vaĩ kũũ nthĩ?—

Ethĩwa wasũngĩa wasya nĩ kũũ nthĩ, wasũngĩa nesa vyũ. Kwoou ĩla tũkwasya kĩngʼendilĩ kĩu kĩkeethĩwa “Ũseonĩ,” twaĩle kũelewa kĩkeethĩwa vaa ĩũlũ wa nthĩ ĩtina wa yatwʼĩkĩthwʼa vandũ vaseo, kana yatwʼĩkĩthwʼa nthĩ nzaũ. Nthĩ ĩsu nzaũ ĩkeethĩwa ĩilyĩ ata?— Eka twone.

Mbivilia yaĩtye ĩla Yeova Ngai woombie asyai maitũ ma mbee, Atamu na Eva, amaiie vandũ vaseo vaa ĩũlũ wa nthĩ. Veetawa ‘mũũnda wa Eteni.’ We wĩsũanĩa ‘mũũnda ũsu wa Eteni’ ta waanakavĩte ata?— Vandũ vau vaĩ vaseo mũno na vaĩ vanake vyũ va kwĩkalwa mbee wa ũndũ ũtonya kũsũanĩa!

We wĩona ata? We Yesũ akeethĩwa vaa ĩũlũ wa nthĩ vamwe na kĩngʼendilĩ kĩu kyeelilile nũndũ wa mavĩtyo makyo?— Aiee, Yesũ akeethĩwa e ĩtunĩ asumbĩkĩte nthĩ nzaũ. Kwoou, kwasya Yesũ akeethĩwa na kĩngʼendilĩ kĩu nĩkwonanyʼa kana akakĩthayũũkya na aianĩsya mavata makyo kĩ vandũ vaseo vaa ĩũlũ wa nthĩ yĩ nzaũ. Ĩndĩ wĩona nĩkĩ Yesũ ũketĩkĩlya mũndũ waĩ kĩngʼendilĩ ekale nthĩ nzaũ?— Eka tũsũngĩe ĩkũlyo yĩu.

Kĩngʼendilĩ kĩu nĩkyeekie maũndũ maingĩ mathũku. O na kwĩ andũ angĩ aingĩ mũno meekie maũndũ mathũku. Ĩndĩ, aingĩ moo meekie maũndũ asu nũndũ mayaamanyĩwʼa ĩũlũ wa Yeova na mayeesĩ maũndũ ala wendaa meke.

Kwoou andũ ta asu, vamwe na kĩla kĩngʼendilĩ Yesũ waneenie nakyo kyambĩtwe mũtĩnĩ, makathayũũkwʼa mekale vaa ĩũlũ wa nthĩ yĩ nzaũ. Makamanyĩwʼa kwenda kwa Ngai. Na ĩndĩ, makeethĩwa matonya kwonanyʼa ethĩwa nĩmamwendete Yeova.

We nĩwĩsĩ makoonanyʼa ũu ata?— Makoonanyʼa ũu kwa kwĩka kwenda kwa Ngai. Ũkeethĩwa wĩ ũndũ mũseo mũno kwĩkala vamwe na andũ mamwendete Yeova na mendene mo ene vaa ĩũlũ wa nthĩ yatwʼĩkĩthwʼa nthĩ nzaũ!