Mwana-a-asa Mweũ Nzamanĩ Ĩla Ĩtongoesye

Kwĩ Matukũ 5, Mwei wa 9, 2012, Wakatatũ kwakya, Mbetheli ya Amelika na ya Canada nĩsyatangaasĩwe kana mwana-a-asa ũngĩ nĩwongelilwe nthĩnĩ wa Nzama Ĩla Ĩtongoesye ya Ngũsĩ sya Yeova. Kwambĩĩa Ĩtukũ 1, Mwei wa 9, 2012, Mark Sanderson nĩwambĩĩe kũthũkũma nthĩnĩ wa Nzama Ĩla Ĩtongoesye.

Mwana-a-asa Sanderson aeewe mũsyĩnĩ wĩtawa San Diego, California, Amelika, nĩ asyai Aklĩsto na avatisiwe Matukũ 9, Mwei wa 2, 1975. Ambĩĩe kũthũkũma e vainia vandũ vetawa Saskatchewan, Canada, kwĩ Ĩtukũ 1, Mwei wa 9, 1983. Nawʼo Mwei wa 12, 1990, Mwana-a-asa Sanderson e nthĩ ya Amelika nĩwʼo waminie kĩlasi kya mũonza kya Shule ya Mazoezi ya Kihuduma (ĩla ũmũnthĩ yĩtawa Sukulu ya Mbivilia ya Ana-a-asa Matatwaanĩte). Nĩwatwʼĩkie vainia wa mwanya kĩthamanĩ kya Newfoundland, Canada, Mwei wa 4, 1991. Ĩtina wa kũthũkũma e mũsyaĩĩsya wa mũthyũlũlũko wa kũtetheesya, nĩwathokiwʼe akathũkũme Mbetheli ya Canada Mwei wa 2, 1997. Kwĩ Mwei wa 11, 2000, nĩwathaamĩiwʼe Mbetheli ya Amelika. E kũu, nĩwathũkũmie Mũvĩanĩ wa Maũvoo ma Sivitalĩ na ĩtina athũkũma Mũvĩanĩ wa Ũthũkũmi.

Mwei wa 9, 2008, Mwana-a-asa Sanderson nĩwaendie Sukulu ya Ala me Kamitiinĩ ya Ovisi wa Ũvonge, na ĩtina wa vau nĩwanyuviwe ethĩwe ũmwe wa ala me Kamitiinĩ ya Ovisi wa Ũvonge wa Philippines. Mwei wa 9, 2010, nĩwakũlilwʼe asyoke Amelika, na athũkũma e mũtetheesya nthĩnĩ wa Kamitii ya Ũthũkũmi ya Nzama Ĩla Ĩtongoesye.