Mwana-a-asa Mweũ Nzamanĩ Ĩla Ĩtongoesye

ANA-A-ASA ala me Mbetheli ya Amelika na ya Canada nĩmatangaasĩiwe kĩmanyĩthya kya kũtanĩthya kwĩ Wakatatũ kwakya Matukũ 24, Mwei wa 1, 2018. Meeiwe Mwana-a-asa Kenneth Cook, Jr. nĩwongelilwe nthĩnĩ wa Nzama Ĩla Ĩtongoesye ya Ngũsĩ sya Yeova.

Mwana-a-asa Cook asyaĩwe kĩsionĩ kĩmwe kĩ Pennsylvania, Amelika, na no kwʼo weanĩe. Amanyĩiwʼe ũwʼo nĩ mwanake masomaa ĩmwe na aũkwatie kavinda kakuvĩ atanamina sekondalĩ. Avatisiwe Matukũ 7, Mwei wa 6, 1980. Ambĩĩe ũvainia wa kĩla ĩvinda Ĩtukũ 1, Mwei wa 9, 1982. Aminie myaka ĩlĩ na eetwa Mbetheli. Ũthũkũmi wake wa Mbetheli awambĩĩie Wallkill, New York, Matukũ 12, Mwei wa 10, 1984.

Myakanĩ 25 ĩla yaatĩĩe, Mwana-a-asa Cook nĩwanengiwe mawĩa me kĩvathũkanyʼo vala vatumbĩthĩawʼa mavuku, na Ovisinĩ wa Mbetheli. Atwaie Jamie 1996, na matwaana Jamie nĩwookie kũthũkũma nake Wallkill. Mweinĩ wa 12, 2009, Mwana-a-asa na Mwĩĩtu-a-asa Cook nĩmathamĩĩiwʼe Watchtower Educational Center, ĩla yĩ Patterson, New York. Me vau, Mwana-a-asa Cook anengiwe wĩa mũvĩanĩ ũla ũsũngĩaa makũlyo ala matũmwa nĩ asomi ma mavuku maitũ (Writing Correspondence Department). Nĩmasyokie matũngwa Wallkill, na ĩtina wa kavinda kanini twĩ Mwei wa 4, 2016, mathamĩĩwʼa Brooklyn, New York. Mekalile myei ĩtano, na ĩndĩ mathamĩĩa ovisinĩ ũla mũnene wĩ Warwick, New York. Kwĩ Mwei wa 1, 2017, Mwana-a-asa Cook nĩwanyuviwe atwʼĩke mũtetheesya nthĩnĩ wa Kamitii ya Ũandĩki ya Nzama Ĩla Ĩtongoesye.