“Sisya, Nĩngũtwʼa Maũndũ Onthe Meũ”

We na andũ ma mũsyĩ waku nĩmwendaa kwĩthĩwa na ũima wa mwĩĩ, na kwĩkala myaka mingĩ? Nĩmwendaa kwĩkala nthĩ ĩte na woo, mathĩna, na kĩkwʼũ? Ti ndoto kwĩthĩwa na nthĩ ĩilyĩ ũu. Ĩndĩ, o mĩtũkĩ kũkeethĩwa na nthĩ nzaũ yĩ na ũlũngalu, nũndũ ũu nĩwʼo Yeova Ngai ũtwʼĩte kwĩka. Kwasisya ũndũ kwĩanĩwʼa kwa ũndũ ũsu kũeleetwʼe ĩandĩkonĩ ya Ũvuanʼyo 21:3-5.—Soma.

“[Ngai] akavyaĩa methoi onthe methonĩ moo.” (Ũvuanʼyo 21:4) Nĩ methoi meva ũkavyaĩa? Ti methoi ma ũtanu kana methoi ala mathambasya metho ĩla malikwa nĩ kendũ. Ngai athanĩte kũvyaĩa methoi onthe ala maetawe nĩ thĩna kana kĩmeto. Ndakavyaĩa methoi moka, ĩndĩ akamina vyũ maũndũ ta mathĩna na kĩmeto, ala matumaa andũ maĩa.

“Kĩkwʼũ kĩikethĩwa vo ĩngĩ.” (Ũvuanʼyo 21:4) Kĩkwʼũ kĩtumaa andũ maĩa mũno. Yeova akamavetangĩa kĩkwʼũ andũ ala mamwĩwʼaa. Akeeka ũu ata? Akavetanga vyũ kĩla kĩtumaa tũkwʼa, nakyo nĩ naĩ ĩla yaetiwe nĩ Atamu. (Alomi 5:12) Yeova akatũmĩa nthembo ya wovosyo ya Yesũ nĩ kana atetheesye andũ ala ewi methĩwe mate na naĩ.a Ĩtina wa ũu mũmaitha wa mũminũkĩlyo, ũla nĩ kĩkwʼũ, ‘akaanangwa.’ (1 Akolintho 15:26) Ngai amina kwĩka ũu, andũ ala aĩkĩĩku makeethĩwa matonya kwĩkala tene na tene, me na ũima wa mwĩĩ o tondũ Ngai wendaa mekale.

“O na kũikethĩwa ĩngĩ . . . woo.” (Ũvuanʼyo 21:4) Nĩ woo wĩva ũtakethĩwa vo? Nĩ woo ũla wumanaa na kwalwʼa nĩ mwĩĩ, kũthĩnĩka kĩlĩkonĩ, na ngoonĩ. Woo ũsu nũtumĩte andũ milioni mbingĩ mekala mate na ũtanu, na ũkavetwa vyũ.

Vate nzika, o mĩtũkĩ andũ makekala vate methoi, kĩkwʼũ, na woo. Ĩndĩ, nũtonya kwĩkũlya atĩĩ: ‘Makekala va?’ ‘Mo andũ makakwata moathimo asu me ĩtunĩ?’ Aiee. Nĩkĩ tũkwasya ũu? Nũndũ ndeto sya mbee sya wathani ũsu syaĩtye ũũ: ‘Ĩeema ya Ngai yĩ vamwe na andũ,’ na andũ mekalaa vaa nthĩ. (Ũvuanʼyo 21:3) O na ĩngĩ, wathani ũsu nũeleetye ĩũlũ wa nthĩ ĩla ‘ĩtakethĩwa na kĩkwʼũ ĩngĩ.’ Ũu nĩ kwonanyʼa kana mbeenĩ nthĩ yaĩ na kĩkwʼũ, ĩndĩ ĩvindanĩ yu kĩikethĩwa vo ĩngĩ. Vai ĩvinda o na yĩmwe kwaaĩthĩwa kĩkwʼũ ĩtunĩ, ĩndĩ nĩ vaa ĩũlũ wa nthĩ andũ methĩĩtwe maikwʼa. Ũu wĩonanyʼa nesa kana watho ũsu wa Ngai ũkeanĩwʼa vaa ĩũlũ wa nthĩ.

Yeova eenda tũĩkĩĩe kana akaete nthĩ nzaũ yĩ ũlũngalu. Ĩtina wa kũweta ĩũlũ wa moathimo asu, atũĩkĩĩthĩtye ũũ: “Sisya, nĩngũtwʼa maũndũ onthe meũ.” Na ĩndĩ ayongeleela kwasya: “Ndeto ii nĩ sya kĩthito na nĩ sya wʼo.” (Ũvuanʼyo 21:5) We na ala ũmendete no mwĩmanyĩsye maũndũ maingangĩ ĩũlũ wa ũndũ mũtonya kwĩthĩwa katĩ wa athaithi atanu ma Yeova, ala makona watho wake ũyĩanĩa.