Ũvuanyʼo 21:4—“Akavangũla Vyũ Methoi Onthe”

“Akavangũla methoi onthe methonĩ moo, na kĩkwʼũ kĩikethĩwa vo ĩngĩ, o na kũikethĩwa ĩngĩ kĩmeto kana kĩĩo kana woo. Maũndũ ma mbee nĩ mavĩtu.”—Ũvuanyʼo 21:4, Ũalyũlo wa Nthĩ Nzaũ wa Maandĩko ma Kĩkiliki ma Kĩklĩsto.

“Akavangũla vyũ methoi onthe methonĩ moo, na kĩkwʼũ kĩikethĩwa vo ĩngĩ, o na kũmeta kana kĩĩo kana woo iikethĩwa vo ĩngĩ, nũndũ maũndũ ma mbee nĩ mavĩtu.”—Ũvuanyʼo 21:4, English Standard Version.

Kĩla Ĩandĩko ya Ũvuanyʼo 21:4 Yonanasya

Ngai athanĩte kana akavetanga woo na mathĩna onthe ala makwataa andũ ũmũnthĩ, o vamwe na kĩla kĩetae mathĩna asu.

“Akavangũla methoi onthe methonĩ moo.” Ndeto ii ikindĩlĩĩle watho wa Yeovaa ũla waandĩkiwe nĩ mwathani Isaia. Waĩtye atĩĩ: “akavyaĩa methoi mothyũnĩ onthe.” (Isaia 25:8; Ũvuanyʼo 7:17) Ndeto ii syĩonanyʼa ũndũ Ngai wĩwʼĩaa tei mwingĩ onthe ala maĩaa nũndũ wa kũkwʼĩĩwa nĩ endwa moo, kana o mathĩna angĩ.

”Kĩkwʼũ kĩikethĩwa vo ĩngĩ.” O na ĩngĩ, ndeto ii no ialyũlwe ta “kĩkwʼũ kĩikaendeea kwĩthĩwa vo ĩngĩ” kana “kũikethĩwa na kĩkwʼũ o na vanini.” Ngai nũtwathĩte kũvetanga kĩkwʼũ vyũ vamwe na mathĩna ala kĩetae. O vamwe na ũu, ala makwie makathayũũkwʼa. (1 Akolintho 15:21, 22) Na mũthya, kĩkwʼũ ‘kĩkaminwa.’—1 Akolintho 15:26.

“O na kũikethĩwa ĩngĩ kĩmeto kana kĩĩo kana woo.” Watho ũsu wa Ngai ndũkwonanyʼa kana andũ maikewʼaa woo o na ũmwe, ta kwa ngelekanyʼo woo ũla twĩwʼaa mĩĩnĩ yitũ na ũtũsiĩaa tũikalike mũisyonĩ kana tũikaũmĩe. Vandũ va ũu, watho ũsu wĩonanyʼa kana maũndũ ala matũthĩnasya kĩlĩkonĩ, ngoonĩ, o vamwe na kyalya kĩla kĩtũkwataa nũndũ wa naĩb iikethĩwa vo ĩngĩ.—Alomi 8:21, 22.

“Maũndũ ma mbee nĩ mavĩtu.” Ndeto isu sya kũminĩĩa syĩonanyʼa moalyũku me kĩvathũkanyʼo ala andũ makeyonea. Ĩvuku yĩmwe yaĩtye atĩĩ: “Maũndũ ala makothaa kũkwata andũ na ũyĩthĩa vai ũndũ meka makevathana namo ta kĩkwʼũ, kĩmeto, kũĩa, na kyalya, makavetangwa vyũ. Na vandũ va ũu maũndũ makaseũva methĩwe me meũ.” Ĩvindanĩ yĩu, andũ makeethĩwa matonya kũtanĩa thayũ vaa ĩũlũ wa nthĩ tene na tene maũndũ me maseo, o tondũ Ngai wavangĩte kuma mwambĩĩonĩ.—Mwambĩlĩlyo 1:27, 28.

Mĩsoa Ĩla Ĩthyũlũlũkĩte Ũvuanyʼo 21:4

Kĩlungu kya 21 kĩyambĩĩa, mũtũmwa Yoana aeleetye kĩla woonie woninĩ. Aĩtye atĩĩ: “Noona ĩtu yeũ na nthĩ nzaũ.” (Ũvuanyʼo 21:1) Aeleetye kwa nzĩa ya ngelekanyʼo ũalyũku mũnene ũla ũeleetwʼe mĩsoanĩ ĩngĩ Mbivilianĩ. (Isaia 65:17; 66:22; 2 Vetelo 3:13) Silikalĩ ya Ngai ya ĩtunĩ, kana “ĩtu yeũ,” ĩkavetanga silikalĩ sya andũ syonthe na ĩisumbĩka “nthĩ nzaũ” ĩla nĩ andũ ala makethĩwa matwĩe ĩũlũ wa nthĩ ĩvinda yĩu.—Isaia 65:21-23.

Nĩ kyaũ kĩkwonanyʼa kana woni ũsu ũkonetye thayũ vaa ĩũlũ wa nthĩ? Mbee, watho ũsu wa Ngai wambĩĩe na ndeto ii: “Ĩeema ya Ngai yĩ vamwe na andũ.” (Ũvuanyʼo 21:3) Kwoou watho ũũ ndwathĩtwe alaĩka ĩtunĩ, ĩndĩ nĩ andũ vaa ĩũlũ wa nthĩ. Kelĩ, woni ũsu ũeleetye ĩũlũ wa nthĩ vala ‘kĩkwʼũ kĩtakethĩwa vo ĩngĩ.’ (Ũvuanyʼo 21:4) Vaiĩ ĩvinda o na yĩmwe kĩkwʼũ kyaaĩthĩwa ĩtunĩ, ĩndĩ kĩkwataa o andũ vaa ĩũlũ wa nthĩ. (Alomi 5:14) Kwoou nĩ ũndũ wosanĩte na kĩlĩko kũtwʼa kana mũsoa ũũ ũeleetye ĩũlũ wa maũndũ ma ĩvinda yũkĩte vaa ĩũlũ wa nthĩ.

Ĩloele vitio ĩĩ nguvĩ wone maelesyo makuvĩ ma ĩvuku ya Ũvuanyʼo.