Ũsumbĩ wa Ngai Ũkeanĩsya Maũndũ Meva?

MAŨNDŨ ALA ŨSUMBĨ WA NGAI WĨANĨĨTYE

Kĩlungu kĩvĩtu nĩkyonanĩtye maũndũ ala Yesũ wawetie maĩ monanyʼe kana Ũsumbĩ wa Ngai nũsumbĩkĩte ĩtunĩ. Maũndũ asu nĩmaĩkĩĩthĩtye nesa vyũ kana Ũsumbĩ wa Ngai yu nũsumbĩkĩte ĩtunĩ, Yesũ Klĩsto e Mũsumbĩ.

Mbivilia yaĩtye kana ũndũ wa mbee ũla Yesũ waĩ eke atwʼĩka Mũsumbĩ nĩ kũvetanga Satani na ndaimoni syake ĩtunĩ. Yu maũndũ ala Satani na ndaimoni syake mekaa matonya kũũmĩsya o syũmbe ila syĩ ĩũlũ wa nthĩ ve voka, na nĩkyo kĩtumi kuma mwaka wa 1914 kwĩthĩĩtwe na mothũku maingĩ mũno ĩũlũ wa nthĩ.—Ũvuanyʼo 12:7, 9.

O na kũtwʼĩka kwĩ mathĩna maingĩ ĩũlũ wa nthĩ, ve maũndũ Yesũ, e Mũsumbĩ wa Ũsumbĩ wa Ngai, wĩkĩte nĩ kana atetheesye andũ ĩũlũ wa nthĩ. Nũndũ wa wĩa wa kũmanyĩsya andũ Mbivilia ũla Yesũ wathanie, andũ aingĩ nĩmeemanyĩĩtye myolooto ya Mbivilia na nĩmamĩtũmĩaa kĩla mũthenya. (Isaia 2:2-4) Andũ milioni mbingĩ nĩmemanyĩĩtye kwĩthĩwa na woni waĩle ĩũlũ wa wĩa. O na nĩmemanyĩĩtye ũndũ matonya kwĩthĩwa na mĩsyĩ yĩ na ũtanu na ũndũ matonya kũtũmĩa malĩ yoo nesa matekwona ũmanthi ta wʼo ũndũ ũla wa vata thayũnĩ. Maũndũ asu nĩmamatetheesye kwĩkala na ũtanu ũmũnthĩ na makamatetheesya kwĩyũmbanyʼa ũndũ makekala Ũsumbĩnĩ wa Ngai.

NĨ MAŨNDŨ MEVA ŨSUMBĨ WA NGAĨ ŨKEANĨSYA?

O na kau yu tũĩ Yesũ nũsumbĩkĩte ĩtunĩ, silikalĩ sya andũ no siendeee kũsumbĩka vaa ĩũlũ wa nthĩ. Ĩndĩ o na ũu wĩ o vo, Ngai amwĩĩte Yesũ atĩĩ: “Sumbĩka katĩ wa amaitha maku.” (Savuli 110:2) O mĩtũkĩ, Yesũ akasinda amaitha make vyũ yĩla ũkananga onthe ala mavĩngaa Ũsumbĩ wa Ngai na aimavonokya ala mamwĩwʼaa Ngai.

Ĩvindanĩ yĩu, Ũsumbĩ wa Ngai ũkeeka maũndũ aa:

• Ũkaananga ndĩni sya ũvũngũ. Ndĩni sya ũvũngũ ila syĩthĩĩtwe iimanyĩsya ũvũngũ ĩũlũ wa Ngai na ikathĩnyʼa andũ kwa ĩvinda yĩasa ikavetwa vyũ. Mbivilia yĩtĩte ndĩni sya ũvũngũ ĩlwaya. Kwanangwa kwayo kũkatelemya andũ aingĩ mũno.—Ũvuanyʼo 17:15, 16.

• Ũkamina mosumbĩ ma andũ. Ũsumbĩ wa Ngai ũkoosa ĩtambya wanange vyũ mosumbĩ onthe ma andũ.—Ũvuanyʼo 19:15, 17, 18.

• Ũkaananga andũ athũku. Nao nata andũ ala matwʼĩte kwĩka ũla ũthũku na matamwĩwʼaa Ngai? Mbivilia yaĩtye: “Ala athũku makavetwa kuma ĩ nthĩ.”—Nthimo 2:22.

• Ũkavetanga Satani na ndaimoni syake. Satani na ndaimoni maikethĩwa matonya ‘kũkenga mbaĩ ĩngĩ.’—Ũvuanyʼo 20:3, 10.

Maũndũ asu meekĩka, kũkeethĩwa kũilyĩ ata kwa ala metĩkĩlĩte Ũsumbĩ wa Ngai?

MOATHIMO ALA ŨSUMBĨ WA NGAI ŨKAETEE ANDŨ

Yesũ e Mũsumbĩ ĩtunĩ, akeanĩsya maũndũ maingĩ mũno kũvĩtũka mũsumbĩ ũngĩ o na wĩva ũla waasumbĩka. Akatetheewʼa nĩ andũ angĩ 144,000 ala manyuvĩtwe kuma kũũ nthĩ mesumbĩka vamwe nake. (Ũvuanyʼo 5:9, 10; 14:1, 3) Akaĩkĩĩthya kana kwenda kwa Ngai nĩkweekwa vaa ĩũlũ wa nthĩ. Wʼo Ũsumbĩ wa Ngai ũkeanĩsya kyaũ kwondũ wa andũ vaa ĩũlũ wa nthĩ?

• Ũkavetanga mowau na kĩkwʼũ. “Ũla ũtwĩe kwʼo ndakasya, nyie nĩ mũwau,” na “kĩkwʼũ kĩikethĩwa vo ĩngĩ.”—Isaia 33:24; Ũvuanyʼo 21:4.

• Ũkaetee andũ mũuo wa wʼo na ũivetanga mũisyo. “Mũuo wa syana syaku ũkeethĩwa mwingĩ,” na “makekalaa kĩla mũndũ ĩtina wa mũsavivũ wake na ĩtina wa mũkũyũ wake; na vati ũmwe ũkatuma makĩa.”—Isaia 54:13; Mika 4:4.

• Ũkatuma andũ methĩwa na wĩa wa kũtanĩthya. “Anyuve makwa makatanĩaa wĩa wa moko moo ĩvinda ĩasa. Matikathĩnĩa wĩa mana.”—Isaia 65:22, 23.

• Ũkaseũvya nthĩ. “Weũ na nthĩ nyũmũ ikatana; na yalata yĩkatana, na kũlaũka ta ĩlaa ya lose.”—Isaia 35:1.

• Ũkamanyĩsya andũ kĩla maĩle kwĩka nĩ kana mekale tene na tene. “Thayũ wa tene na tene nĩwʼo ũũ, maendeee kũkwata ũmanyi ĩũlũ waku, Ngai ũla wa wʼo weka, na ĩũlũ wa ũla wamũtũmie, nake nĩ Yesũ Klĩsto.”—Yoana 17:3.

Ngai nũkwenda wĩtanĩa moathimo asu. (Isaia 48:18) Kĩlungu kĩla kĩatĩĩe nĩkĩũkũtetheesya ũmanye kĩla waĩle kwĩka ũmũnthĩ nĩ kana wĩtanĩa ĩvinda yĩu ĩseo mũno.