Sũvĩa Wasya Waku wa Ngoo
1 Kĩla mũthenya, nĩtũkomanaa na maũndũ matonya kũtuma tũlea kũatĩĩa wasya witũ wa ngoo. Nĩkyo kĩtumi ũmbano mũnene wa mũthenya ũmwe wa mwaka wa ũthũkũmi wa 2013, ũla ũkambĩĩa Sevutemba 1, 2012, wĩ na kyongo “Sũvĩa Wasya Waku wa Ngoo.” (1 Tim. 1:19) Kĩeleelo kya ũmbano ũũ nĩ kũtetheesya kĩla ũmwe asũanĩĩe mũno ũndũ ũtũmĩaa mũthĩnzĩo ũũ wa vata kuma kwa Mũmbi witũ.
2 Makũlyo Ala Makasũngĩwa: Ũmbano ũũ ũkasũngĩa makũlyo aa mũonza ĩũlũ wa wasya wa ngoo:
• Nĩ kyaũ kĩeteae wasya wa ngoo mũisyo?
• Tũtonya kũmanyĩsya wasya witũ wa ngoo ata?
• Tũtonya kwĩthĩwa twĩ atheu kumana na nthakame ya andũ onthe ata?
• Kũsũanĩa kwitũ na kwĩka kwosana na myolooto ya Mbivilia kũvuanasya kyaũ ĩũlũ witũ?
• Tũtonya kwĩka ata tũikaũmĩsye andũ angĩ maũndũnĩ makonetye wasya wa ngoo?
• Andũ ma mũika, mũtonya kũmĩĩsya ata ĩla mwasukumwa kwĩka maũndũ maleanĩte na wasya wenyu wa ngoo?
• Ala maatĩĩaa wasya woo wa ngoo ũla ũtongoewʼe nĩ veva makwataa moathimo maũ?
3 Nĩtũtonya kũleana na nzĩa sya Satani sya kũvukya wasya witũ wa ngoo tũtetheewʼe nĩ Yeova. Kwĩsĩla Ndeto ya Ngai na ũseũvyo wake, Ĩthe witũ wa ĩtunĩ wĩ wendo etwĩa: “Nzĩa nĩ ĩno, endaai nayo.” (Isa. 30:21) Nzĩa ĩmwe Yeova ũendeee kũtũtongoesya nĩ kwĩsĩla ũmbano ũũ. Kwoou, vangĩĩa wĩĩthĩwa ũmbanonĩ ũsu mũthenya wʼonthe. Ĩthukĩĩsye nesa na ũisũanĩĩa ũndũ ũtonya kũtũmĩa ũvoo ũsu we mwene. Neenai ta mũsyĩ ĩũlũ wa maũndũ ala mwemanyĩsya. Kũtũmĩa maũndũ ala tũkemanyĩsya kũkatũlũlũmĩĩlya tũendeee kwĩthĩwa ‘twĩ na wasya mũseo wa ngoo’ na kũtũtetheesya tũikawʼe nĩ motanu mavĩtĩte ma nthĩ ya Satani.—1 Vet. 3:16.
[Makũlyo]
1. Kyongo kya ũmbano mũnene wa mũthenya ũmwe wa mwaka wa ũthũkũmi wa 2013 nĩ kĩva, na kĩeleelo kya ũmbano ũsu nĩ kyaũ?
2. Nĩ makũlyo maũ ma vata makasũngĩwa ũmbanonĩ ũũ mũnene wa muthenya ũmwe?
3. Ũmbano ũũ ũtonya kũtũtetheesya ata?