Maũndũ Mekĩkĩte

◼ Australia: John aĩ mũndũũme mũsomu. Nĩwaendaa ĩkanisanĩ e mũnini, ĩndĩ ĩtina nĩwambĩĩie kũĩkĩĩa kana kũi Ngai. Vainia ũmwe nĩwamũtiĩe mbulosua Uhai—Ulitokana na Muumba? Ĩla wamũsyokeie, nĩwamũtiĩe mbulosua Chanzo cha Uhai. Vainia ũsu nĩwaendeeie kũmũtwaĩa makaseti ala maneeneaa ĩũlũ wa wũmbi kana ĩũlũ wa wathani wa Mbivilia nĩ kana mamwĩkĩe mea ma kwĩmanyĩsya. Ĩtina wa ĩvinda, nĩwamũnengie John ĩvuku Biblia—Neno la Mungu au la Binadamu? Amina kũyĩsoma, John aisye kana we ndaweta kwĩ Ngai kana kũi Ngai. Nĩvo ĩndĩ vainia ũsu wamũnengie ĩvuku Mbivilia Ĩmanyĩasya, na amwonyʼa ĩthangũ ya 20, kalungu ka 8, na ĩthangũ ya 23-24, kalungu ka 13-16. Maandĩko ala monanĩtwʼe tũlungunĩ tũu nĩmamwendeeisye John mũno na asya, “Nĩona naĩle kwĩmanyĩsya Mbivilia mũnango.”

◼ Mexico: Mũndũũme ũmwe eeie mũtavanyʼa kana we ndaĩkĩĩaa kana Mbivilia nĩ mbeveee. Mũtavanyʼa ũsu nĩwamwonisye maũndũ ma kũĩkĩĩthya kana Mbivilia nĩ mbeveee. Nĩmaendeeie kũneenea Mbivilia kwa kavinda, na mũndũũme ũsu endeewʼa mũno nĩ maũndũ ala weemanyĩasya. Nĩwatanĩie mũno kwĩmanyĩsya ĩũlũ wa myolooto ya Ngai. Eeie mũtavanyʼa ũsu atĩĩ: “Mbeenĩ twasoma Mbivilia nĩ naku , nonaa ta tũũsoma ĩvuku ta mavuku ala angĩ, na ũtao wayo ndwandethasya. Ĩndĩ yu twamĩsoma, na mũno mũno twasoma ũtao wayo ĩũlũ wa mwĩkalĩle, nĩwʼaa ngoo yakwa yaũmĩa.”

◼ Amelika: Mũndũ ũmwe na mũka maitavanyʼa nthĩnĩ wa taoni nene maitũmĩa mesa ya kwilĩĩla mavuku, nĩmakomanie na kĩveti kĩmwe kuma nthĩ ya Taiwan. Kĩveti kĩu, o na kaũ nĩkyaĩkĩĩaa kwĩ Ngai, kyoonaa Mbivilia nĩ ĩvuku ya asũngũ. Nĩkyo kyeetwaie vala mailĩĩle mavuku. Kyeewʼaa kĩte kĩanĩe, o na kaũ kyaĩ kĩthwii. Kyeekwatasya Mbivilia no ĩkĩtetheesye kĩkethĩwa na kĩeleelo thayũnĩ. Mũndũ ũsu na mũka nĩmambĩĩie kwĩmanyĩsya nakyo maitũmĩa ĩvuku Mbivilia Ĩmanyĩasya, vamwe na mbulosua Lasting Peace and Happiness—How to Find Them. Vandũ va kwĩmanyĩsya kĩlungu kya 2 nthĩnĩ wa ĩvuku yĩu, maneeneie kĩlungu kĩla kĩ na kyongo, “A Guidebook for the Blessing of All Mankind” nthĩnĩ wa mbulosua. Ĩtina wa kũneenea tũlungu twa mbee thanthatũ, kĩveti kĩu kyasengʼie mũno kwona ũndũ Mbivilia yĩ kĩvathũkanyʼo vyũ na mavuku angĩ ma ndĩni. Mamina kũneenea wathani wa Mbivilia ũla wĩanĩĩte, kyaisye, “Vaĩi ĩvuku yĩngĩ yĩneenaa maũndũ ma wʼo ta Mbivilia!”

◼ Japan: Ĩtina wa mwene nyũmba ũmwe kwasya kana we ndaĩkĩĩaa kana kwĩ Ngai, mũtavanyʼa ũla wamũthokeete ndaakwʼa ngoo, ĩndĩ nĩwaendeeie kũmũsyokea. Asyoka, matũmĩaa ĩvinda ĩkuvĩ kũneenea ũvoo kuma ĩkasetinĩ ya Amkeni! ũla wĩthĩawa na kyongo, “Je, Ni Kazi ya Ubuni?” O kavola, mũndũũme ũsu nĩwaalyũlile woni wake na ambĩĩa kwĩtĩkĩla kana nĩvatonyeka ũkethĩa kwĩ Mũmbi. Ũmũnthĩ nũĩkĩĩaa kana kwĩ Ngai, na aendeee kwĩmanyĩsya mbulosua Ũvoo Mũseo Kuma kwa Ngai! vamwe na mũtavanyʼa ũsu.

◼ Canada: Mwĩĩtu-a-asa ũmwe nĩwanengie kĩveti kĩmwe makaseti kyumaalĩte nyũmba kĩlike ngalĩnĩ yakyo. Yĩla mwĩĩtu-a-asa ũsu wakĩsyokeie, kyamwĩie na ngũlũ kana kĩikwendeewʼa na kĩyĩĩkĩĩaa kana kwĩ Ngai. Mwĩĩtu-a-asa ũsu ndaakwʼa ngoo ĩndĩ nĩwatwie kũkĩtwaĩa mbulosua Jinsi ya Kupata Maisha Yenye Kuridhisha. Ĩla wakĩthĩie mũsyĩ, mwĩĩtu-a-asa ũsu akĩie, “O na kau ndũĩkĩĩaa kana kwĩ Ngai, nĩthĩĩtwe ndĩũsũanĩa mũno nũndũ nĩnĩsĩ ndwĩ na mũũme na wĩthĩawa na ĩvinda yũmũ kũea syana.” Nĩwakyonisye kalungu ka 6 ĩthangũnĩ ya 4 mbulosuanĩ ĩsu, kala kaneenee vala tũtonya kũkwata ũtao mũseo. Nĩwakĩkĩie vinya kĩsome maũndũ ala me ĩsomonĩ ya 2 ĩũlũ wa kũea syana. Kĩveti kĩu nĩkyatanie mũno na kyeetĩkĩla mbulosua ĩsu.