Ndũkakilye
1. Tũtonya kũatĩĩa ngelekanyʼo ya mũtũmwa Vaulo ata ĩla tũũtavanyʼa na andũ angĩ?
1 Mũtũmwa Vaulo oonaa mavinda ala watũmĩaa na Aklĩsto ala angĩ ne mwanya mũseo wa ‘kũkiakianʼya.’ (Alo. 1:12) Ĩla ũũtavanyʼa na mũndũ ũngĩ, nĩwosaa mwanya ũsu ũkamwĩkĩa vinya na kũmũtetheesya? Vandũ va kũkilya, no ũelesye ũla ũũtavanyʼa nake kĩla kĩũtetheesye kwĩthĩwa wĩ mũtavanyʼa mũseo.
2. Tũtonya kwĩka ata nĩ kana tũmekĩe vinya ala tũũtavanyʼa namo methĩwe na ũkũmbaũ, na nĩkĩ kwĩka ũu nĩ ũndũ wa vata?
2 Mekĩe Vinya Methĩwe na Ũkũmbaũ: Atavanyʼa amwe nĩmethĩawa na wia. Wia ũsu no woneke mothyũnĩ moo kana kwĩsĩla wasya woo. Nĩtũtonya kũmekĩa vinya methĩwe na ũkũmbaũ kwa kũmakatha kuma ngoonĩ. Nĩ nzĩa ingĩ syĩva tũtonya kũtũmĩa kũmekĩa vinya methĩwe na ũkũmbaũ? Mũsyaĩĩsya ũmwe wa kũthyũlũlũka nũeleasya ũla ũkũtavanyʼa nake ũndũ we wĩthĩawa na wia na kana we nũvoyaa mavinda maingĩ nĩ kana wia ũsu ũthele. Mwana-a-asa ũngĩ aiweta kĩla kĩmũtetheeasya kũmina wia aisye: “Kwĩthĩwa na ũthyũ mũtanu ĩla ngwambĩĩa kũneena na andũ nĩkũndethasya. Ti laisi kwĩka ũu; mavinda amwe no nginya nĩvoye.” Ethĩwa ve maũndũ maũtetheesye kwĩthĩwa na ũkũmbaũ ĩla ũũtavanyʼa, elesya ũla ũũtavanyʼa nake maũndũ asu.
3. Nĩ maũndũ maũ tũtonya kũneenea na ũla tũũtavanyʼa nake nĩ kana mamũtetheesye kwĩthĩwa e mũtavanyʼa mũseo?
3 Maelesye Nzĩa sya Kũtavanyʼa Ila Wonete syĩ Nzeo: Ve ĩkũlyo kana nzĩa wonete yĩ laisi ya kwambĩĩsya ũneeni vamwe na mwene nyũmba? Ve ũndũ wa kwasya nthĩnĩ wa Ũthũkũmi Witũ wa Ũsumbĩ wonete wĩ na mosyao maseo ĩtina wa kũũtũmĩa wongelete ndeto syaku? Elesya ũla ũũtavanyʼa nake maũndũ asu. (Nth. 27:17) Yĩla mũendete ĩsyokeonĩ, nũtonya kũmũelesya kĩla mũũthi kũneenea na mwene nyũmba, na ũndũ ũvangĩte kwĩka ũu. Ĩtina wa kwĩmanyĩsya na mũndũ, no ũelesye ũla wĩ nake nĩkĩ wanyuva kũneenea ũndũ mũna, ĩandĩko ĩna, kana watũmĩa nzĩa na ya kũmanyĩsya nĩ kana ũtetheesye mũmanyĩwʼa waku.
4. Nĩkĩ twaĩlĩte kwendeewʼa nĩ kũtetheesya atavanyʼa ala angĩ?
4 Aklĩsto ma ĩvinda ya atũmwa mayatetheeasya andũ ala mataĩ Aklĩsto oka. Nĩmoonaa vata wa kwĩkĩana vinya ene kwa ene. (Meko 11:23; 15:32) Mũtũmwa Vaulo nĩwamanyĩisye Timotheo na amũthuthya atavye angĩ maũndũ ala wamũmanyĩisye. (2 Tim. 2:2) Ĩla tweeka angĩ nesa ĩla twĩ ũtavanyʼa, nĩtũmatetheeasya methĩwe atanu na methĩwe atavanyʼa aseo. Ĩngĩ, nĩtũmũtanĩthasya Ĩthe waitũ wa ĩtuni, Yeova.—Aevl. 13:15, 16.