Ũndũ Tũtonya Kũtũmĩa Vitio sya Kũmanyĩsya Andũ Mbivilia

Twĩthĩawa na vitio inya iseũvĩtwʼe kwondũ wa kũmanyĩsya andũ Mbivilia yĩla twĩ ũtavanyʼa. Kĩeleelo kya kĩla ĩmwe nĩ kĩva?

• 

  Nĩkĩ Waĩle Kwĩmanyĩsya Mbivilia?—Vitio Nima ĩseũvĩtwʼe ĩtetheesye andũ mendeewʼe nĩ Mbivilia o na ethĩwa nĩ ma ndĩni yĩva. Yĩkĩaa vinya ala meũmĩloela masome Mbivilia nĩ kana makwate mosũngĩo ma makũlyo ala ma vata thayũnĩ, na ĩimonyʼa makũlyo amwe Mbivilia ĩsũngĩĩte kwa nzĩa yosanĩte na kĩlĩko. O na nĩeleetye ũndũ mũndũ ũtonya kũkũlya amanyĩwʼe Mbivilia.

• 

  Nĩkĩ Waĩle Kwĩmanyĩsya Mbivilia? (ĩla nguvĩ) yĩ na ũvoo ũvwʼanene na ũla wĩ vitionĩ ĩla nima, ĩndĩ nĩ nguvĩ vyũ kwĩ ĩsu. No ĩtetheesye isionĩ ila andũ matethĩawa na ĩvinda yingĩ ya kũea ngewa.

• 

  Twĩkaa Ata Ĩla Tũũmanyĩsya Mũndũ Mbivilia? ĩseũvĩtwʼe ĩtetheesye andũ mendeewʼe nĩ mũvango witũ wa kũmanyĩsya andũ Mbivilia vate ndĩvi. O na nĩsũngĩaa makũlyo amwe ĩũlũ wa mũvango ũsu, ala nĩ vamwe na ũndũ mũndũ ũtonya kũkũlya ambĩĩe kũmanyĩwʼa.

• 

  Wĩmũthokye Ĩmanyĩsyonĩ Yaku ya Mbivilia ĩseũvĩtwʼe kwondũ wa amanyĩwʼa ma Mbivilia. O na kau vitio ĩĩ yĩ ĩthangũnĩ ya kelĩ ya ĩvuku, Tanĩa Thayũ Tene na Tene!, no ĩtũmĩwe mũyĩmanyĩsya na mũndũ mbulosua Tanĩa Thayũ Tene na Tene! Vitio ĩĩ nĩeleetye maũndũ ala me ĩvukunĩ yĩu na kĩla mũmanyĩwʼa ũtonya kwĩkwatya kwona kana kwĩwʼa mũyĩmanyĩsya.

O na kau kĩla vitio ĩseũvĩtwʼe yĩ na kĩeleelo kyayo, no wonyʼe mũndũ kana ũkamũtũmĩa vitio o na yĩva katĩ wa isu ĩla ũkwona ĩmwaĩle. Atavanyʼa meĩkĩwa vinya methĩwe mesene nesa na vitio isu, na mayĩitũmĩaa nesa ũtavanyʼanĩ.