Wendo wa Ngai Wĩkalaa Tene na Tene

1-2. Yĩla Mũklĩsto wakwatwa nĩ ũndũ mũmũ, atonya kwĩwʼa ata?

KWASŨANĨA ĩũlũ wa ĩsiwa yĩ ũkanganĩ na kwĩ kĩuutani kingĩ. Kwĩ na itulumo nene ikwetye kũyĩkya kũũ na kũũ. Ĩndĩ nĩ kana yĩeke kwĩkangwʼa nĩ itulumo, no nginya mũndũ atheesye nanga. Nanga ĩsu ĩkwatĩĩaa ĩsiwa yĩu yĩkalũma vyũ na ũyĩthĩa yĩyĩsa kũkuwa nĩ itulumo na kĩuutani yĩkatwawa kũndũ kũngĩ.

² Yĩla wakwatwa nĩ ũndũ mũmũ, no wĩwʼe o ta ĩsiwa yĩu. Ndatĩka ĩmwe no wĩthĩwe na ũtanu, na ndatĩka ĩla ĩngĩ ũyambĩĩa kwĩwʼa ũkwʼĩte ngoo. Kana mũthenya ũmwe no wĩthĩwe ũte na nzika o na vanini kana Yeova nũkwendete na nũkũtetheeasya; ĩndĩ mũthenya ũla ũatĩĩe ũyambĩĩa kwĩkũlya kana kwa wʼo we nĩwene maũndũ ala maũkwatĩte. (Sav. 10:1; 13:1) Na nĩvatonyeka mũnyanyau akaũtavya ndeto sya kũũkiakisya iũtuma wĩwʼa kavaa kwa kavinda. (Nth. 17:17; 25:11) Na ĩndĩ ũikwatwa nĩ ila nzika ĩngĩ. O na no wambĩĩe kwona Yeova ta ũtaũnganaa naku. Kwoou nĩ kyaũ kĩtonya kũũtetheesya wĩthĩwe wĩ mũlũmu, ta ũkwatĩĩwe nĩ nanga, o na yĩla wakwatwa nĩ maũndũ momũ? Kana kwa ndeto ingĩ, ũtonya ata kũendeea kwĩthĩwa ũte na nzika kana Yeova nũkwendete na nũkũthĩnĩkĩaa?

3. Ndeto ‘wendo ũtathelaa’ ila syĩ Savulĩ 31:7 na 136:1 (NWT) syonanasya ata, na nĩkĩ tũtonya kwasya kana Yeova nĩwe ngelekanyʼo ĩla nzeo vyũ ya kwonanyʼa wendo ta ũsu? (O na ĩngĩ, sisya visa.)

³ Ũndũ ũmwe ũtonya kũũtetheesya ũendeee kwĩkala wĩ mũlũmu, ta ũkwatĩĩwe nĩ nanga, yĩla wakwatwa nĩ mawetu nĩ kũlilikana wendo wa Yeova ũtathelaa. (Soma Savulĩ 31:7 na 136:1 nthĩnĩ wa maelesyo ma kwongeleela.)a Ndeto “wendo ũtathelaa” syonanasya mũndũ wendete ũngĩ na ũlũmanasya nake vyũ ateũmũtia. Na Yeova nĩwe wonanasya wendo ũtathelaa nesa vyũ. O na Mbivilia yaĩtye kana e “wendo mwingĩ ũtathelaa.” (Kuma 34:​6, 7) O na ĩsyokete ĩkasya ũũ ĩũlũ wake: “Nĩwonasya onthe ala makwĩkaĩlaa wendo mwingĩ ũtathelaa.” (Sav. 86:​5, NWT) Kwasũanĩa kĩla Maandĩko asu mekwonanyʼa: Yeova ndesa kũtia nongi athaithi make aĩkĩĩku! Kũmanya kana nũlũmanasya naku o na yĩla ũkwatĩtwe nĩ maũndũ momũ no kũũtetheesye ũkaendeea kwĩkala wĩ mũlũmu.—Sav. 23:4.

ONAA WENDO WA YEOVA TA ŨMANYĨSYO WA MŨSINGI WA MBIVILIA

4. Nengane ngelekanyʼo sya momanyĩsyo ma mũsingi ma Mbivilia, na ũielesya nĩkĩ tũtethĩawa na nzika namo.

⁴ Kĩndũ kĩngĩ kĩtonya kũũtetheesya ũkaendeea kwĩkala wĩ mũlũmu yĩla wakwatwa nĩ maũndũ momũ nĩ kwonaa wendo wa Yeova ta ũmanyĩsyo wa mũsingi wa Mbivilia. Nĩ kyaũ kyũkaa kĩlĩkonĩ weewʼa ndeto “ũmanyĩsyo wa mũsingi wa Mbivilia”? Nĩvatonyeka ũkethĩwa ũsũanĩaa ũwʼo wa mũsingi ũkonetye mũĩkĩĩo witũ ũla wĩmanyĩĩtye Ndetonĩ ya Ngai. Kwa ngelekanyʼo, nĩwĩmanyĩĩtye kana ĩsyĩtwa ya Ngai nĩ Yeova, Yesũ nĩ Mwana wake e ũmwe, akwʼũ mayĩsĩ ũndũ o na wĩva, na kana andũ makatanĩa kwĩkala ĩũlũ wa nthĩ yĩ nzaũ tene na tene. (Sav. 83:18; Mũta. 9:5; Yoa. 3:16; Ũvu. 21:​3, 4) Na kuma yĩla weetĩkĩlile momanyĩsyo asu, vai mũndũ o na ũmwe waatuma ũeka kũmaĩkĩĩa. Nĩkĩ tũkwasya ũu? Nũndũ nĩwamanyie kana maũndũ asu nĩ ma kũĩkĩĩka. Ekai twone ũndũ kwonaa wendo wa Yeova ta ũmanyĩsyo wa mũsingi wa Mbivilia kũtonya kũũtetheesya ũkethĩwa ũte na nzika kana Yeova nĩwonaa maũndũ ala maũkwatĩte na kana nũkũthĩnĩkĩaa.

5. Elesya ũndũ mũndũ ũtonya kũeka kũĩkĩĩa momanyĩsyo ma ũvũngũ.

⁵ Yĩla wambĩĩie kwĩmanyĩsya Mbivilia oou, nĩ kyaũ kyatumie ũeka kũĩkĩĩa momanyĩsyo ma ũvũngũ? Nũtonya kwĩthĩwa waelekanilye kĩla weemanyĩĩtye ndĩninĩ ĩla waendaa na kĩla Maandĩko mamanyĩasya. Kwasũanĩa ngelekanyʼo ĩĩ: Twasye ve ĩvinda waĩkĩĩe kana Yesũ nĩwe Ngai Mwene Vinya Wʼonthe. Ĩndĩ kwĩmanyĩsya Mbivilia nĩkwatumie wambĩĩa kwĩkũlya-ĩ, ‘Kwa wʼo ũmanyĩsyo ũsu nĩ wa wʼo?’ Na ĩtina wa kwĩmanyĩsya nesa ũwʼo ũla wĩ Maandĩkonĩ, nĩwamanyie kana ũmanyĩsyo ũsu ti wa wʼo. Ĩtina wa ũu, nĩwambĩĩie kũĩkĩĩa ũwʼo ũũ wĩ Maandĩkonĩ: Yesũ “nĩwe wa mbee katĩ wa syĩndũ syonthe ila syoombiwe” na nĩwe “Mwana wa Ngai e ũmwe.” (Aks. 1:15; Yoa. 3:18) Nĩ wʼo kana momanyĩsyo ma ũvũngũ no methĩwe mailye ta “ngome syĩ vinya” na me vinya mũno kũmaomboa, kana kwa ndeto ingĩ, kũeka kũmaĩkĩĩa. (2 Ako. 10:​4, 5) Ĩndĩ ĩtina wa kwĩmanyĩsya ũwʼo ũla wĩ Maandĩkonĩ, nĩwaekie kũĩkĩĩa momanyĩsyo ma ũvũngũ na ndwaametĩkĩla ĩngĩ.—Avi. 3:13.

6. Nĩkĩ tũtonya kwĩthĩwa tũte na nzika kana “wendo wa Yeova ũtathelaa” wĩkalaa tene na tene?

⁶ No wĩke ũndũ ta ũsu yĩla ũkwĩmanyĩsya kĩla Mbivilia ĩwetete ĩũlũ wa wendo wa Yeova. Yĩla wakwatwa nĩ maũndũ momũ na wambĩĩa kwĩthĩwa na nzika kana Yeova nũkwendete, ĩkũlye-ĩ, ‘Yo kĩĩ ngũsũanĩa nĩkyosanĩte na kĩlĩko?’ No ũsianĩsye nzika ila wĩ nasyo na ndeto ila syĩ ĩandĩkonĩ ya Savuli 136:​1, yĩla nĩyo ĩandĩko ya mũsingi ya ĩsomo yĩĩ. Nĩkĩ Yeova waĩtye kana wendo wake “ndũthelaa”? Nĩkĩ ndeto “wendo wake ũtathelaa wĩkalaa tene na tene” itũngĩlĩĩlwe mavinda 26 nthĩnĩ wa savulĩ ĩsu? O tondũ twoona, wendo ũtathelaa ũla Yeova wonasya andũ make nĩ ũmanyĩsyo wa vata wa Mbivilia o ta momanyĩsyo ala angĩ ma vata me Ndetonĩ yake, na twaĩle kũwĩtĩkĩla na mĩtũkĩ o ũndũ twametĩkĩlile. Kwoou woni wa kana tũi ma vata kana tũyendetwe nĩ Yeova nĩ wa ũvũngũ. Leana nawʼo vyũ o ũndũ ũtonya kũleana na momanyĩsyo ala angĩ ma ũvũngũ.

7. Nengane ngelekanyʼo sya maandĩko amwe matũĩkĩĩthĩtye kana Yeova nũtwendete.

⁷ Mbivilianĩ ve maandĩko angĩ maingĩ matũĩkĩĩthasya kana Yeova nũtwendete. Kwa ngelekanyʼo, Yesũ eeie aatĩĩi make atĩĩ: “Mwĩ ma vata mũno kwĩ tũsũni twingĩ.” (Mt. 10:31) Nake Yeova eeie andũ make atĩĩ: “Ngakwĩkĩa vinya; ĩĩ ngakũtethya; ĩĩ, ngakũũngamya na kwʼoko kwa aũme kwa ũlũngalu wakwa.” (Isa. 41:​10, BK) Kwasũanĩa ũndũ ndeto isu syĩ na ũito wĩana. Yesũ ndaĩtye ‘no mwĩthĩwe mwĩ ma vata mũno,’ nake Yeova ndaĩtye ‘no nĩũtethye.’ Vandũ va ũu, maĩtye: “Mwĩ ma vata mũno” na “ngakũtethya.” Wesa kwĩthĩwa na nzika kana Yeova nũkwendete yĩla wakwatwa nĩ maũndũ momũ, maandĩko ta asu no maũtetheesye ũkewʼa kavaa, na ũndũ ũla wa vata vyũ nĩ kana no matume wĩyĩĩkĩĩthya kana nũkwendete. Maandĩko asu mawetete ũwʼo. Wamavindĩĩsya na wamũvoya Yeova aũtetheesye ũmine nzika ila wĩ nasyo, ũkeethĩwa ũtonya kwĩtĩkĩlana na ndeto ii syĩ 1 Yoana 4:16: “Nĩtũmanyĩte na kũĩkĩĩa kana Ngai nũtwendete.”b

8. Ũtonya kwĩka ata ethĩwa mavinda amwe nĩwĩthĩawa na nzika kana Yeova nũkwendete?

⁸ Nao nata ethĩwa mavinda amwe nĩwĩthĩawa na nzika kana Yeova nũkwendete? Sianĩsya ũndũ ũkwĩwʼa na kĩla wĩsĩ. Ti mavinda onthe kĩla tũkwĩwʼa kĩthĩawa kĩ kya wʼo, ĩndĩ wendo wa Yeova ũla tũeleetwʼe Maandĩkonĩ nĩ wa wʼo. Kwoou yĩla tweethĩwa na nzika kana Yeova nũtwendete, twĩthĩawa tũivũthĩĩsya nguma yake ya mwanya vyũ, nayo nĩ wendo.—1 Yoa. 4:8.

SŨANĨA ŨNDŨ YEOVA ‘ŨKWENDETEʼ MŨNO WĨANA

9-10. We Yesũ aneeneaa kyaũ yĩla wawetie ndeto ii syĩ nthĩnĩ wa Yoana 16:​26, 27: “Asa mwene nũmwendete”? (O na ĩngĩ, sisya visa.)

⁹ No twĩmanyĩsye maũndũ maingĩ ĩũlũ wa ũndũ Yeova ũtwendete twavindĩĩsya ndeto ii Yesũ watavisye aatĩĩi make: “Asa mwene nũmwendete.” (Soma Yoana 16:​26, 27.) Yesũ ndaaweta ndeto isu aĩ no kana atanĩthye amanyĩwʼa make. Na ũu nĩ wʼo nũndũ mĩsoa ĩla ĩthyũlũlũkĩte mũsoa ũsu nĩyonanĩtye kana we ndaneeneaa ũndũ mo meewʼaa. Vandũ va ũu, we aneeneaa ũndũ wĩ kĩvathũkanyʼo vyũ, nawʼo nĩ mboya.

¹⁰ Yesũ aĩ anatavya amanyĩwʼa make kana maaĩle kwĩsĩlasya mboya syoo vala ũĩ, ĩndĩ ti we maaĩle kũvoya. (Yoa. 16:​23, 24) Na ũsu nĩ ũndũ wa vata maaĩle kũmanya. Ĩtina wa Yesũ kũthayũũkwʼa, amanyĩwʼa make maĩ matonya kũtatĩka mamũvoyae no we. Na twĩasya ũu nũndũ mamwonaa ta mũnyanya woo. Maĩ matonya kũsũanĩa kana nũndũ Yesũ nĩwamendete mũno, aĩ atonya kwĩthukĩĩsya mboya syoo na aikũlya Ĩthe woo amatetheesye. Ĩndĩ Yesũ ameie maikatate kwĩthĩwa na ĩsũanĩo ta yĩu. Nĩkĩ? Nũndũ ameie atĩĩ: “Asa mwene nũmwendete.” Na ũwʼo ũsu nĩ ũmanyĩsyo wa mũsingi wĩ Mbivilianĩ ĩũlũ wa mboya. Kwasũanĩa ũndũ kĩu kyonanasya: Kwĩmanyĩsya Mbivilia nĩkũtumĩte ũmũmanya Yesũ na ũmwenda. (Yoa. 14:21) Ĩndĩ o ta amanyĩwʼa asu make, no ũmũvoye Ngai ũte na nzika nũndũ we ‘mwene nũkwendete.ʼ Na no wonanyʼe kana nũĩkĩĩe ndeto isu kĩla ĩvinda ũũmũvoya Yeova.—1 Yoa. 5:14.

MANYA KĨLA KĨTUMAA WĨTHĨWA NA NZIKA

11. Nĩkĩ Satani ũtonya kũtana mũno twambĩĩa kwĩthĩwa na nzika kana Yeova nũtwendete?

¹¹ Nũũ ũtumaa twĩthĩwa na nzika kana Yeova nũtwendete? No wasye kana Satani nĩwe ũtumaa twĩthĩwa na nzika isu. Ndevili ‘amanthaa kũtũmelya,’ na kwoou no atane mũno oona twĩ na nzika kana Yeova nũtwendete. (1 Vet. 5:8) Na twĩasya ũu nũndũ Yeova aumisye nthembo ya wovosyo nũndũ nũtwendete, ĩndĩ Satani endaa twĩwʼe tũtaĩle kũtetheka nĩyo. (Evl. 2:9) Ĩndĩ nũũ ũtanaa yĩla tweethĩwa na nzika kana Yeova nũtwendete? Nĩ Satani. Na nĩ kwenda kwaũ kwĩanĩawʼa yĩla twaeka mathĩna matũkĩlye vinya? Nĩ kwa Satani. Kwasũanĩa ũseleke ũla Satani wĩthĩawa nawʼo ayenda tũĩkĩĩe kana Yeova ndatwendete. Ĩndĩ ũwʼo nĩ kana ũ Satani nĩwʼe ũtendetwe nĩ Yeova. Na atũmĩaa “maũĩ” make kũtuma twĩwʼa tũtendetwe na twona Yeova atesa kũtwĩtĩkĩla. (Avs. 6:11) Ĩndĩ twamanya kĩla mũmaitha witũ wĩthĩawa aitata kwĩka, no tũtwʼe vyũ ‘kũmũvĩnga Ndevili.ʼ—Yak. 4:7.

12-13. Kwĩthĩwa twĩ ene naĩ kũtonya kũtuma ata twĩthĩwa na nzika kana Yeova nũtwendete?

¹² Ve ũndũ ũngĩ ũtonya kũtuma twĩthĩwa na nzika kana Yeova nũtwendete. Nĩ ũndũ wĩva? Nĩ kwĩthĩwa twĩ andũ me na naĩ. (Sav. 51:5; Alo. 5:12) Naĩ nĩyo yatumie andũ maeka kwĩthĩwa na ngwatanĩo nzeo na Mũmbi woo. O na nĩyaanangie mosũanĩo moo, ngoo syoo, na mĩĩ yoo.

¹³ O na eka ũu, naĩ nĩtumaa tũandũĩka, twĩthĩwa na kĩũũyũ, twĩwʼa tũte asũvĩĩku, na twĩwʼa nthoni. Na tũkothaa kwĩwʼa ũu yĩla tweeka naĩ. Ĩndĩ ũndũ ũngĩ ũtonya kũtuma twĩwʼa ũu nĩ kũlilikana kana twĩ ene naĩ, na kĩtumi nũndũ tũyaaũmbwa tũilye ũu. (Alo. 8:​20, 21) O tondũ ndĩa ĩte na nzeve ĩtesa kũthũkũma nesa, o ta ũu, kwĩthĩwa twĩ ene naĩ kũtumaa twĩthĩwa tũtatonya kwĩanĩsya kĩla twoombiwe twĩanĩasye. Kwoou ti ũndũ wa ũsengyʼo kwona mavinda amwe twĩthĩawa na nzika kana Yeova nũtwendete. Mavindanĩ ta asu, twaĩle kũlilikana kana Yeova nĩ “Ngai mũnene na wa kũtĩsya, ũla . . . [wonanasya] ũseo wĩ wendo [kana, wendo ũtathelaa] kwa ala mamwendaa na kũkwataa mĩao yake.”—Nee. 1:​5, BK.

14. Kũvindĩĩsya nthembo ya wovosyo kũtonya ata kũtũtetheesya tũeke kwĩthĩwa na nzika kana Yeova ndesa kũtwenda? (Alomi 5:8) (O na ĩngĩ, sisya ĩsandũkũ “Ĩsũvĩanei na ‘Ũkengani wa Naĩ.ʼ”)

¹⁴ Nĩ wʼo kana mavinda amwe no twĩwʼe tũtaĩle kwendwa nĩ Yeova. Na kũneena ũwʼo, ti aĩ nĩwaĩle kũtwenda na kĩu nĩkyo kĩtumaa wendo wake wĩthĩwa wĩ wa mwanya mũno. Vai kĩndũ o na kĩmwe twĩsa kwĩka kĩkatuma twasya kana nĩtwaĩle kwendwa nĩwe. O na vailye ũu, Yeova aumisye nthembo ya wovosyo nĩ kana atũekee naĩ sitũ nũndũ nũtwendete. (1 Yoa. 4:10) O na ĩngĩ, lilikana kana Yesũ ookie kũtangĩĩa eki ma naĩ ĩndĩ ti andũ mate na naĩ. (Soma Alomi 5:8.) Vai ũmwe witũ ũtonya kwĩka maũndũ ateũvĩtanyʼa, na we Yeova ndendaa twĩke ũu. Kwoou kũmanya kana kwĩthĩwa twĩ na naĩ nĩkwʼo kũtumaa twĩthĩwa na nzika kana Yeova nũtwendete no kũtũtetheesye tũkatwʼa vyũ kũkĩlya vinya ũndũ ũsu.—Alo. 7:​24, 25.

TWʼA KŨLŨMANASYA NA YEOVA

15-16. Twaendeea kũlũmanyʼa na Yeova, nĩ kyaũ tũtaĩle kwĩthĩwa na nzika nakyo, na nĩkĩ? (2 Samũeli 22:26)

¹⁵ Yeova endaa tũtwʼe “kũlũmanyʼa nake,” na ũsu nĩwʼo ũtwi ũla mũseo vyũ. (Kũt. 30:​19, 20) Na tweeka ũu, no twĩthĩwe tũte na nzika kana o nake akalũmanasya naitũ. (Soma 2 Samũeli 22:26.) Naitũ twaendeea kũlũmanyʼa nake, no twĩthĩwe tũte na nzika kana akatũtetheeasya tũendeee kũmĩanĩsya na ũndũ o na wĩva ũla watũkwata.

¹⁶ O tondũ tweemanyĩsya, twĩ na itumi nzeo sya kũendeea kwĩkala twĩ alũmu o na twakwatwa nĩ mathĩna. Nĩtwĩsĩ kana Yeova nũtwendete na akatũtwʼĩĩkaa. Na kĩu nĩkyo Mbivilia ĩmanyĩasya. Kwoou twesa kwĩthĩwa na nzika kana Yeova nũtwendete, no tũsũanĩae ĩũlũ wa kĩla twĩsĩ vandũ va ũndũ tũkwĩwʼa. Ekai tũendeee kwĩyĩĩkĩĩthya ũwʼo ũũ wĩ Mbivilianĩ: Wendo wa Yeova ũtathelaa nĩwĩkalaa tene na tene.