ANDŨ MA MŨIKA MAKŨLASYA
Mbivilia Ĩtonya Kũndethya Ata?—Kĩlungu kya 3: Tata Ũndũ Ũtonya Ũtetheke Vyũ Nĩ Kũsoma Mbivilia
Yĩla wavua Mbivilia, wonaa yĩ na ndeto mbingĩ. Ĩndĩ kĩu kĩyaĩle kũtuma ũkwʼa ngoo na ũyĩeka kũmĩsoma! Vandũ va ũu, myone Mbivilia o ta mesa yilĩĩlwe malĩu maingĩ me kĩvathũkanyʼo. Ndũtonya kũya malĩu asu onthe. Ĩndĩ no ũnyuve lĩu ũla ũtonya kũya ũkavũna.
Nĩ kana ũtetheke vyũ yĩla ũũsoma Mbivilia, no nginya ũtũnge kĩlĩko kyaku maũndũnĩ ala ũũsoma. Kĩlungu kĩĩ nĩkĩũkũtetheesya kwĩka ũu.
Kĩlungunĩ kĩĩ
Nĩkĩ waĩlĩte kũtũnga kĩlĩko kyaku maũndũnĩ ala ũũsoma Mbivilianĩ?
O ũndũ weekĩa kĩthito kingĩ ũsome Mbivilia, nowʼo ũkatethekaa mũno. Kwasũanĩa ngelekanyʼo ĩno: No ũinde maianĩ ala methĩawa kathangũnĩ kĩwʼũnĩ kĩvyũ kwa kavinda kakuvĩ na kĩwʼũ kĩu kĩyĩthĩwa na kamũsamo kanini ka maianĩ. Ĩndĩ, mũsamo ũsu no wingĩvange waeka kathangũ kau kekale kwa ĩvinda ĩasanga.
Kũsoma Mbivilia no kũelekanwʼe na ũndũ ũsu. Vandũ va kũsoma Mbivilia wĩkalaatĩte, osa mwanya ũsũanĩe ĩũlũ wa maũndũ ala ũendeee kũsoma. Ũu nĩwʼo mũandĩki wa Savuli ya 119 weekie. Aisye ũũ ĩũlũ wa mĩao ya Ngai: “Nĩyo nzũanĩaa mũthenya wʼonthe.”—Savuli 119:97.
Ĩndĩ ũu ti kwasya kana waĩlĩte kũsoma na kũsũanĩa Mbivilia mũthenya mũima. Ndeto sya mũandĩki wa Savuli syoonanasya ata? Nĩwoosaa mwanya wa kũsũanĩa ĩũlũ wa maũndũ ala wasoma Ndetonĩ ya Ngai. Kwĩka ũu nĩkwamũtetheeasya kwĩka motwi maseo.—Savuli 119:98-100.
“Ve ĩvinda yĩmwe inya-a-akwa wambĩie, ‘Kwa kyumwa wĩthĩawa na mĩthenya mũonza, na ĩvindanĩ yĩu nĩwĩkaa maũndũ maingĩ maku. Nĩ kyaũ kĩũtuma ũtaumya mwanya kwondũ wa Yeova? Nĩ ũndũ waĩlĩte!’”—Melanie.
Yĩla wasũanĩa ĩũlũ wa myolooto ya Mbivilia, ũkeethĩawa ne ũndũ wĩ laisi kwĩka motwi maseo, ta kwa ngelekanyʼo, yĩla ũũnyuva anyanya kana yĩla watatwa wĩke ũndũ mũthũku.
Ũtonya kwĩka ata nĩ kana ũtetheke vyũ nĩ kũsoma Mbivilia?
Ĩthĩwa na mũvango. Julia ũla wĩ na myaka ĩkũmi na kĩndũ aĩtye atĩĩ: “Ĩthĩawa na mũvango wa kũsomaa Mbivilia ũteũtĩĩa. Vanga nĩ kyaũ ũkwenda kũsoma, wĩkĩsoma ĩndĩĩ, na wĩkĩsomea va.”
Nyuva vandũ vaĩlĩte va kũsomea. Mwĩĩtu ũmwe wĩtawa Gianna aĩtye ũũ: “Mantha vandũ vate na kelele. O na ĩngĩ, tavya andũ ala angĩ ma mũsyĩ ĩũlũ wa mĩvango yaku ya kũsoma Mbivilia nĩ kana maikakũsumbũe.”
Ethĩwa wĩtũmĩa simũ kana tambuleti, ĩkĩĩthya kana ndĩũlika mesengyi. O na no ũtate kũtũmĩa Mbivilia ĩla ĩtumbĩthĩtwʼe. Ũkunĩkĩli wĩonanyʼa kana kũsoma mavuku ala matumbĩthye no kũtume mũndũ aelewa nesanga maũndũ ala ũkũsoma. Kĩvathũkanyʼo na ũu, ndwĩthĩawa wĩ ũndũ wĩ laisi kũtũnga kĩlĩko kyaku maũndũnĩ ala ũũsoma ethĩwa wĩtũmĩa simũ kana syĩndũ ingĩ ta isu.
“Nĩwʼaa ndivĩngĩĩsĩka yĩla ngũsoma ndũmĩĩte simũ kana syĩndũ ingĩ ta isu. Nĩndonya kũkwata mesengyi, mwaki ũkambĩĩa kũthela, kana Indaneti ĩkaa. Ĩndĩ ethĩwa nĩtũmĩa ĩvuku ĩtumbĩthye, kĩla kyendekaa no kwĩthĩwa na kyeni kĩanĩtye.”—Elena.
Amba kũvoya. Mũvoye Yeova aũtetheesye ũelewe, ũlilikane, na ũitetheka nĩ mĩsoa ya Mbivilia ĩla ũvangĩte kũsoma.—Yakovo 1:5.
Nĩ kana ũmwonyʼe Yeova kana nũkwenda kĩla wamũvoya, ĩka ũkunĩkĩli ĩũlũ wa ngewa ĩla ũũsomaa. Ũtonya ata kwĩka ũu? Ethĩwa wĩtũmĩa JW Library app kana wĩsoma Mbivilia indanetinĩ, no ũtine mũsoa ũla wasoma nĩ kana wone maũndũ angĩ makonetye mũsoa ũsu na ilungu ila ikonanĩtye nawʼo.
Ĩkũlye makũlyo. Kwa ngelekanyʼo: ‘Ngewa ĩno yĩmanyĩsya kyaũ ĩũlũ wa Yeova? Nĩyonanĩtye nguma yake naĩlĩte kwĩthĩwa nayo?’ (Aeveso 5:1) ‘Nĩ ũndũ wĩva ngwĩmanyĩsya ngewanĩ ĩno ndonya kũũatĩĩa thayũnĩ wakwa?’ (Savuli 119:105) ‘No nĩtũmĩe maũndũ ala neemanyĩsya kũtetheesya andũ angĩ?’—Alomi 1:11.
O na ĩngĩ, ĩkũlye-ĩ, ‘Maũndũ ala nasoma makonanĩtye ata na ũndũ mũnene ũla ũneenewe Mbivilianĩ?’ Ĩkũlyo yĩu nĩ ya vata mũno. Nĩkĩ? Nũndũ maũndũ onthe ala me Mbivilianĩ, kuma Mwambĩlĩlyo nginya Ũvuanyʼo, nĩmakonanĩtye na ũndũ ũla wa vata wĩ Mbivilianĩ, nawʼo nĩ: Ũndũ Yeova ũkathesya ĩsyĩtwa yake atũmĩĩte Ũsumbĩ wake wa ĩtunĩ, na ayonanyʼa kana nĩwe waĩlĩte kũsumbĩka na nzĩa yake ya kũsumbĩka nĩyo nzeo vyũ.