Mbivilia Yaĩtye Ata Ĩũlũ wa Atongoi ma Siasa Kumya Ũkanyʼo Kana Alimaketoni Ĩkilyĩ Kũvika?

Kwakya kwa Wakwambĩlĩlya, Matukũ 10, Mwei wa 10, 2022, mĩsinga ya Russia nĩyakimie taoni nene syĩ kĩvathũkanyʼo nthĩ ya Ukraine mayenda kũĩvanĩsya mũlivũko mũnene ũla weekĩkĩte mĩthenya ĩlĩ mbee wa vau na waananga kĩao kya vata kĩla kyakwatanĩtye kĩsio kya Crimea na nthĩ ya Russia. Maũndũ aa maneekĩkie kavinda kavũthũ ĩtina wa atongoi amwe ma siasa kumya ũkanyʼo kana Alimaketoni ĩkilyĩ kũvika.

‘Tũyaaĩsa kwĩthĩwa tũthengeee kaũ wa Alimaketoni ta ũndũ yu tũthengeee kuma yĩla [Mũsumbĩ wa Amelika John F.] Kennedy wawetie ĩũlũ wa mĩio mĩthũku ya kaũ ĩla yeekĩawa Cuba. . . . Ndiona ta ũndũ ũtonyeka kũtũmĩa mĩio ya kaũ ya nuclear na Alimaketoni ĩiema kũvika.ʼ—Mũsumbĩ wa Amelika, Joe Biden, Matukũ 6, Mwei wa 10, 2022.
“Nĩngwĩtĩkĩla kana ĩĩ nĩ Alimaketoni, nĩ mũisyo wa nthĩ yonthe.”—Mũsumbĩ wa Ukraine, Volodymyr Zelensky, yĩla wakũlilwʼe ĩũlũ wa ũthũku wa kũtũmĩa mĩio ya kaũ ya nuclear, BBC News, Matukũ 8, Mwei wa 10, 2022.

Kwʼo kũtũmĩa mĩio ya kaũ ya nuclear nĩkũtonya kũtuma Alimaketoni ĩvika? Mbivilia yaĩtye ata?

**Mĩio ya kaũ ya nuclear ĩkatuma Alimaketoni ĩvika?**

Aiee. Ndeto “Alimaketoni” ĩkwatĩkanaa o ĩmwe Mbivilianĩ nthĩnĩ wa Ũvuanyʼo 16:16. Ĩyonanasya kaũ katĩ wa nthĩ syĩ kĩvathũkanyʼo ĩndĩ yonanasya kaũ katĩ wa Ngai na “asumbĩ ma nthĩ yonthe.” (Ũvuanyʼo 16:14) Ngai akatũmĩa kaũ wa Alimaketoni kũmina ũsumbĩki wa andũ.—Ndanieli 2:44.

Nĩ kana wĩmanyĩsye maũndũ maingangĩ ĩũlũ wa kĩla kaũ wa Alimaketoni ũkeanĩsya ĩũlũ wa nthĩ, soma kĩlungu kĩ na kyongo, Kaũ wa Alimaketoni Nĩ Kyaũ?

Yo nthĩ na ekali ma yo makaanangwa nĩ kaũ wa mĩio ya nuclear?

Aiee. O na kau asumbĩ ma andũ nĩmatonya kũtũmĩa mĩio ya kaũ ya nuclear ĩvindanĩ yũkĩte, Ngai ndaketĩkĩlya nthĩ yanangwe. Mbivilia yaĩtye atĩĩ:

“Nthĩ nĩyĩkalaa tene na tene.”—Mũtavanʼya 1:4.
“Ala alũngalu makatiĩwa nthĩ, na makatũa vo kũvika tene na tene.”—Savuli 37:29.

Ĩndĩ o na vailye ũu, wathani wa Mbivilia na maũndũ ala maendeee ĩũlũ wa nthĩ nĩmonanĩtye kana o mĩtũkĩ nĩvekwĩthĩwa na moalyũku manene ĩũlũ wa nthĩ. (Mathayo 24:3-7; 2 Timotheo 3:1-5) Sisya wone kĩla Mbivilia ĩmanyĩasya ĩũlũ wa ĩvinda yũkĩte kwĩsĩla mũvango witũ wa kwĩmanyĩsya Mbivilia vate ndĩvi.